Hnub chiv tim 24 lub 11 hli ntuj 2024
Zam 18:33b-37
Lub lis piam 34th
Lub Caij Nyob Nruab Xyoo
“Yog koj hais tias kuv yog vaj. Yog vim qhov ntawd kuv thiaj yug los, thiab yog vim qhov ntawd kuv thiaj tuaj nyob hauv lub qab ntuj no: kuv tuaj ua tim khawv txog qhov tseeb.
Cov kwv tij zoo nyiam sawv daws, hnub no yog hnub chiv Hwm Yes Xus ua Vaj. Lub Koom Txoos Kas Tos Liv caw peb sawv daws ras txog Huab Tais Yes Xus yog tus vaj tiag tiag. Huab Tais Yes Xus yog tus vaj kav lub sim ceeb, kav txhua txhia haiv neeg. Hauv zaj txoj kev ntseeg, txhua hnub chiv peb tshaj tias: “nws yuav rov los txiav txim rau ib zeej tsoom neeg ciaj neeg tuag.” Peb ntseeg tias Huab Tais Yes Xus yuav rov qab los zaum tim 2. Nws yuav rov los ua vaj, li ntawd mas peb cov ntseeg thiaj li tab tom tos txais nws. Yog vim li no, peb thiaj ua hmoov tsuj xeeb hnub no, ua ntej peb yuav hla mus hauv lub caij tshiab uas yog lub caij Tos Huab Tais Yes Xus ib lub lis piam yav tom ntej.
Hauv Ntawv Moo Zoo hnub no, peb mloog Huab Tais Yes Xus teb Pis Las Tos tias nws tsis yog tus vaj ntawm lub ntiaj teb no, Yes Xus lub Ceeb Tsheej tsis nyob hauv lub qab ntuj no. Tab sis mas, kev ua vaj ntawm Yes Xus yog nyob saum Ntoo Cuam uas yog Ntoo Cuam ntawm kev nyiam kev hlub. Zoo li Huab Tais Yes Xus hais, “Yog koj hais tias kuv yog vaj. Yog vim qhov ntawd kuv thiaj yug los, thiab yog vim qhov ntawd kuv thiaj tuaj nyob hauv lub qab ntuj no: kuv tuaj ua tim khawv txog qhov tseeb.” Yes Xus lub hwj chim tsis yog lub hwj chim ntawm ntiaj teb. Yes Xus tsis muaj lub teb chaws kav, nws tsis muaj daim av, nws tsis muaj nyiaj txiag nyiaj kub, nws tsis muaj cov pej xeem, nws tsis muaj cov tub rog, nws tsis muaj lub hwj chim loj loj li ntawd. Tab sis mas, nws muaj lub hwj chim ntawm kev nyiam kev hlub. Tswv Ntuj Leej Tub yug los ua neeg, nws ua lub neej zoo li ib tug neeg me me, zoo li peb sawv daws. Nws tsis yug los nyob hauv tus vaj tsev neeg. Tab sis, nws yug los hauv Mab Liab thiab Yos Xes tsev neeg. Huab Tais Yes Xus yug los ua tus kws ntoo tus tub. Txhais tau tias Tswv Ntuj Leej Tub yug los nyob nruab nrab peb sawv daws. Ua cas Tswv Ntuj thiaj ua li ntawd? Lo lus teb yog tias “kuj vim tias Tswv Ntuj hlub tib neeg tshaj plaws.” Vim li ntawd, tus vaj no thiaj li kav lub sim ceeb vim kev nyiam kev hlub. Leej Ntshiab Paj Lug qhia tias Huab Tais Leej Txiv rho peb ntawm lub Ceeb Tsheej tsaus ntuj los. Nws coj peb los nyob hauv nws Leej Tub lub Ceeb Tsheej. Nyob hauv Leej Tub, peb tau txoj kev cawm, thiab txoj kev zam txhaum (Col 1:13-14). Tos peb tau txais kev cawm, kuj vim Tswv Ntuj hlub peb. Leej Ntshiab Paj Lug hais ntxiv tias “lub siab nyiam zam rau sawv daws, nws ntseeg sawv daws, nws tso siab rau sawv daws, nws ua siab ntev ris tas puas tsav yam nyuaj” (1cor. 13:7).
Hnub chiv hwm Yes Xus ua vaj pab peb nco tsoov tias tsis muaj tus vaj twg uas kav niaj teb no loj dua Yes Xus tus ua Vaj tseem ceeb, tus ua vaj tiag tiag. Tus ua vaj kav lub sim ceeb hauv txoj kev nyiam kev hlub. Tus vaj no yog tus cawm peb dim ntawm kev txhaum kev tsaus ntuj nti. Ntawm peb cov ntseeg mas, thaum peb txais lub cim ntxuav peb kuj tau txais kev ua vaj ntawm Yes Xus lub npe thiab. Vim tias ntawm kev txais lub cim ntxuav, peb txais kev ua vaj, kev ua yaj saub, thiab kev ua leej choj. Thov kom nej sawv daws nco tsoov cia. Qhov no yog txoj hauj lwm ntawm cov neeg ntseeg sawv daws, yog txoj hauj lwm ntawm kev sis nyiam sis hlub.
Thov kom tus Vaj Yes Xus pov hwm peb thiab foom hmoov zoo rau peb txhua leej txhua tus. Nyob zoo sawv daws
