Lawv tau khawb ib lub qhov ntxhia loj nyob saum ib lub roob ntsuab xiab nyob toob fab pej hauv Mias Mas teb. Tsov rog tau ua kom tseem hwv Mias Mas lub zog ntaug thiab cov kob tshuaj lom neeg tab tom nce siab tuaj nyob Thaib qab teb.
Lub qhov ntxhia no yog ib lub ntawm 10 lub qhov ntxhia nyob hauv lub xeev Shan txij xyoo 2022 los lawm. Yog nyob hauv thaj tsam cov tub rog Wa kav. Cov Wa yog pab neeg tuav riam phom coob tshaj, thiab lawv muaj riam phom txhij txhua raws li cov tub rog Mias Mas twb tau ntsib los lawm.
Tsoom pej xeem thiab cov nom tswv Thaib nyob deb ntawm ciam teb tsis pes tsawg kis los mev xwb. Ces xav tias cov kob tshuaj tab tom raug ntxuav ntws mus rau tus niam dej Kok, uas ntws hla sab qaum teb mus rau tus niam dej Naj Khoom uas loj thiab dav. Cov tub tseem hwv Thaib soj ntsuam pom muaj cov kob tshuaj lom neeg ntau kawg nyob hauv tus niam dej. Ces xav tias tsam ua teeb meem rau txhua yam muaj txoj sia nyob hauv dej thiab tsoom pej xeem nyob ze ntawd ce dej mus ua noj.
Sawat Kaewdam uas nws yog ib tug neeg ntes ntses hais tias : cov ntses uas ntes tau tus nqi poob lawm ib nrab, vim tsoom pej xeem thiab cov neeg yuav ntses ntshai tias tsam muaj tshuaj xyaw. Raws kev sim nyob Chiangmai thiab nyob Chiangrai ntawm tseem hwv pab neeg soj ntsuam tshuaj lom neeg, pom tau tias muaj tshuaj lom neeg nce siab yuav luag 5 npaug ntawm cov dej haus.
