HNUB TIM 30 LUB 11 HLIS; HNUB UA HMOOV LEEJ NTSHIAB AS NRES
COV LUS NYOB HAUV MAS TAIS NTAWV MOO ZOO (LK 4: 18-22)
Hnub no peb ua hmoov Leej Ntshiab As Nres. Lo lus ‘As Nres’ txhais tias ‘muaj cuab kav’. As Nres yog Zam Ntxuav Plig ib tug thwj tim, tom qab Zam qhia tias Yes Xus yog tus Pleev, ces As Nres thiaj los raws Yes Xus. As Nres paub Yes Xus lawm, nws mus qhia txog Yes Xus rau nws tus tij laug Xis Moos Pob Zeb. As Nres kuj tau coj Xis Moos Pob Zeb tuaj ntsib Yes Xus thiab. Tom qab Yes Xus hu As Nres los ua Tswv Ntuj txoj hauj lwm mas As Nres tau tso nws lub cuab tam tseg, nws raws Yes Xus mus. As Nres coj lub neej raws li Yes Xus qhia, nws tau ua ib tug hauv 12 tus Hauv Paus Xa Lus.
As Nres tau coj ib pab Hes Las los paub Yes Xus.
Kwv tij Hmoob, As Nres tus yam ntxwv mas yog tus yam ntxwv nyiam nrhiav Tswv Ntuj, xav paub Tswv Ntuj. As Nres tsis yog nyiam nrhiav thiab xav paub Tswv Ntuj xwb, nws tseem coj lwm tus los nrhiav thiab paub Tswv Ntuj thiab.
Tus Hauv Paus As Nres thiaj yog ib tug piv txwv zoo qhia peb kom kub siab nrhiav Huab Tais Yes Xus, kawm ntawm Huab Tais Yes Xus kom to taub zoo txog Tswv Ntuj, thiab coj lwm tus los ntsib Huab Tais Yes Xus.
Hnub no yog hnub xaus lub xyoo teev Ntuj 2024, tag kis ntxee mus rau lub xyoo teev Ntuj tshiab; yog Hnub Chiv hauv thawj lub Lis Piam caij Tos Huab Tais. Li ntawd, vam tias nyob hauv lub xyoo teev Ntuj tshiab no peb tsoom Hmoob ntseeg txog Yes Xus, mas peb yuav yoog raws li tus Hauv Paus Xa Lus As Nres, peb kuj yuav vam txog Leej Ntshiab As Nres pab thov Ntuj rau peb kom peb muaj ib lub siab nyiam nrhiav Huab Tais Yes Xus, muaj ib lub siab xav mloog Huab Tais Yes Xus cov lus qhia, muaj ib lub siab nyiam cov nyob ze peb; mas peb thiaj yuav coj tau lub Moo Zoo mus rau sawv daws, peb thiaj qhia tau lub Moo Zoo rau lawv mus raws qhov tseeb, thiab peb thiaj coj tau lawv los nyob hauv Huab Tais Yes Xus txoj kev cawm. Nyob zoo sawv daws.
