UA KOM MUAJ KEV NTSEEG.
Cov phooj ywg zoo nyiam sawv daws ! Kuv hais tias peb tab tom nyob hauv cov kab ke thiab Mas Kos ntawv Moo Zoo. Mas Kos yog tus muaj kev paub txog fab kws ntawv. Nyob hauv kev qhuab qhia txhua hnub, nws siv lub tswv yim los piav zoo li piav dab neeg. Zoo li nws pib piav ib zaj, tab sis nws kuj muab lwm zaj los xyaw thiab ces nws mam rov los xaus thawj zaj. Yog ib lub tswv yim ntse kawg thiab qhia txog ntau ntau yam. Tab sis kuv xav tias yam uas tseeb tiag, yog qhov nws xav kom peb nyeem ob zaj ua ke. Nws ua kom peb hais tias nyob hauv 2 zaj uas peb nyeem yog sib txuas.
N.T. Wright tus kws Ntawv Ntshiab hais tias : nyob hauv 2 zaj piav no, sib ci ntsa kawg thaum muab los hais ua ke. Nov yog tus cag ntawm lub hauv paus. Muaj ib zaj hais txog Yais Los tus ntxhais. Yais los yog ib tug thawj coj ntawm lub tsev txoos. Nws hais rau Yes Xus tias : “Huab Tais, kuv tus ntxhais tab tom yuav tuag. Thov koj tuaj saib nws mas !” Ces Yes Xus thiaj tawm rooj mus. Thaum Yes Xus tab tom tawm rooj, mas peb muab zaj 2 coj los piav xyaw thiab. Yog zaj hais txog ib tug poj niam tsob ntshav uas Yes Xus tau kho nws zoo. Piav zaj hais txog tus poj niam tsob ntshav xaus, ces peb rov los pib thawj zaj. Peb yuav los saib seb Yes Xus tsa tau Yais Los tus ntxhais li cas ?
Qhov no yog qhov tseeb uas peb tham nyob hauv Mas Kos ntawv Moo Zoo.
Kuv tau pib cov zaj nyob hauv phau ntawv nruab nrab, tab sis nco tau tias zaj hais txog 2 tug neeg no yog zoo pab ntxiv kev ntseeg. Li ntawd, Yes Xus thiaj tawm rooj mus. Tsoom pej xeem lawv zoo siab, vim lawv tau hnov txog Yes Xus. Yes Xus tau ua hwj huam yees ntxwv thiab lawv nyiam kawg. Lawv hais tias Yes Xus yuav mus pab tus poj niam ntawd, peb caum qab mus saib seb nws yuav muaj dab tsi tshwm sim tuaj ? Tsoom pej xeem zoo siab thiab nyob ib ncig saib Yes Xus. Tus poj niam ntawd tsob ntshav los tau 12 xyoos lawm. Hais txog kev tsob ntshav nyob hauv cov His Xas Lais txheej thaud, mas yuav tau mus nyeem phau ntawv Les Vis kom paub txog lub ntsiab. Yog koj muaj ntshav los, mas txhais tias thawj yam yog koj muaj txhaum. Yam ob, txhua yam uas koj kov los yog zaum tais nws yog txim txhaum, ces tus neeg los kov koj nws kuj yuav lo txhaum thiab. Koj puas pom tias tus poj niam tsob ntshav ntawd nws tag kev cia siab npaum li cas ? 12 xyoos uas nws nyiaj tiv kev txom nyem hauv lub cev. Li ntawd, nws yog qhov tsim txom thiab yog teeb meem loj tshaj plaws hauv lub cev. Tab sis ib qho ntxiv, kuj ua rau nws tsis tshua ntxhov siab pes tsawg, vim kev tsim txom ua rau nws raug cais tias yog neeg phem. “Txhob txav mus ze thiab txhob kov nws. Yog nws txuas lus nrog koj, koj yuav tau txav kom deb.”
Koj sim xav seb yog koj yog ib tug neeg zoo li ntawd, koj yuav ua lub neej li cas ? Yam uas koj kov los yog koj zaum tais lawm, yam ntawd muaj txhaum. Nws yog qhov txom nyem siab ntsws tshaj. Tsis tas li ntawd, koj tseem hais tias tsis huv thiab. Txhais tias koj tsis ntshiab huv hauv cov kev teev hawm, koj tsis tuaj yeem yuav mus koom tau nrog cov kev teev hawm tej kab ke.
Tus poj niam tsob ntshav ntawd nws txom nyem kawg nkaus. Nws hnov tias Yes Xus txawj kho neeg mob, tsis kav nws xav tias nws yuav tsis txav mus ze Yes Xus, vim yuav ua rau Yes Xus tsis huv. Yes Xus yuav hais tias nws ua teeb meem, ces tus poj niam ntawd tsis kam txav mus ze Yes Xus. Tab sis thaum Yes Xus hla ntawm nws xub ntiag, nws cev tes mus kov Yes Xus lub tw tsho, ces nws tus mob tsob ntshav cia li tus nrho. Tam sim ntawd Yes Xus hnov ib lub zog tawm hauv nws mus lawm. Lub ntsiab tseeb tiag, Yes Xus yog lub zog ntawm kev kho cov neeg mob.
Vim li ntawd, tsuav yog kov Yes Xus lub tw tsho xwb, ces lub zog cawm txoj sia twb pab tus poj niam ntawd lawm. Yes Xus hais li cas rau tus poj niam ntawd ?
Yes Xus hais tias : “Me ntxhais, koj txoj kev ntseeg tau cawm koj lawm.”
Lo lus tias “kev ntseeg” kuv xav tias nws yog hais txog kev tso siab. Kev tso siab uas koj muaj, ua kom lub zog ntawd tawm los cawm koj. Qhov no yog ib qho tseem ceeb uas tsim nyog yuav nco cia. Vim qhov no yog tshwm sim rau tus poj niam tsob ntshav ntawd tiag tiag. Nws kuj yog ib lub cim zoo qhia peb kom muaj kev ntseeg thiab muaj kev tso siab.
Kuv ntseeg tias muaj coob leej tab tom mloog thiab lawv xav tias lawv zoo li tus poj niam ntawd. Nws yog cov uas raug cais ntawm lub Koom Txoos, cais ntawm Tswv Ntuj thiab cais ntawm ib zeej tsoom neeg. Lawv zoo li yog cov pej kum neeg, zoo li yog cov neeg sab nraud. Tej zaum koj kuj zoo li tus poj niam tsob ntshav 12 xyoos, los sis ntev dua 12 xyoos uas koj pom tias koj zoo li ntawd. Peb tsis tau thov Leej Niam Tes Les Xas, tab sis peb yuav muab tas peb lub peev xwm los sau ua ke thiab kov Yes Xus lub tw tsho. Yog tias koj yog Yes Xus ib tug Thwj Tim thiab koj nyob nrog Yes Xus, koj raws Yes Xus qab, koj yuav tau hnov Yes Xus cov lus. Koj muab siab rau mloog nws cov lus, koj nyob hauv Yes Xus txoj kev thov Ntuj, ces koj yog Yes Xus ib tug tseem Thwj Tim.
Tag kis kuv tsis tau thov yam ntawd rau koj, yog tias koj zoo li tus poj niam ntawd. Yam kuv thov, yog thov kom tau kov Yes Xus lub tw tsho. Piv li koj tsis tau mus tsev teev Ntuj 25 xyoos lawm, koj rov mus teev Ntuj Hnub Chiv. Tej zaum muaj coob leej yuav xav tias koj yog leej twg ? Thiab tsis muaj leej twg quav ntsej txog koj. Koj sim xav saib tus poj niam tsob ntshav ntawd, nws tsuas yog mus kov Yes Xus lub tw tsho xwb, nws cia li zoo hlo lawm. Koj tsis tau mus teev Ntuj li 30 xyoo, tab sis koj yuav muab txoj Saw Mab Liab los thiab thov Ntuj tias :
“Tswv Ntuj ! Kuv yuam kev lawm, thov koj pab kuv.”
Koj yuav cev tes mus, tej zaum yuav muaj tej tus neeg siab zoo pub yam Yes Xus muaj rau koj. Koj nco ntsoov tias Yes Xus nrog koj mus ua ke, tab sis koj nrug ntawm Yes Xus thiab koj zoo li tus poj niam ntawd. Yam uas tus poj niam ntawd ua, yog nws muaj kev ntseeg txaus, nws thiaj muaj lub siab tawv kov Yes Xus lub tw tsho, ces nws tau txais kev cawm puv npo. Yog koj cev tes mus, koj yuav ntsib kev cawm. Lub zog loj yuav tawm ntawm Yes Xus tuaj pab koj.
Peb rov los hais txog zaj Yais Los tus ntxhais. Yais Los txhos caug thov Yes Xus, vim nws tus ntxhais tab tom yuav tuag. Nws zoo siab ua txhua yam los pab nws tus ntxhais, nws tsis ntxhov siab txog dab tsi. Nws txog caug thiab thov Yes Xus, kom Yes Xus mus saib nws tus ntxhais. Txhais tias Yais Los muaj kev ntseeg zoo kawg.
Muaj ib co neeg khiav ntawm Yais Los lub tsev tuaj thiab lawv hais rau Yais Los tias :
“Koj tus ntxhais twb tuag lawm, koj tseem yuav txob Xib Hwb ua dab tsi ?”
Yes Xus twb hnov lo lus ntawd lawm. Thaum Yes Xus tuaj txog, nws pom neeg coob coob ua ntxhov hnyo, ib txhia quaj, ib txhia qw nrov nrov.
Yes Xus los hauv tsev nws hais tias : “Ua cas nej ua ntxhov hnyo thiab quaj zom zaws ? Tus me ntxhais tsis tuag, nws pw tsaug zog xwb.”
Yes Xus hais li ntawd, ces lawv luag nws. Yes Xus ntiab sawv daws tawm mus nraum zoov. Nws tsuas kheev tus me nyuam niam thiab txiv thiab cov nrog nws tuaj nyob hauv tsev xwb. Yes Xus tuav tus me nyuam txhais tes, nws hais rau tus me nyuam tias : “Tas Lis Tas Kus” txhais tias : ‘Me ntxhais, kuv hais koj, koj sawv !’
Tus me ntxhais sawv tsees tam sim ntawd, thiab nws mus kev.
Tej xwm no sawv daws nco ntsoov los tau 2,000 xyoo. Yog cov xwm hais txog tus poj niam tsob ntshav 12 xyoos thiab ib tug ntxhais hnub nyoog 12 xyoos.
Qhov no thiaj hais tias Mas Kos piav txog 2 zaj sib xyaws ua ke.
Tom qab Yes Xus tsa Yais Los tus ntxhais sawv, nws txwv lawv kom txhob qhia leej twg paub. Ces nws kom lawv muab mov rau tus me ntxhais noj. Vim tus poj niam txoj kev tso siab, nws thiaj cev tes mus kov Yes Xus lub tw tsho. Tus poj niam tsob ntshav, yog sawv cev ntawm tas cov neeg muaj mob. Tus me ntxhais 12 xyoos uas nws tau tuag lawm, tab sis Yes Xus tsa nws rov sawv. Nws yog tus sawv cev ntawm cov neeg lub cev tuag thiab tus ntsuj plig tuag. Yais Los txoj kev ntseeg coj Yes Xus tuaj cawm nws tus ntxhais. Tus poj niam tsob ntshav, nws txoj kev ntseeg txoj kev tso siab tau cawm nws dim. Yais Los muaj kev ntseeg thiab kev tso siab, tus poj niam kuj muaj kev ntseeg thiab kev tso siab, ces txoj kev ntseeg ntawd tau cawm nkawd.
Qhov no yog ib zag zoo pab peb sawv daws. Peb paub tias muaj neeg coob coob nyob ib puag ncig peb, uas lawv tus ntsuj plig twb tuag lawm. Tej zaum lawv xav tau koj txoj kev ntseeg, vim koj txoj kev ntseeg yuav coj Yes Xus tuaj pab lawv. Peb tau nyeem zaj no uas yog ib zaj hais txog Yes Xus lub hwj chim thiab lub zog loj kawg. Ces peb yuav vam txog Yes Xus lub hwj chim thiab lug zog los pab peb, kom peb txawj ua ib co neeg muaj kev ntseeg nyob hauv peb lub neej ua neeg ntseeg.
Thov Tswv Ntuj foom hmoov zoo rau koj !
