Hnub Chiv tim 13 lub 7 Hlis 2025
Lub Caij Nyob Nruab Xyoo
Lub lis piam 15
Lus Kas 10: 25-37
“Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam?”
Nyob zoo…
Cov kwv tij hmoob sawv daws, hauv lub Moo Zoo hnub no Huab Tais Yes Xus hais ncaj kha rau lo lus nug tias: “kuv yuav ua dab tsi thiaj tau txais txoj sia nyob mus li?” Huab Tais Yes Xus hais zaj paj lug piav txog nws lo lus teb.
Leej twg tsis xav tau txais txoj sia nyob mus li, leej twg tsis tau txais Ntuj lub Ceeb Tsheej los ua nws lub cuab tam. Ntawm kuv mas, kuv xav tau txais txoj sia nyob mus li, kuv xav tau txais Ntuj lub Ceeb Tsheej los ua kuv tug. Kuv kuj ntseeg tias nej sawv daws yeej xav tau txais thiab, puas yog? Ntawm no, mas thov caw peb ras txog Yes Xus lo lus teb. Nws tsis hais tias “cov tau txais lub cim ntxuav yuav tau txais txoj sia nyob mus li, nws tsis hais tias cov leej choj, cov muaj lub npe hu ua Chrstian yuav tau txais txoj sia nyob mus li. Tiam sis, tus yuav tau txais txoj sia nyob mus li yog “tus uas tau khuv leej tus raug mob” los sis “yog tus uas tau khuv leej cov txom nyem.”
Tus uas khuv leej cov txom nyem yog tus uas nyiam Huab Tais Tswv Ntuj thiab nyiam tus nyob ze nws ib yam li nws nyiam nws. Yog peb nyiam Tswv Ntuj tiag tiag, peb kuj yuav nyiam tus nyob ze peb, peb kuj yuav khuv leej tus nyob ib puag ncig peb, peb kuj yuav zam txim zam txhaum rau cov ua txhaum rau peb. Yog peb hais tias peb nyiam Tswv Ntuj, peb kuj yuav tsum ua kom tshwm sim tiag tiag. Peb tsis hais ntawm tus qhov ncauj xwb, tiam sis yus pab cov neeg txom nyem uas nyob ze yus, yus pov hwm lawv, yus ua zoo rau lawv zoo xws li tus Xas Mas Lias siab zoo hnub no. Huab Tais Yes Xus caw peb cov ntseeg sawv daws kom ua zoo li tus Xas Mas Lias siab zoo. “Koj mus, koj ua zoo li ntawd thiab mog”
