ZAJ NYEEM HNUB TIM 6 LUB 3 HLIS 2024
HNUB PLAUB LUB LIS PIAM 3 CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 5: 17-19)
Kwv tij Hmoob sawv daws, hnub no nej hnov Huab Tais Yes Xus hais tias “Nej txhob xav tias kuv tuaj rhuav Txoj Cai thiab cov Yaj Saub. Kuv tsis tuaj rhuav tab sis kuv tuaj qhia ntxiv kom thoob.”
Cov Yus Das mas lawv muaj Txoj Cai ntau hauj sim thiab lawv puag rawv Txoj Cai cia kom cim tau tias Txoj Cai hais kom ua li cas thiab txhob ua li cas. Lawv paub Txoj Cai tab sis lawv tsis to taub Txoj Cai.
Yog nej muaj phau Ntawv Ntshiab nyob nrog nej, nej qhib mus nyeem nyob hauv Mas Tais Ntawv Moo Zoo, zaj 5 qib 20-48 mas nej yuav to taub Huab Tais Yes Xus cov lus hauv lub Moo Zoo hnub no.
Thiab yog nej nthuav mus nyeem nyob hauv Mas Tais Ntawv Moo Zoo, zaj 22 qib 35-40 mas nej yuav pom tias lub ntsiab hauv Txoj Cai yog ‘nyiam Huab Tais Tswv Ntuj thiab nyiam tus nyob ze yus’.
Cov kwv tij Hmoob sawv daws, cov Fas Lis Xais thiab cov Xas Dus Kais ntsia tsis pom txog lub ntsiab hauv Txoj Cai raws xws li Huab Tais Yes Xus pom, mas lawv thiaj tos kev saib thaum twg Huab Tais Yes Xus tsis ua raws li cov lus sau nyob hauv Txoj Cai, lawv thiaj pheej yuam tsoom sid kom ua raws Txoj Cai tas zog. Lawv tsis to taub tias Txoj Cai yog qhia kom sawv daws txhob saib lwm yam loj tshaj Huab Tais Tswv Ntuj, txhob lam mus teev lwm cov dab, sawv daws ua neej nyob sib sib hlub mas nyob hauv sawv daws thiaj yuav muaj kev haum xeeb, ces lawv thiaj yuav tsim tau kev thaj yeeb.
Kwv tij Hmoob, Huab Tais Yes Xus tseem ntuas peb kom txhob hla Txoj Cai thiab txib peb kom qhia Txoj Cai rau lwm tus tau paub; yog kom peb ua neej mus raws txoj kev hwm Tswv Ntuj thiab nyiam lwm tus, kom peb qhia lwm tusk om paub sis nyiam sis hlub.
Cov kwv tij Hmoob, nej kav tsij ua li Huab Tais Yes Xus tau qhia thiab txib nej mog, nej thiaj yuav yog tus loj nyob hauv Ntuj lub Ceeb Tsheej.
Nyob zoo sawv daws.
