Hnub hwm Mab Liab, Tswv Ntuj Leej Niam (Solemnity Mary, Mother of God)
Tswv Ntuj niam (Máter Déi) yog lub npe cov neeg ntseeg hauv lub Koom Txoos Kav Tos Liv thiab Os Thos Dos tsa los cav txog tus nkauj ntshiab Mab Liab raws li Rooj Ncauj Lus nyob Es Fes Xos xyoo 431 tau zeem tseeb tias ‘Yes Xus yog tseem Tswv Ntuj, yog li mas Yes Xus niam thiaj yog Tswv Ntuj niam.’ Xyoo 500 lub Koom Txoos sab hnub tuaj thiaj pib ua hmoov hwm nkauj ntshiab Mab Liab, Tswv Ntuj niam.
Leej Ntshiab Paj Lug tau hais txog niam Mab Liab tias yog tus muaj feem pab kom Huab Tais Yes Xus txoj hauj lwm cawm ntiaj teb neeg tiav, vim niam Mab Liab yog lub tsev txais Tswv Ntuj Leej Tub los thawj tseem tib neeg rau ntiaj teb no.
Tus Hauv Paus Xa Lus Zam hais tias Huab Tais Yes Xus yog Leej Lo Lus xeeb los ua neeg, los nrog peb nyob (Z 1: 14) thiab Leej Lo Lus yog Tswv Ntuj (Z 1: 1).
Paj Lug thiab Zam nkawd zeem tseeb li ntawd, mas Mab Liab yog Huab Tais Yes Xus niam, ces Mab Liab thiaj yog Tswv Ntuj leej niam thiab.
Mab Liab yog tus poj niam tau Tswv Ntuj lub txiaj ntsim puv nws siab thiab Tswv Ntuj tau xaiv Mab Liab ua tus ciav dej coj Tswv Ntuj lub txiaj ntsim mus txog txhua tus neeg. Yog li peb cov Kav Tos Liv ziag no thiaj saib Mab Liab yog Tswv Ntuj niam. Thaum peb hwm Mab Liab mas yog peb tab tom cav txog Leej Tub lub koob meej.
Mab Liab tsis yog Tswv Ntuj niam xwb, Mab Liab tseem yog cov neeg tso siab rau Tswv Ntuj lawv niam thiab. Vim Mab Liab yog Huab Tais Yes Xus niam li cas, nws yeej yuav yog cov neeg coj nraim Huab Tais Yes Xus cov lus leej niam thiab.
Huab Tais Yes Xus tau hais tseg cia tias “Niad, tus ntawd yog kuj tub.” Thiab hais rau tus thwj tim uas nws nyiam tias “Tus ntawd yog koj niam.” (Z 19: 26-27) Huab Tais Yes Xus lo lus no kuj yog nws tau tsa niam Mab Liab ua sawv daws leej niam ntag!
Koom Txoos xaiv 3 zaj nyeem hauv Ntawv Ntshiab los nyeem nyob hauv hnub hwm Mab Liab, Tswv Ntuj Leej Nuiam:
Zaj nyeem 1 yog cov lus nyob hauv ntawv Xam Phaj (XP 6: 22-27) lub ntsiab yog hais tias Tswv Ntuj foom hmoov zoo rau leej twg, mas tus neeg ntawd yuav tau txoj hmoov zoo.
Zaj nyeem 2 yog cov lus Paj Lug sau tuaj rau cov ntseeg nyob Nkas Las Tias (NLT 4: 4-7) muaj lub ntsiab tias vim Tswv Ntuj Leej Tub yug ntawm ib tug poj niam los, peb thiaj tau kev ua Tswv Ntuj cov me nyuam.
Zaj nyeem 3 yog cov lus nyob hauv Lus Kas Ntawv Moo Zoo (LK 2: 16-21) yog piav txog thaum cov neeg zov yaj khiav tuaj xyuas tus me nyuam Yes Xus yug los raws li cov Tshiab hais qhia rau lawv.
