ZAJ NYEEM HNUB TIM 5 LUB 10 HLI 2025
HNUB CHIV LIS PIAM 27 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 17: 5-10)
Kwv tij zoo nyiam sawv daws, hnub no hauv lub Moo Zoo peb hnov muaj ib yam tseem ceeb xav kom peb coj mus twm txog hauv yus lub siab. Yam ntawd yog kev ntseeg. Hauv lub Moo Zoo, cov Hauv Paus Xa Lus thov kom Huab Tais Yes Xus “txhab kev ntseeg rau lawv.” Cov kwv tij, cov lus no muaj tseeb kawg vim rau qhov hais tias Tswv Ntuj tib leeg xwb thiaj txhab tau peb txoj kev ntseeg. Yus txhab yus txoj kev ntseeg tsis tau os. Vim tias kev ntseeg yog Tswv Ntuj lub txiaj ntsim rau peb. Tswv Ntuj ua rau peb paub txog nws lub hwj chim peb thiaj ntseeeg txog nws.
Ntawm txoj kev ntseeg mas, peb ho yuav ua li cas thiaj tau txais kev ntseeg? Lus Kas lub Moo Zoo hnub no muaj lo lus teb rau peb lawm. Peb yuav tsum teev Ntuj thiab thov Ntuj kom pub rau peb kom ntseeg ruaj khov. Tsis yog tias yus xav tau txais kev ntseeg ces yus ua zoo rau luag, yus pab lwm tus, yus nyiam phooj ywg tib neeg xwb. Yog ua li ntawd, mas peb kuj tsis txawv ntawm cov NGO, cov koom haum pab neeg, los cov tsis ntseeg Ntuj. Lawv tsis ntseeg Ntuj, ces lawv kuj ua zoo thiab, puas yog? Kev ntseeg tsis yog li ntawd nawj. Peb yuav tsum thov ntawm Tswv Ntuj. Niaj hnub peb yuav tsum thov kom Tswv Ntuj pub rau peb. Zoo li cov Hauv Paus Xa Lus, lawv kuj raws li Yes Xus qab, lawv mloog Yes Xus lo lus, tej zaus lawv ua zoo raws li Yes Xus ua, tiam sis muaj ntau zaus lawv tsis ntseeg txog Yes Xus. Nej nco puas tau thaum Pob Zeb nqes nkoj tso ko taw tsuj saum nplaim dej mus cuag Yes Xus, nws ntshai vim cua hlob, nws ntshai, tsis ntseeg txog Yes Xus, ces nws pib tog hauv dej. Tam sim ntawd, nws hu txog Huab Tais Yes Xus thov kom Huab Tais Yes Xus pab nws. Kev ntseeg kuj yog li ntawd. Peb yuav tsum thov ntawm Yes Xus kom pub rau peb, kom peb dim ntawm kev txhaum, kev ntxhov siab thiab kev tsis ntseeg. Txoj kev ntseeg yog Tswv Ntuj lub txiaj ntsim uas Tswv Ntuj pub dawb rau peb xwb, tiam sis peb yuav tsum nquag thov Nws kom txhab kev ntseeg rau peb tsis tu ncua. Yog peb muaj kev ntseeg, peb kuj tsis ntshai dab tsi.
Kwv tij sawv daws, muaj kev vam meej ntau yam ua rau tib neeg niaj hnub no tsis ntseeg Ntuj lawm. Ntawm lawv, kev ntseeg Ntuj yog yam uas cov laus cov tsis paub ntaub paub ntawv xwb thiaj ntseeg. Muaj li no xwb mas kuj vim tias lawv tsis thov Tswv Ntuj kom txhab lawv kev ntseeg. Lawv xav tias kev ntseeg yog tib neeg rab peev xwm xwb. Lub Moo Zoo hnub no qhia peb paub kom meej lawm. Peb tib neeg tsis muaj peev xwm dab tsi yog tias Tswv Ntuj tsis pub rau peb. Kev ntseeg kuj yog zoo li ntawd thiab nawb. Thov kom peb nquag thov Tswv Ntuj kom txhab kev ntseeg rau peb, kom peb muaj kev ntseeg ruaj khov zuj zus, kom peb ntseeg txog Tswv Ntuj tsis tu ncua.
Nyob zoo os sawv daws.
