Tso koj lub siab rau Tswv Ntuj. Place Your Heart in God
Hnub no muaj qee yam uas muaj ntsis zoo ib yam li peb pom nyob hauv lub lis piam tag los. Lub lis piam tag los peb tau muab His Xais thiab Lus Kas ntawv Moo Zoo los sib piv, thiab cov sau nyias tau qhia txog nyias lub Cim tseem ceeb ntawm lub neej fab ntsuj plig. Lub lis piam no kuj muaj ib qho sib piv muaj ntsis zoo ib yam, nws yog Yes Les Mias thiab Lus Kas ntawv Moo Zoo.
Thawj zaj nyeem yog nyob hauv ntawv Yes Les Mias zaj 17, qib 5 txog qib 8. Kuv thov kom koj muab phau Ntawv Ntshiab tawm los thiab siv sij hawm me me los nyeem, vim zaj nyeem hnub no nws yooj yim. Tab sis nws qhia txog fab ntsuj plig tau zoo
heev. Nov yog Yes Les Mias cov lus hais : “Tswv Ntuj hais li no ; tus twg tso siab rau neeg, tus twg nrhiav qhov tawv nyob nraum daim tawv, tus twg khiav tawm ntawm Tswv Ntuj, tus ntawd yuav raug tsawm.”
Tam sim no kuv paub tias Yes Les Mias yog tus neeg muaj kev nyuab siab thiab nyob hauv qhov tsaus ntuj nti. Peb yuav los ua kev nkag siab ua ke.
“Tus twg tso siab rau neeg, tus ntawd yuav raug tsawm.” Lo lus no tsis tau txhais tias peb tsis muaj qhov tsis tso siab rau leej twg thiab ua xyem xyav txog leej twg li. Ntseeg siab hauv no, peb yuav txhais li no : tus neeg yuav raug tsawm, yog tus neeg uas nws muab nws txoj kev cia siab kawg tso rau neeg. Tus yuav raug tsawm yog tus neeg uas hais tias : “Kev sov siab loj tshaj, kuv qhov kev zoo siab yog los ntawm neeg los. Los ntawm kuv tsev neeg, kuv tej phooj ywg, kuv tej lag luam, tej neeg nyob ib puag ncig kuv thiab lwm yam.” Koj yuav hais tias : “Kuv txhais tias qee zaus muaj tej tus neeg zoo zoo nyob hauv peb.” Qhov no nws muaj tseeb tiag, tab sis qhov tseeb tiag nyob hauv ib tug neeg lub siab. Thaum koj hais tias : “Kuv xav ua hom neeg twg, hom neeg zoo li cas ?” Yog koj tab tom hais txog qhov kev xav nyob hauv koj lub siab, qhov ntawd txhob tso siab rau neeg. Vim koj lub siab yog Tswv Ntuj li. Koj tus ntsuj plig yuav tau zoo nyob vim yog Tswv Ntuj xwb. Peb txhua tus puav leej muaj qhov yuam kev, muaj teeb meem, peb los lawm yuav tsum mus. Kuv yog hais txog tias tab txawm ib tug neeg zoo uas koj paub, phooj ywg, koj tsev neeg thiab lwm tus. Lawv puav leej yog cov neeg zoo heev, tab sis lawv tsis nkag siab txog qhov koj xav tau nyob hauv koj lub siab. Li ntawd, txhob tso siab rau lawv vim txoj kev xav ntawd.
Nws hais tias : “Tus neeg nrhiav qhov tawv nyob nraum daim tawv yuav raug tsawm.” Ntawm kuv, mas daim tawv yog lub cim ntawm tej yam no. Tsis yog tib yam no xwb, nws yog hais txog txhua yam nyob hauv lub ntiaj teb uas zoo nyob ib puag ncig peb. Txhua yam ntuj tsim, kev lag luam, Technology thiab lub ntuj uas xwm yeem ntawm peb. Nws yog lub ntuj nraum daim tawv. Ntawv Ntshiab tsis tau tiv daim tawv. Txhais tias txhob muab koj lub siab tso rau txhua yam nyob hauv lub ntiaj teb no. Vim txhua yam nyob hauv lub ntiaj teb no txawj tshwm sim thiab txawj ploj mus. Txhua yam nws zoo, tab sis muaj nqis tsawg. Txhua yam nyob hauv ntiaj teb no nws yog qhov pom tsis tseeb thiab qhov kawg nws tsis tseem ceeb dab tsi.
Koj yuav hais tias : “Tsis yog ! Kuv xav nrhiav kuv txoj kev sov siab, kuv yuav nrhiav yam uas kuv lub siab xav tau nyob nraum daim tawv.” Nws yuav tsis tau qab hau dab tsi. Kuv tus ntsuj plig yuav tau nyob sov siab, yog thaum kuv nyob hauv Tswv Ntuj xwb. Kuv lub siab raug txib kom mus cuag Tswv Ntuj. Txhob tso siab los yog cia siab rau txhua yam hauv lub ntiaj teb uas txawj ploj mus. Yog koj ua li ntawd, mas koj yuav tu siab xwb. Tam sim no peb rov los mloog dua ib lwm : “Tus twg khiav tawm ntawm Tswv Ntuj, nws yuav raug tsawm.” Nov yog tib neeg raws li Ntawv Ntshiab. Yog ntsuj plig raws li Ntawv Ntshiab. Yog tias koj xav tau lub siab, thiab qhov tob hauv koj lub neej, koj yuav tig mus rau sab twg ? Koj yuav tig mus nrhiav Tswv Ntuj los koj yuav tig mus nrhiav yam uas tsis yog Tswv Ntuj ? Leej Ntshiab Aus Nkus Tis Nus hais tias : “Koj txhob hnov qab nyiam tus tsim koj, thiab tig mus nrhiav yam uas yog neeg tsim. Kev hlub hauv lub siab yog Tswv Ntuj li xwb. Koj yuav tig mus nrhiav yam uas tsis yog Tswv Ntuj tam sim no. Qhov ntawd yog qhov coj koj mus rau kev piam sij thiab kev puas tsuaj hauv fab ntsuj plig. Peb txhua tus yog neeg muaj txhaum thiab peb paub tias nws zoo li cas. Kev tso siab rau neeg, kev nrhiav qhov tawv nraum daim tawv los yog lub siab tso Tswv Ntuj tseg. Qhov ntawd yog teeb meem loj thiab nov yog kev sib piv uas raug siab dua. “Tus ua li ntawd, yog zoo li ib tus ntoo qhuav nyob teb chaws suab puam uas tsis hloov caij nyoog. Nws sawv nyob ntawm qhov chaw fab thiab tsis muaj dab tsi thiab yog av qhuav qhawv.”
Koj sim xav txog ib tsob ntoo uas nws tsis nyob ntawm qhov chaw muaj dej, nws tsis zoo li lwm tsob ntoo, nws qhuav thiab tag kev cia siab. Ntawm peb, mas peb yog cov neeg muaj txhaum thiab muaj coob heev. Peb tsuas ntsia pom kev ua tiav ntawm lub ntiaj teb, peb yuav hais tias : “Kuv pom txoj kev ua tiav uas kuv nrhiav lawm.” Tab sis hais txog hauv lub siab, peb paub zoo tias nov yog yam uas peb paub tias qhuav, tsis muaj sia, nplooj qhuav thiab ya rau ub rau no.
Peb yuav los mloog Yes Les Mias cov lus ntxiv mus : “Tab sis tus tso siab rau Tswv Ntuj, nws nyob sov siab.” Yog hais txog kev ntseeg txog Tswv Ntuj. “Tus muaj kev tso siab rau Tswv Ntuj.” Nws yuav pom kev cia siab nyob qhov twg ? Yog tias koj muaj 5 plhom nyiaj uas koj xav tau thaum koj muaj 35 xyoos. Yog tias koj muaj tsev zoo raws li koj tus npau suav thiab tau txoj hauj lwm zoo raws li koj ib txwm xav tseg. Koj xav tias qhov ntawd yog qhov yuav pab txhawb koj yav tom ntej, ces koj yuav pom kev sov siab nyob ntawd. Yog tias koj yog ib tug tub tseev tsim los yog dab tsi kuj xij, koj tso siab rau tej yam ntawd. Koj yuav paub tias tsis zoo kiag, vim kev cia siab yog Tswv Ntuj li. Tus neeg uas nws lub siab yog Tswv Ntuj li, nws yuav thov Ntuj thiab ua raws Tswv Ntuj cov lus. Kev ua raws Tswv Ntuj cov lus thiab ua cov hauj lwm nyob hauv kev nyiam kev hlub. Tus uas lub siab nyiam Tswv Ntuj, yog zoo li tsob ntoo uas muaj cag tob thiab nrhiav tau dej, nrhiav tau yam nws xav tau tas mus li. Li ntawd, thaum muaj ntuj qhuav peb kuj paub zoo tias ntawd yog dab tsi. Hauv peb lub neej ntiag tug, lub neej ua hauj lwm thiab kev nyob nrog xyoob ntoo nroj tsuag. Yog hais txog peb lub cev ntaj ntsug. Thaum peb yuam kev, peb tsis tau yam uas peb xav tau. Tab sis yog peb tsis tso siab rau Tswv Ntuj, peb kuj yuav zoo li tsob ntoo qhuav nyob ntawm cov av daw ntsev thiab tsis muaj dab tsi. Yog kuv ruaj khov los ntawm kev thov Ntuj hauv cov hauj lwm kev nyiam kev hlub, yog kuv ruaj khov thiab muaj tus cag tob nyob hauv dej. Yes Xus hu qhov ntawd ua cov dej txhawv hauv koj kom tau txoj sia nyob mus li.
Li ntawd, peb rov nco txog Yes Les Mias thiab kuv thov koj rov nyeem dua ib zaug. Koj nthuav phau Ntawv Ntshiab thiab nrhiav Lus Kas ntawv Moo Zoo zaj 6, yog cov lus qhuab qhia raws li Lus Kas ntawv Moo Zoo. Tej zaum Mas Tais yuav nto npe me ntsis, tab sis nov yog Lus Kas cov lus qhuab qhia. Koj yuav saib zaj no thiab xav txog ib daim duab nyob hauv Yes Les Mias.
Yes Xus ntsia ntsoov nws cov Thwj Tim thiab hais tias :
“Nej cov uas pluag txom nyem nej nyob kaj lug, vim Tswv Ntuj lub Ceeb Tsheej yog nej li. Nej cov uas tshaib nqhis nej nyob kaj lug, vim nej yuav tau noj tsau. Nej cov uas quaj ntsuag yuav nyob kaj lug, vim nej yuav muaj suab luag. Nej cov uas raug luag hiam luag ntxub, thaum luag ntiab nej thiab thuam nej, vim Neeg Leej Tub. Hnub ntawd, nej yuav hom khaj thiab dhia zoo siab.”
Kuv paub tias yog ib qho txawv, tab sis thov nej xav txog qhov peb tab tom hais txog. Leej twg yog cov pluag txom nyem uas Yes Xus hais tias yuav tau nyob kaj lug ? Yog tus tsis tau muab nws lub siab rau kev nplua nuj thiab tsis xav txog lub neej nplua nuj. Leej twg yog cov tshaib nqhis uas Yes Xus hais tias lawv yuav tau noj tsau ? Yog tus neeg uas tsis muab nws lub siab mus tso rau kev sib deev, vim muaj coob leej yog zoo li ntawd. Kuv muaj kev sov siab heev, yog tias kuv xav ua kom txaus kuv lub cev. Tsis yog li ntawd. Cov neeg tshaib nqhis, nyem no lawv kaj siab lug. Cov neeg quaj ntsuag, nyem no lawv luag lawm. Qhov ntawd yog txhais li cas ? Koj yuav muaj kev sov siab, yog thaum luag tej ntxub koj. Thaum luag tej ntxub koj thiab thuam koj, vim Neeg Leej Tub, koj yuav tau nyob kaj lug thiab nyob sov siab. Yog tias lub meej mom yog koj lub hom phiaj, yam uas ua kom koj sov siab yog qhov tau txais lub meej mom. Tsis hais txog hauj lwm los yog daim ntawv pov thawj thiab lwm yam, koj ua tau dab tsi ? Koj yuav tau hloov koj lub neej kom haum rau neeg tej kev ntawd. Koj zoo siab tias lawv nyiam koj, koj tau hauj lwm thiab muaj neeg qhuas koj. Qhov ntawd nws yog ib ntu luv luv ntawm koj xwb. Tej zaum yog cov neeg txhaum los cov neeg ruam thiaj qhuas koj, vim koj tau muab koj lub siab tso tas nrho rau cov neeg ntawd.
Li ntawd, Yes Xus thiaj hais tias : “Koj muaj kev sov siab npaum cas ?” Koj yuav muaj kev sov siab, yog thaum muaj neeg ntxub koj, vim koj tau muab koj lub siab tso yog chaw lawm. Peb los xaus rau lo lus no : “Koj hmoov phem, vim koj nplua nuj.”
Yog lawm, yog tias koj tsa koj lub neej nyob hauv kev nplua nuj, mas koj txoj hmoov phem, vim tam sim no koj tau txhua yam puv siab. Tus neeg uas to hauv ntsoov rau kev txaus siab hauv nws lub cev, mas nws hmoov phem, vim tam sim no nws luag zoo siab. Yog koj xav tias koj lub neej txoj sia xaus rau tej kev xav ntawd, mas koj txoj hmoov phem. Nov yog qhov kuv nco tau tias kuv tau hais rau ib co tub kawm nyob Mundelein, kuv kheev kheev hais txog zaj no. Koj tej lus qhuab qhia sawv daws nyiam. Ntawd yog qhov kuv tau hnov kam. “Koj txoj hmoov phem, thaum txhua tus hais txog koj qhov zoo. Vim kev txhawj xeeb nyob qhov ntawd.” Puas yog koj tab tom ua kom lawv lub pob ntseg hnov tej zaj cuav, los puas yog koj tab tom ua kom koj yog qhov chaw luag tej qhuas ? Thov koj ntseeg kuv, yog tias koj hais qhov tseeb txog Tswv Ntuj, koj yuav ua kom qee leej tsis txaus siab. Tab sis koj txoj hmoov zoo, vim koj tsis tso koj lub siab nyob hauv tej pab neeg uas tsis muaj qhov tseeb. Koj lub neej yuav ruaj khov, txawj loj hlob thiab muaj cag tob mus txog cov dej muaj txoj sia nyob mus li. Cov dej uas ntws nyob hauv koj kom tau txoj sia nyob mus li. Koj tsis yog tsob ntoo nyob hauv thaj av daw ntsev thiab do cuas, tab sis koj yuav yog tsob ntoo uas tiv taus ntuj qhuav. Koj yuav tau txais koob hmoov, yog tias koj lub siab ruaj nreb rau Tswv Ntuj. Thov Tswv Ntuj foom hmoov zoo pub rau koj !
Kwv tij Hmoob sawv daws ! Hnub no peb hais txog zaj tso koj lub siab rau Tswv Ntuj los xaus li no xwb. Thov nej nco ntsoov Leej Ntshiab Aus Nkus Tis Nus lo lus no tias : “Koj txhob hnov qab nyiam tus tsim koj.” Ces vam tias lo lus no yuav pab kom nej txawj ua siab ruaj nreb thiab tso nej lub siab rau Tswv Ntuj.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Lwm zaus peb mam sib ntsib dua ! Nej sawv daws nyob zoo !
