ZAJ NYEEM HNUB TIM 12 LUB 7 HLI 2026 HNUB CHIV LIS PIAM 15 CAIJ NYOB NRUAB XYOO COV LUS NYOB HAUV MAS TAIS NTAWV MOO ZOO (MT 13: 1-23)
Kwv tij zoo nyiam sawv daws, hnub no Tswv Ntuj Lo Lus piav txog zaj paj lug txog tus tseb nplej. Tus tseb nplej tawm mus tseb, cov noob poob txawb qhov chaws zoo xws li ntug kev, av pob zeb, av hauv cov pos, thiab thaj av zoo. Cov noob yuav hlob tuaj zoo, txi tau txiv zoo kuj vim tias yuav poob rau hauv thaj av twg.
Cov Lus hauv hnub no qhia peb tias Tswv Ntuj niaj hnub pub Ntuj Lo Lus kom yug peb txoj sia, Ntuj Lo Lus muaj hwj chim txhawb nqa peb lub siab, yug peb txoj sia, hloov tau peb lub tswv yim, tiam sis, kuj nyob ntawm peb thiab, yuav xav txais los tsis txais. Zoo xws li av, ntawm peb mas peb ua neej zoo li cas. Zoo li av pob zeb, los av hauv cov pos, los av zoo.
Huab Tais Yes Xus qhia meej kawg, tus txais cov noob poob ntawm ntug kev yog tus mloog Tswv Ntuj Lo Lus, tiam sis nws tsis to taub, tus Phem tuaj txog, nws txeeb yam uas Tswv Ntuj tseb hauv tus ntawd lub siab. Av pob zeb yog tus neeg uas thaum nws hnov Ntuj Lo Lus, nws zoo siab txais. Tab sis nws tsis muaj cag nyob hauv nws, thaum muaj kev txom nyem, los muaj kev raug luag hiam, kev ntxhov siab vim Lo Lus, vim nws los ntseeg Ntuj, ces nws ntog tam sis ntawd. Nws mus teev los hwm lwm yam. Av hauv cov pos, yog tus uas hnov Lo Lus, tab sis ntiaj teb kev txob xeeb, nyiaj txiag tej kev ntxias laum Lo Lus, ces Ntuj Lo Lus txi tsis tau txiv. Txawm tias nyiaj txiaj suab npe tseem ceeb dua Tswv Ntuj, Tswv Ntuj lo lus kuj tsis muaj qab hau dab tsi. Qhov kawg, mas av zoo yog tus uas hnov Lo Lus, ces nws to taub Lo Lus ntawd, nws ua raws li Tswv Ntuj Lo Lus, nws hlub luag tej, nyiam luag tej, khuv leej luag tej, zam txim luag tej, ces nws txi txiv, tsis hais txi ib puas lub, txi rau caum lub, lost xi peb caug lub. Tswv Ntuj Lo Lus yuav muaj hwj chim kuj nyob ntawm peb tus txais thiab.
Kwv tij sawv daws, nej hnov li no lawm, nej xav dab tsi? Peb soj ntsuam yus tus kheej, peb yog av dab tsi? Peb yuav ua li cas Tswv Ntuj Lo Lus thiaj txi tau txiv hauv peb lub neej? Thov peb xav tswv yim txog Lo Lus hnub no mog. Thov Tswv Ntuj foom koob hmoov rau peb txhua leej txhua tus.
Nyob zoo sawv daws.
