ZAJ NYEEM HNUB TIM 9 LUB 7 HLI 2025
HNUB NCO TXOG LEEJ NTSHIAB TSAUS ZOOV THIAB COV TIM KHAWV SUAV
COV LUS NYOB HAUV MAS TAIS NTAWV MOO ZOO (MT 10: 1-7)
Cov kwv tij, hnub no nej hnov lub Moo Zoo piav txog thaum Huab Tais Yes Xus xaiv 12 tug thwj tim ua Hauv Paus Xa Lus. Lo lus ‘Hauv Paus Xa Lus’ txhais tias ‘thawj pab neeg xa Huab Tais Yes Xus lub Moo Zoo mus rau luag lwm tus’.
Cov His Xas Lais muaj 12 lub xeem, mas Huab Tais Yes Xus thiaj xaiv 12 leeg los ua Hauv Paus Xa Lus; lawv yuav mus tshaj lub Moo Zoo nyob hauv cov His Xas Lais.
Raws li His Xas Lais kwv huam, 12 xeem His Xas Lais lawv los nyob hauv Kas Nas Has teb, lawv tsim lub teb chaws His Xas Lais. Tab sis tom qab tus vaj Xas Los Moos tuag tas, His Xas Lais teb tawg ua 2 lub teb chaws; yog Xas Mas Lias teb, thiab Yus Das teb.
Xas Mas Lias teb muaj 10 lub xeem His Xas Lais, Yus Das teb muaj 2 lub xeem.
Thaum cov vaj As Xis Lias tuaj lwg lub tsheej Xas Mas Lias, lawv cia cov pej kum neeg tuaj yuav coj poj niam His Xas Lais hauv Xas Mas Lias, mas lawv cov me nyuam thiaj tsis yog tseem His Xas Lais; lawv yog neeg txuam tsoov. Cov Yus Das thiaj saib cov Xas Mas Lias tsis yog lawv cuab kwv tij ntxiv.
Yog vim Huab Tais Tswv Ntuj xaiv cov His Xas Lais los ua Tswv Ntuj haiv neeg, hu cov His Xas Lais los xub paub Tswv Ntuj; mas Huab Tais Yes Xus thiaj yuav xub ua hauj lwm tshaj lub Moo Zoo rau cov His Xas Lais tso. Huab Tais Yes Xus thiaj hais cov Hauv Paus Xa Lus kom xub mus cuag cov yaj ploj hauv His Xas Lais ua ntej. Thaum cov His Xas Lais 12 xeem hnov lub Moo Zoo lawd, lawv mam tawm mus tshaj rau cov Xas Mas Lias thiab tas ntiaj teb neeg.
Tsis yog Tswv Ntuj nyiam cov His Xas Lais dua lwm haiv, tab sis Tswv Ntuj yuav tsum ua raws li Tswv Ntuj tus txhooj npaj tseg. Qhov no yog Tswv Ntuj qhov ncaj.
Huab Tais Yes Xus xaiv 12 tus thwj tim ua Hauv Paus Xa Lus, nws hais rau lawv tias “Thaum nej mus kev, nej ceeb toom tias Ntuj lub Ceeb Tsheej tuaj txog ze lawm.”
Ntuj lub Ceeb Tsheej yog dab tsi?
Kwv tij, thaum Mas Tais hais txog Tswv Ntuj lub Ceeb Tsheej (Kingdom of God) mas nws hais tias ‘Ntuj lub Ceeb Tsheej’ (Kingdom of Heaven) vim tias nws sau Ntawv Moo Zoo rau cov Yus Das, mas cov Yus Das ntshai hais txog Tswv Ntuj, lawv hais txog lo lus ‘Ntuj’ ntau dua.
Ntuj lub Ceeb Tsheej los yog Tswv Ntuj lub Ceeb Tsheej tsis yog ib lub teb chaws muaj nrim dej nrim av xws li peb ntiaj teb neeg xav, Ntuj lub Ceeb Tsheej Huab Tais Yes Xus hais txog yog qhov chaw muaj kev sib nyiam sib hlub, thiab muaj kev thaj yeeb. Yog li mas Ntuj lub Ceeb Tsheej thiaj tsis yog lub Ceeb Tsheej nyob saum qaum ntuj xws li Hmoob cov dab neeg, tab sis Ntuj lub Ceeb Tsheej nyob txhua qhov chaw; qhov twg muaj kev sib nyiam sib hlub mas Ntuj lub Ceeb Tsheej nyob qhov ntawd, qhov twg muaj kev thaj yeeb mas Ntuj lub Ceeb Tsheej kuj nyob qhov ntawd. Li ntawd, Huab Tais Yes Xus tuaj, nws coj kev sib nyiam sib hlub tuaj, nws coj kev kaj lug tuaj rau neeg lub siab, ces Huab Tais Yes Xus thiaj hais tias “Nej tshaj tias Ntuj lub Ceeb Tsheej tuaj txog ze lawm’, yog hais tias “Huab Tais Yes Xus tuaj txog ze lawm’.
Cov kwv tij, lub Koom Txoos cev zaj Ntawv Moo Zoo hais txog Huab Tais Yes Xus xaiv 12 leeg thwj tim mus tshaj Ntuj lus rau cov ntseeg tau nyeem thiab xav tswv yim nyob hauv lub caij Nyob Nruab Xyoo li no, mas yog lub Koom Txoos xav kom cov ntseeg sawv daws paub tias tsis yog cov Txiv Plig txais lub Cim Tiag Tes xwb thiaj ua txoj hauj lwm tshaj Ntuj lus, tab sis yog tas cov ntseeg sawv daws lub luag hauj lwm. Cov ntseeg sawv daws, yuav ua tus xa Huab Tais Yes Xus cov lus mus pub rau cov lub qab ntuj, npaj lawv kom txais tau Ntuj lub Ceeb Tsheej Huab Tais Yes Xus coj tuaj.
Nyob zoo sawv daws.
