ZAJ NYEEM HNUB TIM 8 LUB 3 HLIS 2024
HNUB NCO TXOG LEEJ NTSHIAB ZAM HWM NTOO CUAM
COV LUS NYOB HAUV MAS KOS NTAWV MOO ZOO (MK 12: 28-34)
Kwv tij Hmoob sawv daws, yog nej nco tau mas peb twb tau hais lawm tias Huab Tais Tswv Ntuj hlub peb txhua tus, nws xav kom peb nyiam nws tshaj puas tsav yam thiab nyiam lwm tus li peb nyiam peb. Huab Tais Tswv Ntuj Txoj Cai lub ntsiab mas yog qhov ntawd.
Hnub no, Huab Tais Yes Xus qhia qhov no rau tus kws ntawv. Huab Tais Yes Xus hais tias “Tsis muaj lwm lo lus qhia loj dua lo lus tias koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog; koj yuav nyiam tus nyob ze koj ib yam li koj nyiam koj.”
Cov kwv tij, tus kws ntawv kuj tau hais ib lo lus txhab rau Huab Tais Yes Xus cov lus tias kev nyiam Huab Tais Tswv Ntuj thiab nyiam tus nyob ze yus mas yog yam zoo tshaj tej tsiaj hlawv thiab tej thaj txi Ntuj.
Yog li ntawd tiag. Txawm tias niaj lis piam peb yuav nqa cov txim mus koom nrog Leej Choj muab cev txi Ntuj, los peb niaj hnub mus koom nrog tsoom ntseeg ua lub txoos txi Ntuj; tab sis yog hauv peb nruab siab tsis muaj kev nyiam Tswv Ntuj thiab nyiam lwm tus mas peb cov txim thiab hauj lwm ntawd yuav tsis muaj txiaj ntsim dab tsi rau peb li.
Huab Tais Yes Xus hais tias “Thaum koj cev ib co txim rau saum lub thaj txi Ntuj, yog koj nco dheev tias koj tus kwv tau muaj lus rau koj lawm, mas koj cia li tso koj cov txim rau ntawm lub thaj txi Ntuj, koj mus nrog koj tus kwv hais kom haum tso koj mam rov los cev koj cov txim.”
Kwv tij Hmoob sawv daws, peb rov nrhiav nyob hauv peb saib, thaum txog Hnub Chiv peb mus teev Ntuj, peb xav li cas. Ua ntej yuav mus teev Ntuj, peb puas tau muaj lus tsis sib haum nrog leej twg, peb puas tau nrog lwm tus sib cav sib ceg, peb puas tau hais lus xaiv lus cua tsis zoo txog lwm tus, peb puas tau ntxuav lub siab lub tswv yim thiab tu lub cev kom zoo tso mam mus koom nrog sawv daws txi Ntuj.
Nyob zoo sawv daws.
