ZAJ NYEEM HNUB TIM 9 LUB 2 HLIS 2024
HNUB RAU LUB LIS PIAM 5 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 7: 31-37)
Kwv tij Hmoob sawv daws, thaum peb nrog ib tug neeg tsis hnov lus tham mas peb yuav tau piav tes piav taw nrog ces nws thiaj yuav to taub peb zoo. Hnub no thaum Huab Tais Yes Xus kho tus neeg lag ntseg thiab nplaig txhav, mas Huab Tais Yes Xus kuj tau ua zoo li ntawd. Ntawv Moo Zoo piav tias Huab Tais Yes Xus muab ntiv tes ntxig rau tus lag ntseg ob lub qhov ntsej, muab aub ncaug pleev tus neeg ntawd tus nplaig, ces Huab Tais Yes Xus tsa muag ntsia saum ntuj thiab hais tias ‘koj qhib los’.
Huab Tais Yes Xus ua li ntawd, yog xav qhia rau tus lag ntseg tias lub hwj huam Huab Tais Yes Xus ua los cawm nws ntawd yog tuaj ntawm Tswv Ntuj tus nyob saum ntuj tuaj. Huab Tais Yes Xus xav kom tus lag ntseg thiab nplaig txhav ntawd cav txog Tswv Ntuj lub koob meej, vim Tswv Ntuj mas nws thiaj zoo tau.
Kwv tij Hmoob sawv daws, lub Moo Zoo hnub no kuj zoo qhia rau peb tias thaum peb pa bib tug neeg twg mas peb txhob nrhiav qhov zoo rau peb, txhob nrhiav lub koob meej rau peb; tiam sis peb yuav cav txog Tswv Ntuj.
Tshuav tsis ntev mas twb yuav txog lub caij Plaub Caug lawm tiag, nyob hauv lub caij Plaub Caug mas lub Koom Txoos txhib peb kom ua 3 yam li no: xws li teev Ntuj tsis tseg, pub yam peb muaj rau lwm tus, thiab ua kab ke yoo.
Hnub no peb yuav tsis hais txog kev teev Ntuj, tab sis yuav hais me ntsis txog kab ke yoov thiab pub yam peb muaj xws li nyiaj txiag los toob xib rau cov tsis muaj. Peb yoo tsis thiab pub rau tus tsis muaj tsis yog kom lawv qhuas txog peb, tab sis peb yoo vim peb xav tu siab rau peb cov txhaum, peb pub rau tus tsis muaj vim peb hlub lawv thiab xav muab Tswv Ntuj txoj kev hlub pub rau lawv, xav kom lawv tau pom Tswv Ntuj lub siab hlub lawv, ces lawv yuav cav lus zoo txog Tswv Ntuj.
Kwv tij Hmoob sawv daws, yav thaud peb lag ntseg thiab nplaig txhav, nyem no Huab Tais Yes Xus tau qhib peb ob lub qhov ntsej kom hnov nws lus thiab kom peb hais tau lus los cav txog Huab Tais Tswv Ntuj lub koob meej lawm. Peb yuav ua raws li Huab Tais Yes Xus cov lus qhia thiab tsa suab teev Ntuj txhua lub sij hawm mog.
Nyob zoo sawv daws.
