Vaj Qhia Fas Ntshis Kus nthuav Huab Tais Yes Xus zaj paj lug tus tswv teb siab zoo tias yog ib zaj tsom txog Tswv Ntuj kev hlub mus deb tshaj neeg lub tswv yim xav txog kev ncaj ncees thiab Vaj Qhia tseem txhawb sawv daws kom tau ntsib Tswv Ntuj kev khuv leej tsis muaj nrig.
Hnub tim 24 lub 9 hli ntuj xyoo 2023 no yog ncaj rau Hnub Chiv lub Lis Piam 25 caij Nyob Nruab Xyoo, Vaj Qhia Fas Ntshis Kus rov tuaj ntsib tsoom neeg pheej xeeb rau Tswv Ntuj nyob hauv Leej Ntshiab Pob Zeb lub tshav puam dua. Hnub no Tswv Ntuj Lo Lus Vaj Qhia xa tuaj rau sawv daws yog lo lus tias ‘Tswv Ntuj kev hlub tsis muaj nrig’.
Mas Tais Ntawv Moo Zoo (MT 20: 1-16) hais tias tus tswv teb nrhiav neeg tuaj ua hauj lwm hauv daim teb txiv cawv txij thaum kaj ntug mus txog tsaus ntuj, tus tuaj ntxov los lig, mas tus tswv teb muab tus nqe zog zoo tib yam; tus tuaj tom qab tau ib lub txiaj nyiag ib yam li tus tuaj ua ntej. Peb yuav pom tias tus tswv teb qhov ua tsis ncaj no yog Tswv Ntuj kev ncaj ncees uas nyob siab dua ntiaj teb neeg zaj tswv yim hais txog kev ua ncaj.
Vaj Qhia hais tias “Thaum peb hnov zaj paj lug no mas peb xav tias tus tswv teb ua tsis ncaj rau cov tub zog xub tuaj ua ntej, tab sis peb txhob muab tus nqe zog saib ua qhov loj; tiam sis peb tsum xav txog lub ntsiab hauv zaj paj lug no, yog hais txog Tswv Ntuj tus qauv tshau neeg. Tswv Ntuj tsis tshau neeg vim neeg tau ua qhov tsim nyog los tsis tsim nyog, tiam sis vim Tswv Ntuj hlub peb xws li yog Tswv Ntuj cov me nyuam.”
Nyob hauv zaj paj lug no muaj 2 yam tus tswv teb tau ua; yog tawm mus hu cov neeg thiab muab tus nqe zog raws li nws lub siab, ces Vaj Qhia muab piv rau Tswv Ntuj tias “Tswv Ntuj tawm tuaj hu peb sawv daws txhua lub sij hawm, Tswv Ntuj ua li ntawd tas niaj tas xyoo. Tswv Ntuj tsis tos kom peb siv peb lub zog nrhiav Tswv Ntuj; Tswv Ntuj tsis soj txog peb qhov tsim nyog los tsis tsim nyog; txawm tias peb teb Tswv Ntuj qeeb dhau, los Tswv Ntuj tsis qaug zog rau peb. Tswv Ntuj los nrhiav peb nyob hauv Huab Tais Yes Xus, Tswv Ntuj pub nws kev hlub rau peb nyob hauv Huab Tais Yes Xus. Tswv Ntuj nrhiav peb txhua teev, txhua lub sij hawm, txhua lub caij nyoog nyob hauv peb txoj sia mus txog hnub peb so laus. Vim Tswv Ntuj nrhiav peb thiab tos ntsoov peb, mas thiaj tsis lig dhau rau peb.”
Hais txog nqe lus tias tus tswv teb muab tus nqe zog raws li nws lub siab, mas Vaj Qhia muab piv zoo li no tias “Tswv Ntuj kev ncaj tob tshaj qhov neeg lub tswv yim yuav ntsuas tau. Raws li ntiaj teb neeg lub tswv yim mas neeg yuav muab tus nqe zog raws li tsim nyog muab, raws li lawv cov hauj lwm, mas thiaj yog qhov ncaj, ntawm Tswv Ntuj mas Tswv Ntuj saib tias sawv daws yog Tswv Ntuj cov me nyuam, yog cov me nyuam Tswv Ntuj hlub tshaj txhua yam; txawm zoo los phem, ua tsheej neeg los tsis tsheej, mas Tswv Ntuj yeej hlub sib npaug. Tswv Ntuj tsis hlub ib tug tshaj ib tug.”
Vaj Qhia ntuas sawv daws kom txhob muab kev khaub zig Tswv Ntuj saib ua lag luam, txhob muab yus rab peev xwm, yus lub laj lim tswv yim saib loj dua Tswv Ntuj lub txiaj ntsim.
Vaj Qhia tseem ntuas sawv daws kom cev tes tawm mus tuav lwm tus txhais tes, kom sawv daws ras ntsoov tias Tswv Ntuj hlub lawv tib yam li Tswv Ntuj hlub yus. Yus yuav tau ua siab dav, nkag siab, thiab txawj zam rau lwm tus xws li Huab Tais Yes Xus cov lus qhia.
Hnub no Vaj Qhia cev lus rau niam Mab Liab pab kom sawv daws hloov siab tshiab los siv Tswv Ntuj tus qauv ntsuas neeg, tus qauv ntawd yog kev hlub tsis muaj nrim.
