ZAJ NYEEM HNUB TIM 4 LUB 7 HLI 2025
HNUB NCO TXOG LEEJ NTSHIAB ES LIS XAS NPES NYOB POS TWS NKAS TEB
COV LUS NYOB HAUV MAS TAIS NTAWV MOO ZOO (MT 9: 9-13)
Kwv tij Hmoob sawv daws, lub Moo Zoo hnub no yog tus Hauv Paus Xa Lus Mas Tais piav txog thaum Huab Tais Yes Xus tuaj hu nws. Nws yog cov neeg sau se uas cov Fas Lis Xais hais tias yog neeg muaj txhaum, yog cov neeg tsis huv.
Mas Tais tsis piav tias Huab Tais Yes Xus tuaj hu nws zoo li cas thiab nws xav li cas, nws thiaj tso txoj hauj lwm sau se tseg, ces nws mus raws Huab Tais Yes Xus.
Qhov tus Hauv Paus Xa Lus Mas Tais xav qhia rau cov neeg nyeem nws phau ntawv Moo Zoo mas yog nws xav kom sawv daws pom txog Huab Tais Yes Xus txoj kev khuv leej xws li lo lus Huab Tais Yes Xus hais rau cov Fas Lis Xais tias “Nej yuav kawm lo lus no lub ntsiab cia: ‘Qhov kuv xav yuav yog txoj kev khuv leej, tsis yog thaj txi Ntuj.’
Li ntawd mas kwv tij Hmoob, peb ua neej nyob mas peb yuav xyaum coj lub siab hlub thiab khuv leej lwm tus, txawm tias cov neeg phem los cov neeg zoo, mas peb txhob cais. Thaum peb pom lwm tus ua cov hauj lwm zoo mas peb txhob thuam, txhob rhuav. Peb yuav tau nrog lawv zoo siab mas thiaj tsim nyog.
Nyob hauv zaj no peb tseem pom ntxiv tias thaum Mas Tais hnov Huab Tais Yes Xus hais rau nws tias “Koj raws kuv mus”, mas Mas Tais sawv tsees raws Huab Tais Yes Xus mus. Zoo li Mas Tais yeej npaj siab tias muaj ib hnub yog nws pom ib txog kev zoo dua rau nws, mas nws zoo siab tso txhua yam tseg. Mas Tais tsis paub tias nws tso txoj hauj lwm sau se lawm, nws lub neej yuav zoo li cas, puas yuav nrhiav tau nyiaj ntau cuag li nws ua tus sau se? Nws tsis paub, tab sis nws zoo siab tso pov tseg.
Txoj kev raws Huab Tais Yes Xus, los yog ntseeg txog Yes Xus mas zoo li ntawd. Peb tsum tso txhua yam khuam peb cia pov tseg, txawm tias txoj kev tshiab no yuav tsis tau pw sov, yuav tsis tau noj tsau.
Mas Tais pom tias kev raws Huab Tais Yes Xus yog txoj hauj lwm tshiab nws yuav ua, ces nws ua ib pluag mov noj thiab hu nws cov phooj ywg tuaj nrog nws zoo siab. Cov phooj ywg ntawd yog cov sau se, cov neeg lwm tus saib yog neeg txhaum.
Kwv tij, luag saib cov neeg sau se li Mas Tais yog neeg txhaum, tsis phim yuav mus fim mus koom noj mov. Tab sis Huab Tais Yes Xus saib lawv zoo xws li sawv daws, Huab Tais Yes Xus pom tias cov neeg paub tus kheej tias yus yog neeg txhaum thiab zoo siab txais Huab Tais Yes Xus, mas lawv yog cov yuav tau txais kev cawm. Huab Tais Yes Xus hais tias “Tsis yog cov neeg noj qab nyob zoo yuav vam txog kws kho mob, tsuas yog cov neeg mob thiaj vam txog.”
Qhov no qhia peb tias niaj hnub peb yuav nco tias peb yog neeg txhaum, peb yuav vam txog Huab Tais Yes Xus tuaj pab peb. Peb kuj tsis txhob thuam cov neeg nyob ncig peb.
