Vaj Qhia Leo 14 tos txais 70,000 tus neeg ntseeg nyob hauv lub caij tsuj xeeb 50 xyoo ntawm cov yim neeg, cov me nyuam yaus, cov poj yawm txwv koob thiab cov neeg laus, nyob hauv lub tshav puam hwm Leej Ntshiab Pob Zeb.
Muaj cov sawv cev ntawm 131 lub teb chaws kuj tuaj koom.
Nyob hauv Vaj Qhia cov lus, nws hais tias : “Tsev neeg los yim neeg yog lub hauv paus ntawm cov neeg yav tom ntej.” Thiab yog lub Koom Txoos lub tsev me me uas txais thiab xa lub Moo Zoo. Qhov tseeb tiag ”kev ntseeg yuav sib faib xws li cov mov nyob saum yim neeg lub rooj noj mov, thiab zoo li kev nyiam kev hlub uas nyob hauv peb lub siab.” Vaj Qhia hais tias : “Hauv lub siab zoo thiab muaj kev cia siab, kuv thov hais rau cov nkawm niam txiv tias ; kev sib yuav tsis yog tib neeg kev xav, tab sis nws yog kev nyiam kev hlub tseeb tiag ntawm poj niam thiab txiv neej. Yog kev nyiam kev hlub uas zoo txhij txhua, ncaj ncees thiab txi txiv.”
Vaj Qhia Leo 14 hais txog cov lus nyob hauv Zam ntawv Moo Zoo zaj 17 qib 20 tias : “Thov kom lawv sawv daws sib koom ua ib tug.” Nyob nov “Leej Txiv tsis tau hlub peb tsawg dua nws Leej Tub. Vim kev nyiam kev hlub tsis muaj tag, Tswv Ntuj tsis tau nyiam peb tsawg dua. Tswv Ntuj xub nyiam thiab hlub txij lub hauv paus los lawm.
Li ntawd, vim Tswv Ntuj kev khuv leej, Tswv Ntuj thiaj xav kom sawv daws mus cuag nws. Nws txoj sia uas muab rau peb nyob hauv Yes Xus, ua kom peb yog ib tug thiab sau peb los ua ke. Thaum hais txog kev sib yuav, Vaj Qhia Leo 14 hais rau cov nkawm niam txiv tias : “Yam no ua kom nej yog ib lub cev nqaij thiab ua kom yog Tswv Ntuj tus duab uas tuaj yeem pub paj tshab ntawm txoj sia tau.” Vim li no, nej cov ua niam ua txiv, cov txij nkawm thiaj yuav tsum ua tus piv txwv hauv kev ncaj ncees.
