Hnub Chiv Tim 9 Lub 3 Hlis Ntuj 2025
Lub Caij Plaub Caug 1
Lus Kas. 4:1-13
“Leej Ntuj Plig coj Yes Xus mus nyob teb chaws suab puam plaub caug hnub, dab phem ntxias Yes Xus.”
Nyob zoo…
Kwv tij zoo nyiam sawv daws, hnub no yog thawj hnub chiv hauv lub Caij Plaub Caug. Lub Koom Txoos Kas Tos Liv caw peb kom saib ntawm yus tus kheej, saib ntawm yus lub neej ntseeg Ntuj. Lub sij hawm no, lub Koom Txoos Kas Tos Liv tseem caw peb kom teev Ntuj tsis tu ncua, pub dawb rau luag pab luag, thiab yoo mov yoo tshaib mus txog 40 hnub no tiav tas lawm, ces peb thiaj ua hmoov tsuj xeeb Yes Xus sawv rov qab los muaj txoj sia tshiab.
Kwv tij sawv daws, tsis yog peb ua peb xwb, ib yam li peb hnov hauv Lub Moo Zoo hnub no, Huab Tais Yes Xus nws kuj yoo mov thiab teev Ntuj tsis tseg thiab. Ua ntej Huab Tais Yes Xus yuav ua hauj tseem ceeb, uas yog txoj hauj lwm tshaj lub Moo Zoo, Leej Ntuj Plig Ntshiab coj Yes Xus mus nyob teb chaws suab puam plaub caug hnub. Teb chaws suab puam yog thaj chaws uas tsis muaj neeg nyob. Tiam sim, hauv Ntawv Ntshiab, tshwj xeeb yog Ntawv Cog Lus Qub, mas teb chaws suab puam yog qhov chaws uas Huab Tais Tswv Ntuj ntsib Nws tsoom need Isarael, Tswv Ntuj nrog lawv nyob, Tswv Ntuj nrog lawv tham, thiab Tswv Ntuj cawm lawv kom dim ntawm kev ua qhev.
Nyob teb chaws suab puam no, Huab Tais Yes Xus raug dab phem ntxias. Huab Tais Yes Xus tsis noj dab tsi li, thaum dhau plaub caug hnub lawd, nws tshaib plab tshaj plaws. Ntawm no, ntawm kev tshaib kev nqhis mas, dab phem ntxias nws kom ua raws li nws lub cev nqaij dais tawv ntshaw. Tsis tas li ntawd, dab phem ntxias Yes Xus kom qhia rau sawv daws paub tias nws yog leej twg. “Saib, koj yog Tswv Ntuj Leej Tub no, koj hais kom lub pob zeb no txia ua mov,” “Saib, koj yog Tswv Ntuj Leej Tub no, koj dhia saum no lawv puag hauv, Ntuj yuav txib nws cov tshiab kom lawv zov koj.” Dab Phem ntxias Huab Tais Yes Xus hnyav kawg, tab sis, mas Huab Tais Yes Xus ua siab loj, qhov kawg, mas Nws yeej dab phem ntxias.
Kwv tij hmoob sawv daws, peb ntseeg txog Yes Xus, peb xav ua raws li Nws cov lus qhia thiab peb xav ua raws li qhov nws twb ua, vim nws yog peb tus piv ntxwv. Plaub hnub hauv lub caij Plaub Caub no, peb kuj yuav ua raws li Huab Tais Yes Xus. Thaum peb saib ntawm yus tus kheej mas, peb yuav paub tias tiag tiag mas dab tsi tseem ceeb tshaj plaws rau peb tus tsuj plig. Kuv ntseeg tias peb ntshaw ntau ntau yam rau peb lub cev. Peb ntshaw mov ntshaw dej kom yug lub cev kom tsau, yug lub plab kom txhob nqhis, peb ntshaw mov qab qab los noj kom peb txaus siab, peb ntshaw tshuaj zoo zoo kom kho peb lub cev, peb ntshaw haus cawv haus npias kom muaj kev lom zem, peb tseem ntshaw tshuaj pleev ib ce los tshuaj ua kom peb zoo nkauj zoo nraug, zoo saib thiab peb ntshaw ntau ntau yam. Tab sis mas, lub caij no yog lub sij hawm uas peb yuav nrog Huab Tais Yes Xus teev Ntuj, yoo mov hauv teb chaws suab puam 40 hnub, kom peb txo qhov uas tsis tseem ceeb, qhov txhaum, qhov tsis zoo, kom peb tig los yuav lub siab tshiab, nrog Huab Tais Yes Xus yoo mov kom dhau 40 hnub. Thaum dhau 40 hnub lawv, peb yuav paub tias peb txoj kev ntseeg muaj nuj nqis, muaj qab hau tiag tiag, peb txoj kev ntseeg kuj yuav loj hlob tuaj.
