Thaum Tswv Ntuj los nyob hauv peb lub neej. When the Eternal Breaks Through

Thaum Tswv Ntuj los nyob hauv peb lub neej. When the Eternal Breaks Through

Ntawv Moo Zoo Hnub Chiv 2 hauv lub Caij Plaub Caug ntawm peb xyoo no, yog Lus Kas ntawv Moo Zoo hais txog kev hloov lub cev. Thaum twg kuj xij uas peb nyeem Ntawv Ntshiab, peb yuav pom qee yam uas nws ntxim siab thiab tsis meej pem. Kuv pom tias muaj tej lo lus mob siab thiab qee yam kev xav hais txog cov lus hauv Ntawv Ntshiab no. Tej zaum kuv twb tau hais rau koj nyob hauv lub tsev teev Ntuj Chartres los lawm, thaum koj saib mus rau lub tuam tsev cov qhov rais, koj yuav pom cov duab hloov thiab hauv qee lub sij hawm hauv lub xyoo, lub hnub yuav ci rau Yes Xus lub tsho tshaj sab ua yuav luag ci ntsa. Ua rau lub tsho tshaj sab ntawd zoo nkauj kawg. Qhov ntawd ua rau kuv xav txog kev hloov cev hauv lub neej, thaum qhov tseeb ci ntsa iab los yog qhov ntshiab huv hloov ua lwm yam.

Tam sim no nws nyuab kawg uas yuav hais txog tej zaj no, vim piav nyuab. Thaum koj ua lub neej xwm yeem nyob hauv niaj hnub, koj yuav nrog tib neeg tham thiab pom txhua yam nyob ib ncig koj. Pom lub hnub pib poob ntawm npoo hiav txwv, dej hiav txwv nphau zoo nkauj. Koj yuav pom qhov zoo nkauj ntawd zoo li yog dua ib lub ntiaj teb. Qee yam nyob siab dua lub ntiaj teb no, tuaj yeem ntsia pom nyob hauv lub ntiaj teb no. Ntawd yog qhov ntsuas tawm los. Muaj qee leej hais tias : “Lub ntiaj teb no phem tas nrho. Nws puas tsuaj lawm. Khiav kom dim ntawm nws. Kuv nrhiav kev tuag kom tau dim ntawm lub ntiaj teb no.” Lwm tus neeg kuj yuav hais tias : “Tsis yog, nws yog lub ntuj uas kuv ntsia pom thiab ntsuas tau.” Cov neeg no muaj coob hauv zim txwv no, lawv muaj kev xav txog yav tom ntej xws li cov neeg tshawb fawb. “Tas txhua yam uas muaj nyob, yog lub ntiaj teb uas kuv ntsuas tau.” Yam kuv tab tom hais txog tsis yog ib yam nyob rau hauv, kuv tab tom hais txog kev paub ntawm peb uas muaj rau tib neeg, rau txhua yam ntuj tsim thiab rau peb lub neej. Ntau zaus uas xav tsis txog txhua yam kuj pom tseeb tuaj, qhov pom kev uas ntsia tsis pom qee zaus kuj tawm tuaj. Txhais tias koj los txog qhov siab tshaj los yog qis tshaj lawm. Tej zaum yog qhov siab ntawm kev zoo siab, los yog qhov qis tshaj ntawm kev nyuab siab. Koj tau los txog txoj kab kawg hauv tib neeg lub neej lawm. Thaum koj txog ntawm txoj kab kawg, koj yuav pib ntsia pom qee yam uas nws nyob siab dua txoj kab ntawd.

Nov yog daim duab uas pab tau kuv me me. Sim xav txog daim duab uas muaj ib tug ntses, tus ntses ntawd nws nyob hauv qab thu dej hiav txwv xwb. Tab sis cov neeg ntes ntses kuj ntes tau nws los. Sim xav txog daim duab uas muaj ib tug ntses tawm tuaj saum nplaim dej, thiab tus ntses pom lub ntiaj teb saum nplaim dej thawj zaug. Pom qhov pom kev uas tsis tau xav tias yuav pom los dua, ces qhov chaw no zoo nkauj kawg thiab txaus ntshai. Zoo siab thiab ntshai nyob hauv tib lub sij hawm. Ces tus ntses nti dim rov qab rau hauv dej lawm. Koj puas paub tias kuv tab tom hais txog dab tsi ? Muaj qee ntu hauv peb lub neej yog zoo li ntawd. Thaum zoo li ntawd, mas kuv siab dhia pig poog, kuv tias nws muaj ntau dua ntawd. Ces kuv xav tias zaj no yog hais txog kev ntseeg thiab fab ntsuj plig ntau dua. Sim xav txog Meister Eckhart uas nws yog ib tug Txiv Plig Dominican nyob rau txheej nrab. Nws yog tus sau ib lo lus uas rais ua lo lus xwm yeem hauv xeem lus Zes Mas Nias thiab zim txwv no yog ua lus Aas Kiv. Nws yog tus sau lo lus tias : “durchbruch” txhais tias hla kab tawg pleb. Raws li tus niam ntawv hauv lo lus breakthrough uas txhais tias tshais ruam hla qhov tawg pleb. Lub ntuj uas siab dua thiab tej zaum yuav hla los txog lub ntiaj teb no. Kuv xav tias qhov no yog yam uas Ntawv Ntshiab tab tom hais txog tias : “Tswv Ntuj tab tom hais lus rau tib neeg.” Ntau zaus kuv xav tias Tswv Ntuj lub suab yog lub Cim ntawm tej kev paub no. Yim paub ntau yim loj tuaj. Qhov kuv nyiam yog zaj nyob hauv phau ntawv “Surprised by Joy” uas yog C.S Lewis sau thiab thaum hais txog kev zoo siab, nws yog qhov hais tau meej heev. Tam sim no thov peb los mloog zaj uas Lus Kas piav, nws yog qhov zoo nyob hauv zaj no.     

Yes Xus coj Pob Zeb, Yas Kos thiab Zam nce mus saum roob kom tau mus teev Ntuj nyob ntawd. Peb paub zaj no los ntawm Ntawv Ntshiab thiab tseem muaj nyob hauv tej kab lis kev cia thiab. Lawv nce mus saum roob kom tau teev Ntuj, nws yog qhov tseem ceeb heev. Nws yog lub hom phiaj uas cov neeg ntseeg thov kom peb nquag teev Ntuj. Tsis yog peb cov lus thov Ntuj yuav yuam kom Tswv Ntuj ua. Tab sis kev teev Ntuj yog kev ua kom ras, thaum koj xav txog lub ntuj uas siab dua. Koj kuj xav mus rau qhov chaw ntshiab ntawd, koj xav muaj txoj sia thiab koj ras txog. Dhau ntawd muaj ntawv sau tias : “Thaum Yes Xus tab tom teev Ntuj, Yes Xus lub ntsej muag ci ntsa iab, nws cov khaub ncaws ci dawb paug.” Txhais tias Yes Xus hloov tsis zoo li qub lawm. Tsis yog tias Yes Xus tsis yog tib neeg. Yes Xus thiaj tso tas txhia yam tseg rau tom qab. Kuv pom Yes Xus yog Leej Ntuj Plig Ntshiab.

Mais Xes yog txoj cai, Es Lias yog yaj saub, qhov no yog qhov Yes Xus tham nyob hauv Ntawv Ntshiab ua ntej nws. Yog zaj tseem ceeb uas peb yuav nkag siab txog Yes Xus nyob hauv Ntawv Cog Lus Qub. Tas txhua yam no yog qhov tseeb thiab kuv xav qhia kom pom txog lwm yam nyob hauv no.

Li ntawd, nyob hauv peb txoj kev paub, cov neeg txheej thaud thiab Yes Xus nyob hauv thawj tiam neeg. Es Lias thiab Mais Xes kuj yog cov neeg txheej thaud, ntau pua xyoo, ib txhiab xyoo thiab txawm li ntawd kuj xij, nyob saum lub roob no Es Lias thiab Mais Xes nrog Yes Xus tham xws li phooj ywg. Puas pom tias muaj qhov tseeb uas muaj zog heev nyob ntawm no ? Peb txhua leej yog tias yim chaws mus kom tshab, mas peb yim nkag mus txog lub Ceeb Tsheej nyob mus li. Li ntawd, lub ntiaj teb uas txav mus los yog lub ntiaj teb ntawm huab cua thiab lub caij nyoog. Lub caij nyoog maj mam dhau mus ib ntu zuj zus, ces yog qhov tig mus rau yav tag los thiab yav tom ntej. Yav tag los thiab yav tom ntej yog nyob rau qhov ntawd. Tab sis kev nyob mus ib txhis, yog kev nyob mus ib txhis uas tsis muaj caij tag. Lub caij uas tsis muaj kawg, kev nyob mus ib txhis raws li Zam As Khis Nas hais tseg tias :

“Kev nyob mus ib txhis, nws yog qhov siab dua lub caij nyoog thiab yog qhov sau tas txhua lub caij nyoog los nyob ua ke.” Tam sim no kuv khuam nyob hauv lub caij nyoog, txhais tias kuv tsis tuaj yeem yuav tig tau lub caij nyoog rov qab. Tsuas yog saib tej ntaub ntawv los yog tej yeeb yaj duab yav tag lawm xwb. Kuv tig tsis tau lub caij nyoog rov qab, tsuas yog rov xav txog thiab kev cia siab lawm xwb. Tab sis thaum kev nyob mus ib txhis hla lub caij nyoog, mas kuv kuj raug nqa mus nyob ntawm qhov chaw uas huab cua thiab lub caij nyoog sib sau ua ke. Ces kuv yuav tau koom nrog qee tus neeg uas yog yav tag los thiab yav tom ntej.

Sim xav txog cov neeg ntseeg tus ntsuj plig hauv kev sib tham nrog cov Leej Ntshiab saib ! Cov Leej Ntshiab lawv tau ua lub neej nyob ntiaj teb tsis ntev tag los thiab saib seb lawv puas yog cov neeg ntxim siab thiab txhawb lub zog ? Yog tias koj tau paub thiab tshawb pom, koj yuav paub tias lawv yog cov neeg nyob hauv yav tag los tsis ntev xwb. Ces koj yuav nrog cov Leej Ntshiab sib tham tau thiab thov kev pab ntawm lawv tau. Koj tuaj yeem thov kom lawv ua tus pab daws koj tej teeb meem tau.

Li ntawd, Yes Xus thiaj nrog Mais Xes thiab Es Lias sib tham. Nws yog qhov zoo kawg ib yam li hauv lub thaj txi Ntuj. Peb muaj cov duab Leej Ntshiab thiab Ntuj cov Tshiab nyob ncig peb. Lus Kas tau hais tias : “Pob Zeb thiab nws cov phooj ywg lawv tau pw tsaug zog” ib zaug”, tab sis nyem no lawv tsim los lawm. Qhov no yog ib lub Cim nyob hauv Ntawv Ntshiab, vim kev tsaug zog hauv Ntawv Ntshiab yog qhov tsis zoo. Kuv nkag siab lawm, kuv nyiam pw tsaug zog, nws yog qhov tsis zoo kiag. Kev tsaug zog hauv Ntawv Ntshiab, yog lub Cim ntawm kev tsis muab siab rau hauv fab ntsuj plig. Koj sim xav txog thaum cov Thwj Tim pw tsaug zog hauv lub vaj Nkes Ntxes Mas Nis seb, yog thaum Yes Xus tab tom teev Ntuj.

Yes Xus hais tias : “Nej zov kuv ib teev tsis tau lod ?” Paj Lug hais tias : “Nej cov pw tsaug zog, nej sawv mas ! Nej sawv ntawm qhov tuag los, ces Yes Xus yuav pub qhov pom kev rau nej.” Tab sis lawv pw tsaug zog. Qhov ntawd yog feem ntau ntawm peb ua zoo li ntawd. Txhais tias peb ua lub neej rau yam peb txaus siab nyob hauv lub ntiaj teb no ntau dhau, ces peb tsaug zog. Peb tsis nco txog yam nyob siab dua ntawd los yog yam loj dua ntawd. Zoo li peb tsis muaj lub tswv yim thoob tsib thiab peb tsis paub dab tsi txog nws. Tab sis thaum Tswv Ntuj nkag los hauv peb lub neej, ces peb yuav tsim nto thiab peb yuav paub txog nws. Qhov ntawd yog sawv daws txoj kev teev Ntuj. Yog kev teev Ntuj uas ua kom peb tsim thiab rua qhov muag.

Chesterton’s hais tias cov mlom nyob ntawm ntug nroog Chartres tsis qi qhov muag, lawv rua qhov muag, lawv pom, lawv muaj sia. Nov kuj yog ib yam laij thawj thiab. Sim xav txog Leej Ntshiab Npes Nas Des nyob Lourdes seb, Npes Nas Des yuav tsum rov mus thaj chaw ntawd thiab tsis muaj dab tsi cheem nws tau. Vim nws tsim lawm, nws muaj sia nyob hauv lub ntiaj teb uas siab dua. Qhov ntawd yog qhov ua rau nws xav rov mus. Qhov no yog qhov Pob Zeb hais tias : “Xib Hwb, zoo kawg uas peb nyob ntawm.” Kuv nkag siab tias : thaum koj nyob hauv lub ntiaj teb uas siab dua. Qhov ntawd thiaj yog qhov koj xav tau. Tam sim no kuv yuav los xaus rau yam no. Kuv nkag siab thiab paub tias Pob Zeb xav nyob saum roob tas mus li, Npes Nas Des kuj xav nyob hauv lub qhov tsua nyob Lourdes tas mus li. Ces peb kuj vam tias ib hnub twg peb yuav tau nrog Tswv Ntuj cov Tshiab thiab tsoom Leej Ntshiab nyob ua ke. Peb yuav nrog lawv nyob ntawd txhua sij hawm, tsim txhua sij hawm. Tab sis kev paub uas zais ntshis ntawm Tswv Ntuj nyob hauv lub neej no, ua kom peb ntsia pom lub teb chaws siab dua, peb nrog nws zoo siab. Tab sis peb raug xa nqes saum roob los, yog vim li cas ne ? Kom peb tau nthuav qhov peb tau pom thiab faib rau txhua tus neeg uas peb paub. Qhov ntawd yog qhov Pob Zeb, Yas Kos thiab Zam lawv tsis tau nyob saum roob mus li. Lawv nqes mus, tab sis lawv tau txais ib co sab ci pom kev thiab lawv xa qhov pom kev ntawd mus rau cov neeg uas lawv paub. Qhov no yog qhov zoo kawg. Kuv sawv nyob ntawm no, hnub no hauv xyoo 2025. Yog Kav Tos Liv tus Tswv Qhia, Pob Zeb uas yog thawj tug Vaj Qhia hauv lub Koom Txoos. Pob Zeb uas yog lub Pob Zeb lub Koom Txoos txhim tsa. Kuv paub txog qhov tseeb no, vim Pob Zeb nqes saum roob los.

Li ntawd, yog koj tau kov nws lawm, thov koj nyiam nws, haus nws, lom zem nrog nws. Ces koj yuav nqes saum roob mus, vim lub ntiaj teb cov txiaj ntsim.

Kwv tij Hmoob sawv daws ! Hnub no peb tham txog “Thaum Tswv Ntuj los nyob hauv peb lub neej” los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !

Lwm zaus peb mam sib ntsib dua, nej sawv daws nyob zoo !