Fas Ntshis Kus yug nyob Fab Kis qab teb xyoo 1567 hauv ib yim neeg noob nom. Thaum txais Cim Ntxuav, nws niam hais rau nws tias “Me tub! ziag no koj tau nrog cov Tshiab ua phooj ywg, koj tau ua Yes Xus tus kwv, koj tau ua Leej Ntuj Plig Ntshiab lub tuam tsev, koj tau lub neej nyob hauv lub Koom Txoos lawm, mas koj yuav yog Tswv Ntuj tug mus ib txhis.”
Fas Ntshis Kus yog tus tub hlob ntawm lawv 6 leej, ces nws txiv thiaj xav kom nws ua txoj hauj lwm txiav plaub ntug tab sis xyoo 1587 Fas Ntshis Kus txiav siab ua hauj lwm rau Ntuj. Fas Ntshis Kus ntseeg tias Tswv Ntuj txoj kev nyiam coj qhov zoo tuaj rau sawv daws.
Xyoo 1592 Fas Ntshis Kus kawm txuj tiav, nws txiv nrhiav poj niam rau nws thiab yuav tsa nws ua ib tug nom; tab sis Fas Ntshis Kus tsis yeem, nws txiav siab ua Leej Choj thiab ua thawj coj saib xyuas lub tuam tsev teev Ntuj hauv Ntses Nis Vas.
Thaum Lus Thes coj ib co neeg ntseeg tawm hauv lub Koom Txoos mus, mas cov ntseeg hauv Ntses Nis Vas ib txhia hloov siab mus caum Lus Thes ua rau tshuav cov ntseeg Kav Tos Liv tsawg, Fas Ntshis Kus thiaj raug xa mus nyob Aas Xis.
Nyob ntawd, Fas Ntshis Kus kub siab tshaj lub Moo Zoo rau cov neeg txom nyem, nws tshaj Ntuj Lus rau cov lag ntseg ua rau lawv rov qab tig los yuav txoj kev ntseeg Kav Tos Liv.
Xyoo 1602, Tswv Qhia hauv Ntses Nis Vas tas sim neej; lawv thiaj kom nws ua Tswv Qhia. Tiam sis Fas Ntshis Kus mus txog lub nroog Ntses Nis Vas 2 zaug xwb, thawj zaug yog mus ntuas kom Kas Ves tus thwj tim Npes Xas rov tig los poo lub Koom Txoos, zaum ob yog nws hla kev dhau mus lwm qhov.
Lub 6 hli 1610, Tswv Qhia Fas Ntshis Kus nrog Leej Phauj Zuag Soos Tais (Jeanne de Chantal) txhim pawg Leej Phauj Mab Liab tuaj xyuas (Order of the Visitation of Holy Mary) yog cov phauj ua hauj lwm rau cov neeg mob thiab txom nyem.
Hnub tim 28 lub 12 hli 1622, Fas Ntshis Kus tau tas sim neej nyob hauv Lis Yoos, Fab Kis teb. Ua ntej Fas Ntshis Kus yuav tuag, nws hais rau ib tug Leej Phauj kom coj tus yam ntxwv tsis muab hlob.
