Hnub Chiv tim 8 lub 6 Hlis 2025
Hnub nyoog Leej Ntuj Plig Nqes Los
Zam 14: 15-16, 23b-25
“Leej Txiv yuav xa Leej Ntuj Plig Ntshiab tuaj vim kuv lub npe, nws yuav qhia tas ib puas tsav yam rau nej, thiab nws yuav pab nej rov nco txog tas txhua yam uas kuv tau hais rau nej.”
Nyob zoo…
Cov kwv tij hmoob, hnub no peb ua hmoov hwm Leej Ntuj Plig Nqes Los. Thaum Huab Tais Yes Xus rov mus saum ntuj lawm, ces Leej Txiv kuj xa Leej Ntuj Plig Ntshiab tuaj vim Yes Xus lub npe kom hauv lub Koom Txoos, kom saib xyuas lub Koom Txoos, kom coj lub Koom Txoos. Ntawm Huab Tais Yes Xus cov lus qhia uas nws tau hais tseg, mas muaj ntau ntau yam uas cov Hauv Paus Xa Lus thiab lwm cov thwj tim tsis nkag siab. Huab Tais Yes Xus cog lus rau lawv tias Leej Ntuj Plig Ntshiab yuav pab kom lub Koom Txoos, kom cov thwj tim, kom cov ntseeg nco txog Yes Xus lo lus qhia thiab nkag siab nws cov lus uas nws tau hais tseg. Ces, sawv daws thiaj ua raws tau. Li ntawd, lub Koom Txoos thiab cov ntseeg sawv daws yuav tsum muab siab mloog Leej Ntuj Plig Ntshiab lub suab kom zoo mog. Tsis tas li ntawd, hnub nyoog Leej Ntuj Plig nqes los tseem yog hnub tsuj xeeb lub Koom Txoos tau txhim los. Thaum hais txog “lub Koom Txoos” los yog “lub Koom Txoos Kav Tos Liv” txhais tau luv luv tias “cov ntseeg txog Huab Tais Yes Xus uas muaj tus vaj qhia thiab cov tswv qhia yog tus thawj coj txoj kev ntseeg.”
Lub Koom Txoos Kav Tos Liv ntseeg thiab cia siab rau Leej Ntuj Plig Ntshiab yog tus ua hauj lwm nyob hauv lub Koom Txoos, yog tus coj lub Koom Txoos kom taug kev nyob hauv Tswv Ntuj txoj kev. Thaum peb rov saib ntawm lub Koom Txoos liv xwm, peb yuav paub tias Leej Ntuj Plig tau coj lub koom txoos kom hloov ntau yam tsis zoo, ntau yam uas tsis tsim nyog. Leej Ntuj Plig coj lub Koom Txoos kom tso qhov qub qhov tsis zoo pov tseg, thiab qhib lub koom txoos lub siab kom txais qhov tshiab, qhov zoo.
Leej Ntshiab Paj Lug sau tseg tias, “Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb. Muaj ntau txoj kab xwm, tab sis yog tuaj ntawm tib tug Huab Tais tuaj. Muaj ntau txoj hauj lwm, tab sis yog tib tug Tswv Ntuj ua cov hauj lwm ntawd nyob hauv txhua leej tib neeg. (1KLN 12:4-6). Hauv lub Koom Txoos Kav Tos Liv, tsis yog tus vaj qhia, cov tswv qhia, cov txiv plig, cov leej phauj leej tij los cov xib hwb xwb yog cov ua hauj lwm txhawb nqa lub Koom Txoos, tsis kav Leej Ntuj Plig Ntshiab pub lub txiaj ntsim rau cov ntseeg sawv daws kom ua hauj lwm pab txhawb nqa lub Koom Txoos thiab. Nyob hauv lub Koom Txoos yuav tsum muaj kev sib nyiam sib hlub xwb, vim tias qhov no yog leej Ntuj Plig lub txiv zoo. Leej Ntshiab Paj Lug hais tias “Leej twg mloog Leej Ntuj Plig, mas nws yuav txi tej lub txiv zoo li no; nws nyiam Ntuj, nws zoo siab ua neeg, nws nyob kaj lug, nws ua siab ntev, nws xyiv fab pab luag tej, nws ua siab zoo rau luag, nws tso siab rau luag, nws txawj hlub luag tej, nws txawj kav nws lub cev zoo.” (NLT 5:22-23).
Tsis tas li ntawd, kwv tij zoo nyiam sawv daws, Huab Tais Yes Xus tseem qhia kom peb qhib siab tos txais Leej Ntuj Plig Ntshiab uas Leej Txiv yuav xa tuaj. Leej Ntuj Plig yuav tshoj peb lub siab, yuav ua kom peb nkag siab Tswv Ntuj Lo Lus. Nws yuav qhia kom peb to tau ib puas tsav yam uas Huab Tais Yes Xus tau qhia peb ntawd. Leej Ntuj Plig Ntshiab coj lub Koom Txoos Kas Tos Liv thiab cov neeg ntseeg sawv daws. Leej Ntuj Plig Ntshiab coj tus vaj qhia thiab txiv tswv qhia kom coj lub Koom Txoos taug kev hauv Tswv Ntuj txoj kev. Li ntawd, thov kom peb tso siab rau peb tus vaj qhia, peb tus tswv qhia, cov txiv plig, cov xib hwb, lawv coj peb hauv txoj kev ntseeg, kom peb tsis ntseeg yuam kev, kom peb tsis mus yuam kev. Leej Ntuj Plig Ntshiab yuav ua kom peb ua ib lub Koom Txoos, tsis yog ob peb lub koom txoos.
Kwv tij zoo nyiam sawv daws, txhob tsis nco qab Yes Xus lo lus, sib nyiam sib hlub xws li Yes Xus nyiam peb.
