As Nthos Nyus yog ib tug neeg Hais Nkws Tos, yug los nyob hauv lub nroog As Les Xas Nros xyoo 250.
Thaum As Nthos Nyus muaj 18 xyoo mus rau 20 xyoo, nws niam thiab nws txiv tas sim neej. As Nthos Nyus txais niam txiv lub cuab tam, nws ua ib tug tub hluas nplua nuj. Muaj ib hnub, nws nrog cov neeg ntseeg ua Thaj Txi Ntuj, As Nthos Nyus hnov tus Leej Choj nyeem Mas Tais Ntawv Moo Zoo hais Yes Xus cov lus no “Yog koj xav kom koj tau zoo tshaj, mas koj rov mus muab txhua txhia yam uas yog koj tug muag, muab pub rau cov pluag, ces koj yuav muaj ib lub cuab tam muaj nqis loj nyob saum ntuj. Ua qhov ntawd tas, mas koj los raws kuv.”
As Nthos Nyus hnov Yes Xus cov lus ntawd, nws muab nws lub cuab tam muag, nws faib cov nyiaj rau cov pluag. Ob peb hli tom qab, As Nthos Nyus nqa nws phau Ntawv Ntshiab, nws mus rau Hais Nkws Tos qab teb, nws mus nrog ib tug yawg laus Txiv Twj Cuab nyob.
As Nthos Nyus nquag teev Ntuj thiab txais Tswv Ntuj Lo Lus, nws coj lub neej ua Txiv Twj Cuab, yuam nws lub cev, nws yoo tshaib ntau. Ces muaj cov neeg coob coob tuaj cuag nkawd ua rau nws tsis tau kev ua Txiv Twj Cuab raws li lub siab xav, ces nws thiaj khiav mus nyob hauv teb chaws suab puam. As Nthos Nyus mus nyob hauv ib lub qub yeej nphob xuav uas twb muaj tsiaj muaj nab los nkaum hauv lub yeej ntawd. Nws tuaj nyob ntawd tau 20 xyoo, niaj hnub mas As Nthos Nyus teev Ntuj tib leeg.
As Nthos Nyus tau mus xyuas cov neeg hauv As Les Xas Nros 3 zaug: yog mus xyuas cov neeg hauv tsev loj faj thiab cov nyob txim hauv cov qhov khawb hlau.
As Nthos Nyus nto moo nyob tas Hais Nkws Tos teb. Muaj tej tus txiv neej tuaj coj lub neej ua Txiv Twj Cuab xws li nws, ces nws thiaj pib qhia sawv daws coj lub neej ua Txiv Twj Cuab. Tab sis ntev mus ces nws khuv xim lub caij uas nws nyob tib leeg, ces nws khiav mus peb hnub peb hmos ntxiv, nws mus txog lub qhov dej Kos Xus hauv plawv teb chaws suab puam. As Nthos Nyus thiaj nyob ntawd 40 xyoo.
Xoo 328, As Thas Nas pib ua Tswv Qhia nyob As Les Xas Nros. Thaum ntawd, As Nthos Nyus ua Txiv Twj Cuab tau 58 xyoo lawm. Thaum ntawd kuj yog lub caij uas As Lis Yus qhia nws zaj tias Yes Xus tsuas yog ib tug neeg siab ntshiab, Yes Xus tsis yog Tswv Ntuj Leej Tub. As Nthos Nyus rov tuaj nyob As Les Xas Nros hli puav pab tsoom ntseeg tiv As Lis Yus.
As Nthos Nyus rov qab los rau lub qhov dej Kos Xus, nws nyob ntawd txog xyoo 356 ces nws thiaj tuag. Nws muaj 106 xyoo.
