Hnub Chiv tim 26 Lub 1 Hlis Ntuj 2025
Lub lis piam 3 hauv lub Caij Nyob Nruab Xyoo
Lus Kas 1:1-4; 4:14-21
“Hnub no, cov lus nyob hauv zaj Ntawv no tsheej xeeb raws li nej tau hnov.”
Cov kwv tij, lub Moo Zoo hauv hnub no, peb hnov Lus kas piav txog lub hom phiaj uas Lus Kas tau sau lub Moo Zoo cia rau nws tus phooj ywg zoo TesO s Fis Los, los Theophilus kom paub meej txog Huab Tais Yes Xus lub neej thiab nws txoj hauj lwm cawm neeg. Lus Kas tsis tau pom Yes Xus thaum nws tseem ua neeg nyob, tab sis mas Kus Las sau Ntawv Moo Zoo raws li cov tau pom xyeem ntawm qhov muag qhov uas Yes Xus qhia thiab ua. Huab Tais Yes Xus yog Tswv Ntuj Leej Tub tiag, nws raug kev txom nyem, luag muab nws tua, thiab nws sawv rov los muaj txoj sia tshiab tiag tiag. Muaj coob leej tau pom xyeem ntawm lawv qhov muag. Li ntawd, Kwv tij sawv daws, thov kom peb ntseeg kom ruaj txoj Huab Tais Yes Xus, yog nws ib leeg xwb thiaj cawm peb kom dim ntawm kev ntxias, kev phem, kev tsis zoo thiab kev tuag, yog nyob hauv nws tib leeg xwb peb thiaj muaj txoj sia nyob mus li. Thov kom peb ntseeg li ntawd tiag tiag mog!
Hauv lub Moo Zoo peb hnov ntxiv tias thaum Huab Tais Yes Xus yeej dab phem ntxias nyob teb chaws suab puam tas lawm ces, nws pib ua hauj lwm tshaj Ntuj Lus nyob Nkas Lis Lais, nws qhia tsoom sid hauv cov tsev txoos, tas sawv daws qhuas nws. Hauv lub tsev txoos, Huab Tais Yes Xus nyeem Tswv Ntuj Lo Lus thiab nthuav Tswv Ntuj Lo Lus rau cov neeg nyob ntawd. Lub ntsiab lus tseem ceeb yog hais tias “Hnub no, cov lus nyob hauv zaj Ntawv no tsheej xeeb raws li nej tau hnov.” Huab Tais Yes Xus hais li no kuj yog txhais tias nws yog tus Huab Tais Tswv Ntuj xa tuaj. “Huab Tais lub Tswv Yim nyob saum kuv, vim nws pleev roj los qee kuv. Nws xa kuv mus tshaj lub Moo Zoo rau cov pluag…, tsis tas li ntawd, Huab Tais Yes Xus ceeb toom tias “Huab Tais Tswv Ntuj kom kuv tshaj tias yog xyoo Huab Tais yuav pub txiaj ntsim.” Huab Tais Yes Xus ceeb toom lub xyoo ntshiab, lub xyoo uas cov ntseeg txog nws yuav tau txais Tswv Ntuj lub txiaj ntsim. Zoo xws li xyoo 2025 no uas Lub Koom Txoos ntshiab tau ceeb toom kom yog lub xyoo ntshiab uas peb yuav tau txais Tswv Ntuj lub txiaj ntsim. Xyoo ntshiab 2025 no yog lub xyoo uas peb yuav tsum muaj kev tso siab rau Tswv Ntuj. Peb yuav tsum tso siab rau Tswv Ntuj vim tias Tswv Ntuj “ua kom peb tsis muaj chaw khuv xim.” Kev tso siab ua kom peb tsis muaj chaw khuv xim. Li ntawd, thov kom peb muaj kev tso siab rau Tswv Ntuj ntxiv mus mog.
Xyoo ntshiab no, yog xyoo Huab Tais Tswv Ntuj yuav pub txiaj ntsim. Hauv zaj nyeem 2 Leej Ntshiab Paj Lug tau hais meej kawg txog cov txiaj ntsim Tswv Ntuj pub rau neeg lub tswv yim. Nws muab piv rau neeg lub cev hais tias: ib yam li neeg lub cev: neeg muaj tib lub cev xwb: tab sis muaj tes, muaj taw, muaj ntau yam: txhua yam yog lub cev, txawm tias muaj ntau ces, los yeej yog tib lub cev xwb. Nyob hauv Leej Pleev kuj zoo li ntawd. Ntawm nej mas nej yog Leej Pleev lub cev, nyias muaj nyias tug nyob hauv Leej Pleev. Nyob hauv lub Koom Txoos, Tswv Ntuj tsa tej tus ua Huav Paus Xa Lus, tej tus ua Yaj Saub, tej tus ua Xib Hwb, tej tus hu nkauj zoo, tej tus pab saib xyuas tsev teev Ntuj zoo, tej tus pab ua hauj lwm tshaj Ntuj lus zoo, thiab muaj ntau yam uas Tswv Ntuj pub kom peb ua tau zoo. Mas cov no tsis yog Tswv Ntuj lub txiaj ntsim lod?
Kwv tij zoo nyiam sawv daws, yog peb mloog Tswv Ntuj Lo Lus hauv hnub thiab txhua txhia hnub, mas zoo li Huab Tais Yes Xus hais “Hnub no, cov lus nyob hauv zaj Ntawv no tsheej xeeb raws li nej tau hnov.” Thov Huab Tais Tswv Ntuj nyob nrog nraim nej sawv daws mog!
Nyob zoo sawv daws!
