Lo lus hauv lub neej lub 7 hlis 2025

Lo lus hauv lub neej, lub 7 hli 2025. (Word of Life of July 2025)

 

Kwv tij Hmoob sawv daws ! Hnub no peb yuav muab ib lo lus nyob hauv Lus Kas ntawv Moo Zoo los tham qhia nej. Nws yog lo lus no :

“Tab sis ib tug Xas Mas Lias mus tawm rooj tuaj txog ze tus raug mob, nws pom tus neeg mob, nws hlub.” (LK 10 : 33)

Martine tab tom caij tsheb nqaj hlau hauv qab npoo av, nyob hauv ib lub nroog loj nyob Aws Los Pas teb. Nws xam nyob ib ncig, nws pom txhua tus neeg tab tom nyo hau rau nyias lub xov tooj sib txuas nrog lwm tus. Tab sis nws zaum ib leeg thiab tsis paub leej twg nyob ib ncig li. Nws xav tias :

“Kuv tsis tuaj yeem ntsia leej twg tau li lod?”

Nov yog kev ntsia pom xwm yeem ntawm tib neeg. Tshwj xeeb tshaj yog nyob hauv tej pab neeg coob coob thiab muaj txhua yam twj, tsis kav zoo li tsis muaj dab tsi kiag.

Ntawm nws tus kheej tsis yog li ntawd. Lub Moo Zoo kheev kheev hu peb kom tig rov mus cuag lub Cim thiab txhim kho. Qhov ntawd yog lub neej muaj hwj chim uas yuav ua kom txhua yam tshiab tuaj.

Nyob hauv ntawv Moo Zoo, Yes Xus tau nrog ib tug Kws Lij Choj tham ntev loo. Nws nug Yes Xus tias : “Xib Hwb, kuv yuav ua dab tsi thiaj tau txais txoj sia nyob mus li los ua kuv lub cuab tam ?” Nov yog lo lus nug kom tau cov lus teb.

Yes Xus thiaj hais lo lus qhia loj tshaj uas peb paub zoo, yog zaj hais txog tus Xas Mas Lias siab zoo, tus Leej Choj thiab tus Les Vis. Tus Leej Choj thiab tus Les Vis nkawd yog 2 tug neeg tseem ceeb nyob hauv txheej neeg ntawd. Muaj ib tug txiv neej raug tub sab ntaus thiab raug mob nyob ntawm tug kev. Tus Leej Choj thiab tus Les Vis pom, tab sis nkawd puav leej lug kev mus lawm.

“Tab sis ib tug Xas Mas Lias mus tawm rooj tuaj txog ze tus raug mob, nws pom tus neeg mob, nws hlub.” Tus Kws Lij Choj no nws paub tias Tswv Ntuj lo lus yog hlub tus txheeb ze thiab Yes Xus yog tus piv txwv. Tsis yog phooj ywg koom kev ntseeg, tab sis yog pej kum neeg. Tus uas luag tej saib tias nws tsis ua raws txoj cai thiab yog yeeb ncuab. Tus Xas Mas Lias pom tus neeg raug mob, nws hlub. Qhov no yog qhov ua tawm tob tob nyob hauv tib neeg lub siab. Vim li no nws thiaj nres tsis mus kev ntxiv. Nws txav mus ze tus neeg mob thiab hliv tshuaj pleev tus neeg mob. Yes Xus paub tias tib neeg yeej puav leej raug mob los ntawm kev txhaum. Qhov tseeb tiag uas Yes Xus tuaj hauv lub ntiaj teb no, kuj yog vim ntiaj neeg cov txhaum. Kom tau kho neeg lub siab nyob hauv Tswv Ntuj kev khuv leej thiab kev zam txhaum. Kom neeg tau nyob ze lwm tus thiab faib nws lub neej rau lwm tus. Yog tias peb xav kawm kom paub txog kev khuv leej xws li Leej Txiv nyob saum ntuj, kom tau ua tus neeg zoo tiav log xws li Tswv Ntuj ua, mas peb yuav tsum saib Yes Xus tus ua tawm Tswv Ntuj kev nyiam kev hlub txhij txhua. Kev nyiam kev hlub yog qhov muaj nqis rau txhua yam thiab ua tawm nyob hauv kev khuv leej. Kev khuv leej pab kom peb txawj ntsia pom txog lwm tus hauv lwm txoj kev tshiab, tsis hais tus uas peb nyob nrog txhua hnub hauv peb tsev neeg, hauv tsev kawm ntawv, hauv tej chaw ua hauj lwm. Kev khuv leej pab kom peb tsis txiav txim, tab sis kom peb zam peb tej kev txhaum, tab txawm peb hnov qab mus lawm kuj xij.     

Lo lus xaus kawg yog lo lus caw meej tseeb. “Nej mus, nej ua ib yam li kuv ua rau nej.”

Nov yog qhov uas Yes Xus hais rau txhua tus neeg uas zoo siab mloog nws cov lus. Yes Xus kom peb ua tus txheeb ze, txav mus ze thiab tuav kiag. Tuav tus uas peb ntsib nyob hauv peb lub neej niaj hnub lub qhov txhab, kom tau ua tus neeg nyob ze nrog lwm tus raws li lub Moo Zoo qhia.

Ua ntej peb yuav thov Yes Xus pab kho peb txoj kev dig muag, uas yog tshwm sim los ntawm peb txoj kev muab hlob thiab tsis quav ntsej. Nws yog qhov khuam tsis pub peb pom txog lwm yam yog dhau ntawm peb tus kheej lawm. Tsuas muaj Yes Xus tib txoj kev coj xwb, uas yuav qhib peb lub siab thiab tos txais kev nyiam kev hlub uas muaj kev khuv leej nyob puv nkaus. Peb yuav kawm kom paub txog kev khuv leej ntawm tus Xas Mas Lias. Kev khuv leej uas ua kom nws muab tus kheej mus pab lwm tus. Kom peb xyaum tshais thawj kauj ruam pub lwm tus. Muab siab rau mloog thiab lees txais lwm tus txoj kev mob los ua yus tug. Ua li no kom peb txhob txiav txim rau lwm tus thiab tsis txhob xav tias peb tab tom nkim sij hawm.

Nov yog kev paub los ntawm ib tug tub hluas neeg Kos Lim :

“Kuv maj mam nug txog ib tug tub hluas uas nws tsis yog koom tib txoj kev cai nrog kuv, thiab kuv tsis paub nws li. Tab txawm kuv tsis paub tias yuav ua li cas los yog mus nrhiav nws li cas, tsis kav kuv kuj xav sim. Kuv xav hais txog kev pab, vim kuv saib yog zoo li kuv tab tom kho kuv lub qhov txhab.”

Lub Moo Zoo no muab tus yawm sij tseem ceeb rau peb, kom peb txawj nco txog kev ua neeg ib yam li peb. Yog qhov qhia txog Tswv Ntuj lub npe. Lub Moo Zoo ua kom peb muaj peev xwm tshais ruam hla tej teeb meem ntawm peb lub cev thiab tej kab lis kev cai uas raug sib faib. Yuav ua lub neej nyob sib ze nrog txhua tus neeg uas peb ntsib. Qhov ua li no pab kom peb qhib txoj kev nqaim mus rau txoj kev dav nyob hauv peb, kom mus txog txhua tus uas yog tus cag hauv cov neeg uas sib koom ua ke thiab nto koob meej ntxiv mus.

Sau los ntawm Letizia Magri thiab pab neeg lo lus hauv lub neej.

Kwv tij Hmoob, yog peb xav xyaum ua li tus Xas Mas Lias siab zoo, mas thaum peb pom lwm tus raug teeb meem los yog muaj mob. Peb yuav cev tes mus pab luag ib yam li peb pab peb tus kheej. Yes Xus hais tias kom peb ua tus txheeb ze, txav mus ze thiab tuav kiag. Vim tus txheeb ze yog tus neeg khuv leej luag tej thiab pab luag tej. 

Thov nej khaws cov lus no tseg mog !