ZAJ NYEEM HNUB TIM 6 LUB 5 HLIS 2024
HNUB OB LUB LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 15: 26-16: 4)
Kwv tij Hmoob, hnub no Huab Tais Yes Xus ntuas peb sawv daws kom ua tim khawv txog Huab Tais Yes Xus rau lwm tus. Nyob hauv txheej laus thaud, cov neeg ntseeg raug iab hiam mas lawv zoo siab taug ua tim khawv txog lawv txoj kev ntseeg. Thaum tus Hauv Paus Xa Lus Zam sau nws phau Ntawv Moo Zoo, mas tab tom yog lub caij lub Koom Txoos raug cov nom Los Mas hiam. Zam xav txhawb siab rau cov neeg ntseeg hauv lub Koom Txoos, nws nco txog Huab Tais Yes Xus cov lus ces nws thiaj muab sau cia raws li peb hnov nyob hauv hnub no.
Cov lus ntawd hais tias “Luag yuav ntiab nej, luag haj tseem yuav ua phem tshaj. Lawv yuav ua li ntawd vim lawv tsis paub Leej Txiv thiab tsis paub kuv. Kuv hais tej no rau nej kom thaum txog lub sij hawm ntawd, nej nco ntsoov tias kuv twb xub qhia nej lawm.”
Cov kwv tij Hmoob sawv daws, niaj hnub no nyob ntau thaj tsam mas cov neeg ntseeg tseem raug tsim txom thiab tua tuag tas mus li. Lawv tau ua tim khawv txog txoj kev ntseeg.
Ntawm peb cov nyob hauv cov teb chaws tsis muaj kev iab hiam txoj kev ntseeg, mas peb yuav ua li cas los ua tim khawv txog txoj kev ntseeg?
Kwv tij Hmoob sawv daws, thaum peb paub Huab Tais Yes Xus, peb tig los raws Huab Tais Yes Xus, mas peb kawm ntawm Huab Tais Yes Xus tus piv txwv, ces peb yuav tau siv tas peb lub neej ua neeg ntseeg los ua tim khawv txog peb txoj kev ntseeg. Peb ua neej nyob sis nyiam sis hlub, peb ua neej nyob sib pab sib nres.
