Tus thawj coj hauv kev sib txuas lus txheej tshiab: Vaj Qhia Paj Lug 6 thiab Radio Veritas Asia los yog RVA.
50 tawm xyoo dhau los uas lub tshaj xo Radio Veritas Asia los yog RVA, sawv ntseg hauv lub suab kev ntseeg nyob As Xias. Yog tshaj lub Moo Zoo los ntawm tej kab lis kev cai, hauv xeem lus thiab hauv kev hla ciam teb. Yog xub pib nyob hauv kev tshaj xov tooj cua sab luv Short Wave los txog rau txheej Digital. Txoj hauj lwm no raug lees txais hnub tim 29 lub 11 hlis xyoo 1970, uas yog lub caij Vaj Qhia Paj Lug 6 ua tus kav lub Koom Txoos. Tam sim no nws yog Leej Ntshiab Paj Lug 6. Nws tau mus tsham kem tsev zom lus ntawm RVA nyob hauv lub nroog Quezon City. Yog thawj zaug uas Vaj Qhia mus tsuj daim av Fis Lis Pees. Thiab txhua zaus hauv lub caij Vaj Qhia tawm rooj ntawd, nws yuav sawv nyob ntawm Radio Veritas Asia qhov chaw tshaj xo. Kev mus tsham ntawm Vaj Qhia ntawd nws muaj ntau tshaj qhov ua thaj txi Ntuj. Nws yog kev foom hmoov zoo rau lub tshaj xo thiab hais lus tawm hauv lub tshaj xo. Vaj Qhia Paj Lug 6 hais meej tias : “Kev tshaj xo txheej tshiab tsis yog qhov cuab yeej yooj yim siv xwb, tab sis nws yog qhov cuab yeej uas Tswv Ntuj npaj tseg kom tau tshaj lub Moo Zoo.” Nws pom tias lub tshaj xo yog kev tshaj lub Moo Zoo hla ciam teb thiab mus txog cov neeg nyob deb thiab coj lub Moo Zoo mus rau plhom leej neeg nyob As Xias.
Tus yaj saub hauv kev xa xov txheej tshiab.
Vaj Qhia yog tus coj lub Koom Txoos mus rau qhov ua tiav ntawm lub Rooj Ncauj Lus Vas Tis Kas Ob. Vaj Qhia Paj Lug 6 nkag siab zoo tias lub Koom Txoos xav tau lub Cim hauv txheej tshiab. Tsab ntawv tso cai kev xa xov hauv zej zog ntawm Vas Tis Kas Ob, los yog Inter Mirifica tau hais txog kev xa xov txheej tshiab tias : yog “Tswv Ntuj qhov paj tshab” uas yuav siv kom muaj txiaj ntsim qab hauv rau ib tsoom neeg.
Hais txog ntawm Vaj Qhia Paj Lug 6, mas lo lus qhia no tsis yog kev kawm. Tab sis yog hais txog qhia kev ntseeg thiab yog qhov tsim nyog yuav ua ua ntej Digital lawm. Nws nkag siab tias lub Moo Zoo tsis tuaj yeem muab faus cia nyob hauv phab ntsa zeb. Yog xav kom lub Moo Zoo mus txog plhom leej neeg nyob As Xias, mas kev tshaj xo nyob hauv xov tooj cua tsis zoo li leej twg. Nws yog lub zog hla dhau tej hauv roob thiab dej txwv mus txog tej zej zog ntsiag ntsiag, kom tau nplij cov neeg nyob twm zeej thiab txhawb nqa cov neeg raug hiam. Thaum sawv nyob ntawm RVA lub tshuab tshaj xo, Vaj Qhia tau ua kom pom txog tus Hauv Paus Xa Lus Paj Lug lo lus tias :
“Yog kuv tsis tshaj lub Moo Zoo, mas kuv txoj hmoov phem.”
Nws tsis yog hais rau cov neeg tuaj sib koom nyob hauv lub tshaj xo xwb, yog hais rau tas xeev ntuj thiab zeem tseeb txog kev tshaj lub Moo Zoo nyob As Xias.
Thaum Vaj Qhia mus tsham RVA mas yog ib co hauj lwm tshiab ntawm cov Tswv Qhia As Xias (FABC). Cov Tswv Qhia As Xias muaj qhov xav txog yav tom ntej hais txog kev xa xov uas yuav mus txog ntau haiv neeg nyob As Xias teb, uas ntau haiv muaj cov neeg ntseeg tsawg thiab tsis muaj kev qhia kev ntseeg mus txog lawv tej zej zog. Kev mus tsham lub xov tooj cua ntawm Vaj Qhia Paj Lug 6 tsis yog kev txhawb dej siab xwb, nws tseem yog kev pom zoo thiab. Kev mus ntawm Vaj Qhia qhia ua kom pom tias As Xias tsis yog xeev ntuj nyob deb lub Koom Txoos, tab sis yog lub plawv tseem ceeb thiab muaj sia ntawm cov neeg ntseeg Kav Tos Liv nyob thoob ntiaj teb.
Kev qhia kev ntseeg nyob hauv xov tooj cua tsis yog qhov tim ob, tab sis yog qhov tseem ceeb ntawm lub Koom Txoos cov hauj lwm rau lub suab ntawm qhov tseeb. Lub caij Vaj Qhia mus tsham RVA, nws tau foom hmoov zoo rau lub tshaj xo thiab tej cuab twj siv. Ntawm qee leej mas tej yam no tsuas yog tej tshuab uas tsim tawm los ntawm hlau thiab cov xov tooj liab. Tab sis ntawm Vaj Qhia, mas tej yam no yog cov twj ntawm lub txiaj ntsim. Lub suab ntawm qhov tseeb uas lub hom phiaj yog coj qhov pom kev mus thoob As Xias teb.
Nws thov Ntuj tias kev tshaj tawm ntawd, yuav yog qhov meej tseeb hauv qhov tsis meej pem, hauv kev txom nyem thiab kev sib koom tes hauv kev sib tawg. Lub sij hawm ntawd As Xias teb tab tom ntsib teeb meem hauv zej zog, kev tseev tsim thiab kev lag luam xws li zim txwv no. Vaj Qhia cov lus foom hmoov zoo tau hloov cov twj xa xov los ua cov twj ntawm cov hauj lwm. Qhuas txog kev ua hauj lwm ntawm cov tshaj lub Moo Zoo, cov tub xov xwm, cov tub xa xov, cov kws techniques, cov kws sau ntawv thiab cov tub tshaj Ntuj Lus. Uas lawv yuav hloov lub suab tshaj xo los ua lub noob kev ntseeg.
Vaj Qhia Paj Lug 6 tawm tuaj nyob ntawm RVA lub tshaj xo lub tsav lawj nyob Mas Nis Las, hnub tim 29 lub 11 hlis xyoo 1970. Yog hnub kawg ntawm Vaj Qhia kev mus tsham RVA, yog lub ntim kub ntawm lub Cim Yug.
Vaj Qhia Paj Lug 6 tau muab ib lub ntim kub ua paj tshab rau RVA. Qhov paj tshab no tsis yog ua raws kev cai xwb, tab sis nws muaj lub ntsiab hauv kev ntseeg. Nws qhia lub xov tooj cua tias ; kev tshaj xo ntawm cov neeg ntseeg tseeb tiag ntawd, yog nyob hauv lub Cim Yug. Qhov no yog qhov tob tshaj plaws ntawm tib neeg kev sib koom siab nrog Tswv Ntuj. Lub ntim kub rais ua lub Cim tias ; kev tshaj xo tsis yog kev sib faib tej lus, tab sis yog kev muaj feem cuam koom nrog lub Koom Txoos.
RVA ib txoj hauj lwm yog txoj cai hauv lub xov tooj cua uas yug tus ntsuj plig tshaib nqhis hla ciam teb thiab tej kab lis kev cai. Txhua txhua sob lus, txhua txoj kev tuav xam, txhua cov xov xwm lub hauv paus yog los ntawm tib txoj kev nyiam kev hlub uas tawm los ntawm lub thaj txi Ntuj.
Lub suab ntawm tus tsis muaj suab.
Tsim nyog lub npe Veritas uas txhais tias ‘qhov tseeb’. RVA tsis yog tias raug tsim los tshaj kev ntseeg xwb, tab sis tseem txhawb nqa neeg lub meej mom thiab. Thaum mus tsham RVA Vaj Qhia tau hais txog tib neeg kev txhim kho ntawm cov neeg pluag, thiab kev tshaib nqhis txoj sia hauv ib tsoom neeg. Kev ntsia pom no tau yug RVA cov hauj lwm hauv kev txhawb nqa kev ncaj ncees, kev thaj yeeb thiab kev muaj vaj huam sib luag hauv lub caij muaj kev kub ntxhov. Qhov tseeb uas tawm los ntawm xov tooj cua txoj sab ntawd tsis yog qhov tuav tsis tau, tab sis nws yog qhov tuav tau. Nws cuam tshuam txog kev cawm tus ntsuj plig kom dim thiab hloov pauv zej zog.
Vim li no Vaj Qhia Paj Lug 6 thiaj xav txog yam uas nws hais meej tseeb nyob hauv Evangelii Nuntiandi tias : “Lub Koom Txoos yuav xav tias tau ua txhaum rau Tswv Ntuj, yog tias tsis siv cov twj tshaj xo rau zej zog uas npaj tseg kom tau tshaj lub Moo Zoo.”
Lub suab ntawm cov lus tshaj lub Moo Zoo tseem nrov.
Zim txwv no lub xov tooj cua Radio Veritas Asia tau mus deb dua yav tag los, vim pib nkag mus rau lub ntuj Digital uas loj dav. Nws kav tas cov tsev vas, cov xov xwm nyob Online thiab kev tsom tawm. Tab sis lub xov tooj cua cov hauj lwm tsis hloov. Qhov ntawd yog kev tshaj txog Yes Xus Pleev thiab txhim kho cov neeg nyob As Xias.
Vaj Qhia Paj Lug 6 tus ntsuj plig tseem coj cov hauj lwm ntawd. Kev mus tsham RVA hauv xyoo 1970 ntawm Vaj Qhia, ua kom pom tias lub Koom Txoos tsis tau ncaim ntawm kev vam meej txheej tshiab. Tab sis lub Koom Txoos muaj feem cuam, ntxuav thiab coj los siv nyob hauv lub Moo Zoo. Hais txog ntawm Vaj Qhia, mas kev tshaj xo tsis yog Technology xwb, nws tseem yog kev muaj feem cuam, yog kev nkag siab txog qhov uas Vaj Qhia Paj Lug 6 sawv nyob ntawm lub xov tooj cua Radio Veritas. Zeem tseeb txog qhov tseeb uas tseem nrov txog niaj hnub nyem no. Qhov ntawd lub xov tooj cua yog qhov chaw tshaj lub Moo Zoo. Kev tshaj tawm xov tooj cua txhua zaus yog kev tshaj tawm mus, txhua sob lus yog kev tau sib ntsib thiab txhua lo lus yog tus choj txuas tau nrog Tswv Ntuj thiab nws haiv neeg.
50 tawm xyoo tom qab, lub xov tooj cua Radio Veritas tseem ua kom pom txog yav tom ntej ntawm tus Vaj Qhia ntawd. Qhov ntawd yog lub suab uas muab rau cov tsis muaj suab, yog phooj ywg mus nrhiav qhov tseeb, yog tus txuag qhov tseeb thiab lub meej mom. Thiab yog tus tshaj kev cia siab rau ib tsoom neeg nyob As Xias.
Kwv tij Hmoob sawv daws ! Hnub no peb tham txog Vaj Qhia Paj Lug 6 thiab lub tshaj xo Radio Veritas Asia los xaus li no xwb. Thov Tswv Ntuj foom hmoov zoo rau nej nyob hauv lub Caij Hla no, kom nej muaj zog hla dhau tej kev phem uas tuaj raug nej nyob hauv niaj hnub. Lwm zaus peb mam sib ntsib dua, nej sawv daws nyob zoo !
