Muab koj lub neej los koom nrog Yes Xus (Join your life with Christ)
Kuv xav faib qee yam hais txog kev tsuj xeeb Yes Xus Pleev lub Cev uas zoo heev. Txhua xyoo peb muaj kev ua hmoov tsuj xeeb Yes Xus lub Cev. Li ntawd, thiaj muaj qhov txawv txav nyob hauv cov txuj kev ntseeg 2 yam ua ke. Yog Yes Xus lub Cev thiab Yes Xus cov Ntshav. Kuv xav tias lub Koom Txoos ua yog lawm, uas yuam kom peb rov los rau cov kab ke tseeb no txhua xyoo. Vim qee yam hauv lub siab ntawm txoj sia fab ntsuj plig yuav nyob ntawm no. Peb tau tuav xam txog qhov zais ntshis ntawm Yes Xus lub Cev thiab cov Ntshav lawm. Kuv xav pib nyob hauv kev nyeem Kos Lis Nthos tsab ib. Nws yog cov lus luv luv, tab sis muaj qhov tseem ceeb ntawm cov txuj kev ntseeg nyob puv nkaus. Tam sim no yog hais txog tus Hauv Paus Xa Lus Paj Lug. Li ntawd, peb tab tom hais txog zaj no txij qhov pib los. Paj Lug sau zaj no kwv yees xyoo 50 nyob hauv thawj tiam neeg. Peb nyob hauv ntu 20 xyoo los ntau tshaj ntawd ntawm Yes Xus tuag thiab sawv rov qab los. Paj Lug tau ntsib Yes Xus tus sawv rov los tab tom qhia txog qee yam uas tseem ceeb heev.
Nov yog qhov Paj Lug hais : “Ua ntej no, kuv tau txais los ntawm Tswv Ntuj, ces kuv muab rau nej thiab.” Nws yog qhov ntxim siab heev, vim Paj Lug yuav hais txog kev tau txais qee yam ntawm lwm tus Hauv Paus Xa Lus. Yam nws tau txais, nws hais tias yog tau txais los ntawm Tswv Ntuj. Hmo Yes Xus raug luag muag, Yes Xus tuav lub ncuav mov thiab nws ua Ntuj tsaug. Nws lov lub ncuav mov thiab nws hais tias : “Nej noj, nov yog kuv lub Cev raug puas kom tau pab nej.” Noj hmo tas, Yes Xus kuj tuav lub ntim thiab nws hais tias : “Nej haus, nov yog kuv cov Ntshav cog lus tshiab. Nej yuav ua li no kom tau nco txog kuv.” Yog lo lus uas peb hnov kam nyob hauv lub Cim Yug. Tam sim no peb yuav nco tias leej twg yog tus hais, thiab yam no yog qhov qub npaum cas nyob hauv cov kab ke? Paj Lug tab tom qhia qee yam uas nws xav tias tseem ceeb heev nyob hauv tej kab ke txij thaum pib los. Dhau no lawm, peb yuav nco tias leej twg yog tus hais nyob ntawm no?
Tus Hauv Paus Xa Lus Paj Lug yav tag los nws yog Xauv ntawm lub nroog Tas Xis. Nws tuaj rau Yes Lus Xas Les kom tau kawm txuj ntawm Nkas Mas Lias, vim Nkas Mas Lias yog ib tug xib hwb loj tshaj nyob rau lub caij ntawd. Xauv tau txais kev coj noj coj ua los ntawm nws haiv neeg. Nws tau nyob thiab tau ua hauj lwm hauv ib qho chaw twg nyob ze lub tuam tsev teev Ntuj nyob Yes Lus Xas Les uas muaj neeg tuaj teev Ntuj tas niaj tas xyoo. Paj Lug paub lub ntiaj teb zoo, paub Ntawv Ntshiab, paub cov kab ke thiab coj raws Yus Das kev ntseeg. Nov yog tus neeg hais tias : “Kuv tau txais los ntawm Tswv Ntuj.” Nov yog kuv lub cev uas yuav muab rau nej. Tam sim no koj yog neeg Yus Das uas paub tej kab ke hauv tsev teev Ntuj, thiab muaj kev siv xeem lus hais txog lub cev uas muab txi. Nws tab tom xav txog dab tsi ? Nws xav txog kev txi Ntuj nyob hauv tsev teev Ntuj thaum muaj neeg coj cov tsiaj tuaj cev ua txim. Tej zaum yog cov txim ua Tswv Ntuj tsaug, tej zaum yog cov txim ntxuav kev txhaum, los tej zaum yog cov txim them txim txhaum. Lawv coj cov tsiaj mus hauv tsev teev Ntuj, coj mus cev rau cov Yaj Saub. Cov tsiaj ntawd yuav raug tua thiab cug cov ntshav rau hauv ib lub tais. Dhau ntawd tus tsiaj yuav raug hlawv nyob hauv cov kab ke cheb ntxuav, los yog tus tsiaj raug hlawv qee yam thiab muab cov seem coj mus ua noj. Nws nyob ntawm kev txi seb yuav siv yam twg. Ntawd yog lub ntuj uas Paj Lug los xib hwb Xauv nyob. Cov xwm txheej no tshwm sim tas mus li. Lawv hais tias koj tuaj yeem hnov lub tsev teev Ntuj tus ntxhiab ua ntej koj yuav ntsia pom. Vim tus ntxhiab ntawd zoo li ib lub tsev tua tsiaj thiab ua noj nyob ntawd. Kuv xav tias kev txi tsiaj yog cov ntshav yug lub tsev teev Ntuj.
Nws tab tom xav txog yam Yes Xus ua nyob hauv thawj hmo ua ntej Yes Xus yuav tuag. Tom qab noj hmo tas, Yes Xus tuav lub ntim, nws hais tias : “Nov yog kuv cov Ntshav cog lus tshiab.” Cov ntshav ntawm tus tsiaj raug hliv tawm los. Nws yuav muaj dab tsi tshwm sim nyob ntawd? Tab sis lo lus cog loj thiab cov His Xas Lais tab tom tau txais kev txuas hnub nyoog. Sim xav txog thaum nrog Has Nplas Has sib cog lus, nrog Nos Hes cog lus, nrog Mais Xes cog lus thiab nrog Das Vis cog lus.
Tas txhua yam no yog nyob hauv kev muab ntshav los txi Ntuj. Lub tswv yim ntawd meej tseeb kawg, vim ntshav yog qhov sawv cev ntawm ib tug neeg. Cov ntshav uas yog kuv txoj sia. Tswv Ntuj, kuv tab tom muab txi rau koj thiab kuv tab tom qhia tias yam uas tshwm sim rau tus tsiaj no, nws yog kev ncaj ncees uas tsim nyog tshwm sim nyob hauv kuv. Kuv tab tom nrhiav tus tsiaj no, vim nws yog qhov sawv cev ntawm kuv txoj kev txhaum. Thaum tus tsiaj no raug tua, zoo li kuv tab tom raug rau txim hauv kuv cov txhaum. Ntshav thiab kuv txoj sia raug hliv tawm los. Nyob hauv tej yam loj ntawd, cov lus cog rau haiv His Xas Las tab tom raug tshaj tawm thiab maj mam txuas ntxiv. Ntawd yog yam nyob hauv cov His Xas Lais lub siab uas nkag mus hauv tsev teev Ntuj. Tam sim no kuv xav tshais ib kauj ruam ntxiv, uas yog xav txog cov duab no. Xauv paub zoo tias Yes Xus ua dab tsi hauv hnub ntshiab. Yam Kipur uas yog hnub them txim txhaum. Tus Yaj Saub yuav chaws mus hauv kem ntshiab thiab txi Ntuj nyob ntawd. Nws yuav muab cov ntshav tsiaj pleev kom thoob kem ntshiab. Ntawd yog lub tswv yim qub qub uas xav tias tib neeg cov ntshav yuav ntws los ntawm lawv cov txhaum. Tab sis nws kuj muab tais los cug cov ntshav ntawd, ces nws tawm los ntawm kem ntshiab cov ntaub thaiv. Nws muab cov ntshav ntov rau saum ib tsoom neeg. Peb yuav nco tias nyob hauv ntawv Kev Tsiv, Mais Xes kuj ua li ntawd. Nws muab ntsha pleev lub thaj txi Ntuj thiab pleev cov neeg. Qhov ua li ntawd, txhais tias ib tsoom neeg tab tom hliv lawv cov ntshav. Tswv Ntuj kuj ib yam. Tswv Ntuj tab tom muab nws txoj sia txi hauv kev nyiam kev hlub thiab kev zam txim txhaum rau nws haiv neeg.
Tag nrho nov tab txawm peb cov neeg ntseeg Kav Tos Liv kiag, peb kuj siv xeem lus hauv tsev teev Ntuj, kev cev tus kheej, lub thaj txi Ntuj thiab ua Yaj Saub. Tab sis qhov tseeb tiag nov yog lub ntiaj teb uas tawm los ntawm kev muab tsiaj txi Ntuj, kev txi lub cev, kev hliv ntshav tsiaj ua qhov sawv cev kev txhaum uas tawm los yog ntshav. Kev hliv Tswv Ntuj cov Ntshav rau saum ib tsoom neeg. Tas nrho no tshwm sim nyob hauv Paj Lug nruab siab, thaum nws rov xav txog yam uas Yes Xus ua.
Tam sim no peb yuav los saib txog Yes Xus xwb, vim no yog kuv lub cev uas muab cev rau koj. Nov yog kuv cov ntshav uas ntws los rau koj. Yam uas tshwm sim nyob saum lub thaj txi Ntuj thiab saum Ntoo Cuam yog dab tsi?
Tej zaum koj yuav xav tias : “Nws yog kev tua neeg ntawm cov Los Mas.”
Yam uas tshwm sim nyob saum Ntoo Cuam yog dab tsi? Yes Xus ris lub ntiaj teb neeg cov txhaum xws li tus yaj txi Ntuj. Tus me nyuam yaj nyob saum lub thaj txi Ntuj yog tus ntshiab huv. Tab sis nws rais ua tus ris tas ntiaj teb neeg cov txhaum.
Li ntawd, Yes Xus thiaj txaus siab ua tus me nyuam yaj uas raug muab txi Ntuj them txim txhaum. Yes Xus rais ua tus theej lub txim txhaum ntawd nyob ntawm Tswv Ntuj xub ntiag.
Thov txhob nkag siab yuam kev txog zaj no. Txhob nyeem yam no tias Tswv Ntuj yog leej txiv uas tsis muaj peev xwm thiab xav pom nws tus tub txoj kev tuag ua ntej nws lub siab nqig. Qhov ntawd yog kev ua kom npau taws nyob tas hauv zaj no. Tab sis yuav saib Yes Xus saum Ntoo Cuam uas yog muab nws lub Cev thiab cov Ntshav los txi Ntuj xws li tus me nyuam yaj. Zam Ntxuav Plig thiaj hu nws ua Tswv Ntuj tus yaj. Tus yaj uas ntxuav tas ntiaj teb neeg cov txhaum. Tsim nyog peb yuav ntsia pom Yes Xus txoj kev txom nyem tias dab tsi tsim nyog tshwm sim rau peb raws txoj cai. Ntawd yog lub ntsiab lus, ntawd yog qhov laij thawj tias vim li cas txhua zaus hais txog txoj kev tuag no, peb thiaj muab peb txoj sia los koom nrog txoj kev tuag ntawd?
Peb tab tom hais tias : “Tswv Ntuj, hauv koj cov ntshav uas ntws tawm los, kuv pom yam uas tsim nyog tshwm sim rau kuv raws txoj cai. Kuv pom kuv tej kev txhaum ntws tawm los raug rau txim thiab lees txim.
Ib qho ntxiv, Yes Xus dai saum Ntoo Cuam yog tus me nyuam yaj txi Ntuj daws peb cov txhaum. Tab sis tam sim no cov Ntshav uas ntws tawm los yog cov Ntshav txi nyob hauv hnub Yam Kipur, los yog zam txim txhaum ib yam. Thaum tus Yaj Saub tawm los ntawm daim ntaub thaiv thiab nws muab cov ntshav ntov rau sawv daws, ntawd yog cov ntshav muaj txoj sia ntawm Tswv Ntuj hauv kev zam txhaum thiab kev khuv leej rau lub ntiaj teb neeg uas muaj kev txhaum nyob puv nkaus.
Tam sim no peb rov mus rau tej hwj huam yees ntxwv uas peb xav paub. Thaum Yes Xus tuag, mas daim ntaub hauv lub tsev teev Ntuj ntuag phua rhe ua ob sab, txij saud los rau hauv. Ntawd yog daim ntaub thaiv. Lub tswv yim no tsis yog txhais tias tus Yaj Saub nyob hauv neeg lub cev, tab sis yog Yes Xus ua Yaj Saub tseeb tiag. Nws tawm los ntawm qhov ntshiab huv thiab ntov nws cov ntshav muaj txoj sia thiab nws kev khuv leej. Kev zam txhaum ntawm nws, yog muab rau peb cov uas yog neeg txhaum txhua tus. Qhov ntawd yog qhov tshwm sim nyob saum Ntoo Cuam.
Yam uas Yes Xus ua thawj hmo ua ntej nws yuav tuag, Paj Lug tab tom hais tias yog kev cia siab hauv lub caij nyoog. Yes Xus lub Cev thiab cov Ntshav yog qhov peb tsuj xeeb. Nws lub Cev thiab cov Ntshav uas tshwm sim rau peb nyob hauv lub thaj txi Ntuj txhua zaus, yog peb kev muaj feem cuam nyob hauv lub caij nyoog loj, hauv kev lees peb cov txhaum thiab tau txais kev zam txhaum ntawm Tswv Ntuj.
Qhov kawg no kuv xav hais luv luv txog Ntawv Moo Zoo. Tab txawm tias lub Koom Txoos ua tau zoo kuj xij, vim lub Koom Txoos tau ua kom xeem lus txi Ntuj raws li Paj Lug rau sawv daws. Tab sis hais txog kev nyeem Ntawv Moo Zoo, peb yuav tau nyeem zaj hais txog cov ncuav mov thiab ntses qhuav raws li Lus Kas ntawv Moo Zoo. Li ntawd, peb paub zoo txog zaj no. Tsoom neeg coob coob tuaj sib sau ua ke, lawv tshaib plab lawv tsis muaj txhiam xws noj. Peb muaj dab tsi? Yes Xus hais tias : “Qhia kuv seb nej muaj dab tsi?” Peb tsuas muaj 5 lub ncuav mov thiab 2 tug ntses qhuav xwb. Yes Xus hais tias : “Muab los rau kuv.” Ces Yes Xus ua hwj huam yees ntxwv txaus rau tsoom sid noj. Kuv nyuam qhuav hais txog zaj no 2-3 fiab tag los. Qee yam txim txi Ntuj nyob hauv tsev teev Ntuj, yog kev tua cheb ntxuav haiv neeg.
Li ntawd, nej thiaj tua tsiaj thiab ntshav yuav ntws tawm los. Tus tsiaj yuav raug hlawv ua hluav tas, tab sis tseem tshuav lwm yam txim txi Ntuj thiab.
Peb hais txog Yes Xus lub Cev thiab Yes Xus cov Ntshav tau li cas? Nws yog qhov tseeb ntawm kev muab tus kheej los txi Ntuj. Thiab peb tseem hais txog lub thaj txi Ntuj tias yog pluas mov loj uas peb raug caw mus koom. Kab ke noj mov yog lub thaj txi Ntuj, yog lub rooj noj mov uas peb raug caw mus koom. Tsis yog ua kom Yes Xus cov Ntshav ywg saum peb zoo li nyob hauv Ntawv Cog Lus Qub xwb. Tab sis kom peb tau noj Yes Xus lub Cev thiab haus nws cov Ntshav. Kom peb tau txais txoj cai tshwj xeeb nkag mus rau kev txi Ntuj loj no. Kab ke txi Ntuj yog kev cev tus kheej. Kab ke txi Ntuj kuj yog txhiam xws ib yam. Tsis yog tias kuv tsuas ua pov thawj txog qhov Yes Xus muab tus kheej los txi Ntuj. Kuv tsis yog tias lam lees txais nws. Kuv noj thiab haus nws. Li ntawd, nws thiaj rais ua pob txha los ntawm kuv cov pob txha thiab ua nqaij los ntawm kuv cov nqaij. Kuv rais ua ib tug koom nrog Yes Xus. Ntawd yog qhov uas koj tuaj yeem hais tau yam no, uas tsis poob hauv kev paub tsis meej txog qhov tshwm sim hauv lub thaj txi Ntuj. Yam uas tshwm sim thaum peb koom lub Cim Yug nrog Yes Xus lub Cev thiab cov Ntshav, peb tau txais kev muab tus kheej los txi Ntuj ntawm Yes Xus nyob hauv peb lub neej. Peb hloov tus kheej kom haum nrog nws thiab pib ua lub neej. Yuav nco ntsoov txog qhov kuv hais lub lis piam tag los, uas yog hais txog Huab Tais 3 Leeg. Tam sim no peb pib ua lub neej nyob hauv Tswv Ntuj, thiab ntawd yog qhov tseem ceeb thaum peb tsuj xeeb Yes Xus lub Cev thiab cov Ntshav.
Kwv tij Hmoob sawv daws ! Hnub no peb tham txog “muab koj lub neej los koom nrog Yes Xus”, los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Lwm zaus peb mam sib ntsib dua, nej sawv daws nyob zoo
