Kev nthuav tawm nyob Ho Chi Minh muaj cov neeg tuaj koom li ntawm 22,000 leej, thiab muaj ua thaj txi Ntuj hwm Leej Ntshiab Carlo Acutis.
Tswv Qhia Bui Cong Trac uas yog tus Tswv Qhia pab lub Cheeb Koom Txoos Ho Chi Minh ua tus coj lub Txoos yav tsaus ntuj nyob hauv lub tsev teev Ntuj Thu Thiem. Muaj cov neeg tub ntxhais hluas, cov neeg ntseeg, cov Leej Phauj thiab cov Txiv Plig tuaj koom lub thaj txi Ntuj. Ua ntej yuav ua thaj txi Ntuj, cov tub ntxhais hluas tau nquam Leej Ntshiab Carlo Acutis cov pob txha ntawm qhov chaw nthuav tawm los rau hauv tsev teev Ntuj. Yog kev sib txuas ntsiab lus ntawm kev nthuav tawm hais txog Niam Mab Liab yees tawm tuaj, kom haum nrog lub thaj txi Ntuj ua Tswv Ntuj tsaug. Hauv cov lus nthuav ntawv Moo Zoo, Tswv Qhia Trac tau hais txog Leej Ntshiab Carlo txoj kev ntseeg uas muaj rau Niam Mab Liab thiab lub Cim Yug. Nws muab Leej Ntshiab Carlo los ua piv txwv rau cov tub ntxhais hluas Kav Tos Liv uas lawv nrhiav kev ntshiab huv hauv lawv kev ua lub neej niaj hnub.
Tswv Qhia hais tias : “Leej Ntshiab Carlo Acutis qhia kom peb muaj kev ntseeg rau Niam Mab Liab, yog dhau ntawm lub Cim Yug lawm. Txoj Saw Mab Liab yog yam twj tiv thaiv uas muaj zog tiv nrog dab pham. Txoj Saw Mab Liab zoo li tus ntaiv uas luv tshaj hauv kev mus txog Ntuj Ceeb Tsheej.” Nws yog hais txog tus Leej Ntshiab hluas no txoj kev ntseeg. Dhau no lawm Tswv Qhia tseem piav txog qhov laij thawj uas Carlos ntxim cov tub ntxhais hluas zim txwv no lub siab. Nws hais tias kev ntshiab huv tuaj yeem tsim kev sib txhawb siab rau lwm tus kev ua lub neej hauv kev nyiam kev hlub. Kev ntshiab huv nws yuav txawj nthuav nws tawm mus. Kev ntshiab huv nws yuav txawj rub nws neeg los. Qhov ntawd yog kev nyiam kev hlub raws li ntawv Moo Zoo hnub no hais tseg tias : “Tus twg nyob hauv kev nyiam kev hlub, tus ntawd kuj nyob hauv Tswv Ntuj, thiab Tswv Ntuj kuj nyob hauv nws.”
Kev tsuj xeeb zaum no yog ncaj rau hnub hwm tus Leej Ntshiab tuav pov hwm ntawm pab neeg qhia kev ntseeg nyob hauv lub Cheeb Koom Txoos, uas muaj lub npe tias : “Carlo Acutis cov phooj ywg.” Nrog rau cov me nyuam uas xaiv Leej Ntshiab Carlo los ua tus Leej Ntshiab tuav pov hwm lawv thiab.
Cov lus xaus nthuav ntawv Moo Zoo, Tswv Qhia tau hais ib lo lus cav txog Leej Ntshiab Carlo uas yog nws tsim tawm. Yog qhia txog kev nyiam kev hlub uas tus Leej Ntshiab no muaj rau lub Cim Yug. Kev ntseeg uas muaj rau Niam Mab Liab, kev teev Ntuj hauv lub neej niaj hnub, thiab kev siv Internet los ua pov thawj txog Tswv Ntuj txoj kev nyiam kev hlub. Kev nthuav tawm hais txog Niam Mab Liab yees tawm tuaj nyob thoob ntiaj teb, uas yog lub Koom Haum Tus Nyiam Ntoo Cuam nyob Thu Thiem ua tus npaj. Tau qhia rau ib tsoom neeg nkag mus saib 10 hnub nyob ntawm ntug dej Ho Chi Minh. Kev nthuav tawm no tsis yog tias qhia txog qhov Niam Mab Liab yees tawm tuaj xwb, nws tseem ua kom cov neeg nkag mus saib txoj kev ntseeg tob dua kev teev Ntuj thiab. Txij hnub tim 4 mus txog hnub tim 11 lub 10 hli no, mas cov neeg ntseeg qhib rau ib tsoom neeg mus saib kom tau zov lub Cim Yug thiab hais Txoj Saw Mab Liab. Ua kom kev teev Ntuj yog qhov tseem ceeb hauv kev nthuav tawm, tsis yog tias yog kev ncig mus saib tej yam nthuav tawm xwb. Hauv kev nthuav tawm no muaj neeg coob tshaj 22,000 leej. Yog coob dua ob npaug thaum muab piv rau kev nthuav tawm zaj hais txog ‘Qhov txuj ci ntawm lub Cim Yug’ uas npaj nyob hauv xyoo 2025. Xyoo ntawd tsuas muaj neeg nkag mus saib li ntawm 10,000 leej xwb. Cov tub ntxhais hluas muaj feem cuam hauv lub koob tsheej no ntau kawg. Muaj cov hu nkauj suab sib xyaws li ntawm 13 pab, uas muaj cov sib koom hu nkauj 630 leej. Lawv sib hloo hu nkauj hauv cov Txoos zov lub Cim Yug thiab ua Tswv Ntuj tsaug. Tsis tas li ntawd, tseem muaj 34 leeg saib xyuas kev ruaj ntseg rau cov neeg nkag mus saib thiab. Pab neeg npaj lub koob tsheej no tau siv sij hawm li ntawm 153 hnub los npaj. Dhau no ntawm kev nthuav tawm lawm, cov hauj lwm no tseem raug tso tawm nyob Online hauv lub ntsiab lus ‘kev yees tawm tuaj ntawm Niam Mab Liab.’ Uas muaj 156 ntu xyam los yog Video. Qhov ntev yog 18 teev. Muaj cov hais lus phim cov duab 5 leeg ua cov piav.
Tom qab xaus lub thaj txi Ntuj, Leej Phauj Tri Thi Minh Thuy uas nws yog tus thawj cov lub Koom Haum Tus Nyiam Ntoo Cuam nyob Thu Thiem tau hais lus ua tsaug rau Tswv Qhia Trac, rau cov Txiv Plig thiab cov neeg ntseeg uas tau pab kev txhawb nqa cov hauj lwm zaum no. Nws vam thiab cia siab tias : “Ntawm Niam Mab Liab cov lus thov, yuav pab kom cov neeg tuaj saib tau txais lub zog txhawb siab thiab kev ruaj khov thaum lawv ntsib teeb meem hauv lub neej niaj hnub. Thov kom lawv ruaj nreb hauv kev hais Txoj Saw Mab Liab thiab zov lub Cim Yug ntxiv mus.” Kev xaus lub koob tsheej tau hais txog kev txhawb nqa Niam Mab Liab, txhawb nqa lub Cim Yug thiab kev thov kom ua lub neej dawb huv raws Leej Ntshiab Carlo Acutis tus piv txwv. Tus uas raug tsa ua Leej Ntshiab los ntawm Vaj Qhia Leo 14, hauv hnub tim 7 lub 9 hlis 2025. Tab txawm tias kev nthuav tawm xaus lawm, tsis kav cov npaj lub koob tsheej vam tias qhov tau los ntawm cov hauj lwm no tseem yuav muaj ntxiv mus hauv kev teev Ntuj thiab kev ua cov hauj lwm txhawb nqa cov neeg tuaj saib ntau txhiab leej.
