Nod yog ib zaj txawv heev ntawm ib tug txiv neej uas nws nrhiav nyiaj pab yug cov neeg tsis muaj noj. Phis Yus Tos Mas uas nws muaj 73 xyoos, nws yog neeg Xas Mas Lias tus siab zoo nyob hauv lub neej tiag tiag. Muaj neeg paub nws coob coob los ntawm qhov nws faib zaub mov pub dawb rau cov neeg txom nyem uas muaj mob noj thiab cov neeg nyob tsis muaj chaw nyob hauv ib cheeb tsam ntawd.
Lub tsev kho mob nyob hauv lub nroog Kas Tas Yas, lub xeev Nkes Las uas nyob Is Ntias qaum teb. Qhov txawv mas yog nws txoj kev txhawb nqa cov neeg tsis muaj vaj tsev nyob kom rov muaj lub neej tshiab.
Nws pib ua txoj hauj lwm no thaum nws muaj 17 xyoo, thiab nws txoj kev pab luag tej maj mam hlob nyob hauv 50 tawm xyoo. Hnub no nws faib ib hnub 5,000 pob mov rau neeg noj thiab saib xyuas cov neeg nyob tsis muaj chaw li ntawm 200 leej nyob hauv lub tsev kho cov neeg siab ntsws tsis tiaj tus, nws pab kom 3000 tawm tus neeg rov tau ua lub neej tshiab nyob hauv txoj kev nyiam kev hlub, nyob hauv lawv cov neeg txheeb ze hauv txhua lub xeev nyob Is Ntias teb.
Phis Yus Tos Mas yug xyoo 1949 hauv ib tsev neeg uas yog pej xeem dog dig nyob hauv lub zos Villoonni nyob Kerala. Kev ua lub neej dog dig ntawm nws, yog pib ntawm lub suab hu nws tus kheej thaum nws pw kho mob ntev loo nyob hauv lub tsev kho mob. Thaum nws rov los tsev, mas muaj ib lo lus nug nws tus kheej tias : “Yuav ua li cas ntxiv mus”. Lo lus no nyob rawv hauv nws lub siab, ces ua rau nws mob siab heev. Thiaj ua rau nws pom txog txoj kev khuv leej cov neeg tsis muaj noj tsis muaj haus thiab cov neeg pluag txom nyem. Phis Yus Tos Mas yog ib tug txiv neej uas ua txoj hauj lwm no los tau 50 tawm xyoo, pab cov neeg tsis muaj lub caij nrog luag tau zoo thiab txhawb nqa cov neeg pluag, cov neeg raug luag caij tsuj kom rov muaj lub neej tshiab.
