ZAJ NYEEM HNUB TIM 8 LUB 12 HLIS 2025
HNUB HWM MAB LIAB TSIS LO NEEG LUB KEEB TXHAUM
COV LUS NYOB HAUV LUS KAS NTAWV MOO ZOO (LK 1: 26-38)
Nyob rau hauv zaj no yog piav txog Niam Mab Liab lub keeb. Niam Mab Liab yog ib tug nkauj tsim txiaj thiab muaj txoj kev ntseeg, kev tso siab rau Huab Tais Tswv Ntuj yam kawg siab kawg ntsws.
Ces nws thiaj tau txais Tswv Ntuj lub txiaj ntsim, ua kom Tswv Ntuj txoj hauj lwm cawm neeg tshwm sim tuaj thiab tiav tas nyob rau hauv nws. Neeg ntiaj teb thiaj tau txais kev dim hauv txoj kev tuag rau lawv cov txhaum, kom lawv tau paub thiab tau los raws Huab Tais Yes Xus uas yog ntiaj teb neeg sawv daws txoj kev cia siab nyob rau lub ntuj nyem no thiab lub ntuj yav tom ntej.
Li ntawd lub koom txoos caw peb los coj raws li Niam Mab Liab tus yam ntxwv, uas coj lub neej ntxim Tswv Ntuj siab, peb yuav tsum qhib peb lub siab tos txais Huab Tais Tswv Ntuj tuaj nyob rau hauv peb lub neej txhua txhia hnub, ces peb yuav hnov Tswv Ntuj lub suab hu. Peb yuav tsum muaj txoj kev ntseeg thiab tso siab rau Tswv Ntuj, kom nws pub txiaj ntsim rau peb, kom peb muaj peev xwm coj Tswv Ntuj lub Moo Zoo mus txog luag lwm leej lwg tus, kom luag tau txais Tswv Ntuj lub txiaj ntsim ib yam li peb.
