RVA npaj coj 40 nkawm qhov muag mus koom nrog cov tub ntxhais hluas hnub hauv xyoo 2027. Tus thawj coj cov hauj lwm hais txog yav tom ntej hauv kev sau siab cov tub tshaj Ntuj Lus Online.

Txiv Plig John Mi Shen uas nws yog tus thawj coj tuav fab kev tshaj xo ntawm cov Tswv Qhia As Xias (FABC-OSC) tau hais txog yav tom ntej no tias : thaum sawv ntxov hauv kev sib tham txog cov tub tshaj Ntuj Lus Online nyob As Xias thawj zaug, hnub tim 12 lub 9 hlis nyob hauv Vaj Qhia Zam Paj Lug Ob kem tsev sau siab nyob Radio Veritas Asia hauv lub nroog Quezon City, nyob Fis Lis Pees teb.

Kev sib tham los yog kev sau siab yog 4 hnub sib law. Txij hnub tim 10-13 lub 9 hlis no. Tau sau tas cov tub tshaj Ntuj Lus hauv Online, cov tub xov xwm thiab cov muaj feem cuam txog kev ntseeg li ntawm 100 leej nyob thoob As Xias teb tuaj ua ke, hauv lub ntsiab lus ‘kev muaj feem cuam txog kev ntseeg mus txog kev ua pov thawj ntawm cov tshaj lub Moo Zoo. Kev muaj feem cuam txog Synodal Way rau cov hauj lwm digital nyob As Xias.’ Uas muaj cov Tswv Qhia FABC thiab Radio Veritas Asia koom nrog Vas Tis Kas lub rooj ntawv xov xwm Fully Present Network ua tus npaj lub rooj sau siab. Txiv Plig Mi Shen hais tias cov hauj lwm nyob Xes Us no, yog thawj cov hauj lwm tseeb tiag ntawm lub Koom Haum tub tshaj Ntuj Lus Kav Tos Liv fab digital nyob As Xias uas tab tom sawv. Nws hais tias : “Peb muaj tej yam loj uas yuav coj cov neeg muaj feem cuam txog digital 40 leej mus koom cov tub ntxhais hluas hnub hauv xyoo 2027, thiab cov tuaj koom kev sau siab no qee leej yuav yog ib feem ntawm cov neeg uas hais txog no.” Nws hais ntxiv tias : “40 leej no tsis yog mus Xes Us kom tau ua hauj lwm xws li cov tub xov xwm uas tshaj txog cov kab ke tseem ceeb, lub thaj txi Ntuj thiab txhua yam kev sib tham hauv cov tub ntxhais hluas hnub xwb. Tab sis nws xav txog 40 nkawm qhov muag uas yuav saib mus rau txhua qhov chaw uas muaj cov tub ntxhais hluas ua nyob hauv lub koob tsheej, tsis hais kev sab laj, chav kawm, chaw so, kev tsheb, qhov chaw uas cov tawm rooj fiv Ntuj noj mov ua ke, tshav ncaws pob thiab cov tsev uas cov neeg Kos Lim qhib tos txais cov tub ntxhais hluas thoob ntiaj teb. Lub hom phiaj yog kev saib pom thiab sib faib neeg cov zaj thiab tej kev paub uas kev tshaj tawm hais tsis txog ntawm cov neeg ntseeg Kav Tos Liv nyob thoob ntiaj teb.”

Dhau nov lawm cov hauj lwm no tseem ua kom pom txog FABC yav tom ntej hauv kev sib tham txog tej kab lis kev cai, kev ntseeg thiab cov neeg pluag txom nyem. Nrog rau cov uas zej zog ntsia tsis pom los yog hnov qab. Tas 40 tus tub tshaj Ntuj Lus digital yuav coj tej kev paub no rov mus rau lawv lub teb chaws thiab lawv tej zej zog. Nws yuav pab rau cov tub ntxhais hluas uas lawv tsis tau mus txog Xes Us, kom lawv muaj lub caij koom nrog lub koob tsheej, paub txog tej teeb meem thiab kev sov siab ntawm cov tub ntxhais hluas hnub nyob hauv Online. Tsis tas li ntawd, Txiv Plig Mi Shen tau muab 40 tus tub tshaj Ntuj Lus digital no los sib piv tias ; lawv yog zoo li 40 lub qhov rais uas qhib rau lub Koom Txoos nyob Kos Lim tau pom txog qhov tseeb ntawm cov tub ntxhais hluas Kav Tos Liv nyob thoob As Xias. Nws tau ua piv txwv txog lwm cov teb chaws, xws li Mias Mas teb, Khas Phus Chas teb, Thaib teb, Is Ntos Nes Xias teb thiab Suav teb. Cov tub ntxhais hluas nyob hauv cov teb chaws no yuav muab ntau xeem lus, ntau txoj kev lis kev cai thiab tej yam lawv paub sib txawv los sau ua ke nyob hauv cov tub ntxhais hluas hnub nyob ntiaj teb. Nws hais tias : “40 lub qhov rais no tej zaum yuav rais ua 400 lub, 4,000 lub los 40,000 lub uas peb yuav qhib los sib txuas ua ke tau.” Txiv Plig Mi Shen hais tias yav tom ntej uas hais no, yog qhia txog txoj cai Synodal uas Vaj Qhia Fas Ntshis Kus txhawb nqa. Yog txoj cai nqua hu kom lub Koom Txoos mus ua ke thiab ua hauj lwm ua ke. Txawm li cas kuj xij, nws hais tias cov hauj lwm ntawm cov tub tshaj Ntuj Lus Online nyob  As Xias ntawd, pib ua ua ntej yuav muaj kev sib sau hauv xyoo 2027. Nws hais tias cov tub tshaj Ntuj Lus Online yog cov xub raug hu ua ntej yuav raug xa mus ua hauj lwm. Cov tub tshaj Ntuj Lus Online tsim nyog yuav siv sij hawm nyob nrog Tswv Ntuj thiab nkag siab txog Tswv Ntuj cov ua ntej yuav tawm mus tshaj lub Moo Zoo. Dhau no lawm nws tseem hais ntxiv tias ; kev sau siab ntawm cov neeg As Xias zaum no tsis yog tias ua ib zaug xwb tag mus, tab sis phim yuav ua ib lub Koom Haum tub tshaj Ntuj Lus digital rov mus rau lawv teb chaws, kom tau ua cov hauj lwm muaj qab muaj quag, sib faib tej kev paub thiab rov tuaj sib sau dua ib zaug kom tau xav txog thiab sib cob qhia ua ke. Ntawm Txiv Plig Mi Shen, mas qhov uas muaj ntau txoj kab lis kev cai nyob As Xias yog qhov ruaj khov ntawm cov hauj lwm no. Nws hais tias : “Tab txawm muaj qhov sib txawv hauv xeem lus, kab lis kev cai thiab keeb kwm, tsis kav cov tub tshaj Ntuj Lus Online nyob As Xias puav leej muaj tib txoj kev ntseeg. Yog ib feem ntawm tib lub Koom Txoos thiab teev tib tug Tswv Ntuj uas yog Huab Tais Yes Xus.” Nws txhib kom cov tuaj koom sau siab sib faib yam uas nws tau pom, tau hnov thiab tau ua nyob hauv kev sau siab no. Nws hais ntxiv tias : “Kev tshaj lub Moo Zoo tsis yog pib nyob hauv lwm xyoo uas yog cov tub ntxhais hluas hnub, tab sis yog pib nyob ntawm no thiab tam sim no kiag.”