ZAJ NYEEM HNUB TIM 7 LUB 3 HLIS 2024
HNUB NCO TXOG LEEJ NTSHIAB POJ SUA THIAB FES LIS XIS TIS
COV LUS NYOB HAUV LUS KAS MOO ZOO (LK 11: 14-23)
Kwv tij Hmoob sawv daws, thaum tsoom sid pom Huab Tais Yes Xus ntiab tau dab thiab kho cov neeg muaj txiab mob kom zoo, mas muaj ib txhia ntseeg tias Huab Tais Yes Xus yog tus Tswv Ntuj xa tuaj, nws yog tus cawm haiv His Xas Lais tiag, tab sis kuj muab ib txhia tsis xav ntseeg ces lawv nrhiav lus hais kom txhob lawv lub siab tsis txhob ntseeg; lawv liam tias yog Huab Tais Yes Xus hu tus vaj dab tuaj pab ntiab cov dab me xwb.
Cov kwv tij Hmoob, thaum peb hais ib yam tseeb rau ib tus neeg twg, yog nws tsis xav yuav peb hais mas peb yeej pom tias nws yuav hais ub hais no tuaj rhuav peb. Tab sis muaj tej tus mas lawv qhib siab mloog peb, lawv yuav cuab pob ntseg mloog thiab nug txog yam lawv xav paub.
Ob tug neeg no, tus yuav to taub txog qhov tseeb kawg yog tus muab siab mloog.
Nyob hauv peb txoj kev ntseeg kuj zoo ib yam li ntawd. Yog peb qhib siab thiab ua siab dav txais Tswv Ntuj Lo Lus los yug peb txoj sia, mas peb yuav tau txais Tswv Ntuj lub txiaj ntsim cawm peb. Yog peb kaw siab ntom nti thiab twb xub xav qhov phem tuaj rau hauv siab lawm, txawm yuav muaj tus nthuav Tswv Ntuj Lo Lus zoo npaum cas, txawm yuav hnov lub Moo Zoo ntau npaum cas, los peb yeej yuav tsis tau txais Tswv Ntuj lub txiaj ntsim los cawm peb.
Hnub no, xav kom sawv daws coj mus xav, saib sawv daws puas tau qhib siab rau lub Moo Zoo.
Nyob zoo sawv daws.
