HNUB TIM 1 LUB 11 HLIS; HNUB HWM TSOOM LEEJ NTSHIAB
COV LUS NYOB HAUV MAS TAIS NTAWV MOO ZOO (MT 5: 1-12)
Kwv tij Hmoob, txhua xyoo thaum txog lub 11 hlis tim 1 mas lub Koom Txoos tshwj cia hwm tsoom Leej Ntshiab. Tej zaus nej yuav xav tias lo lus ‘Leej Ntshiab’ yog dab tsi?
Leej Ntshiab yog lo lus ntxeev los ntawm lus Las Tis Nas tias ‘Sanctus’ lus Aas Kiv yog ‘Saint’ txhais tias ‘tus neeg ntshiab dawb huv’ (Holy person).
Lub Koom Txoos Kav Tos Liv saib tias tus neeg twg yog nws taug Huab Tais Yes Xus tus lw raws li lub Moo Zoo, thaum tuag lawd, nws ua tau hwj huam pab cov neeg vam txog nws kom lawv txawj tso siab rau Huab Tais Tswv Ntuj mas tus ntawd yog tus tau mus nyob ze Huab Tais Tswv Ntuj pem Ntuj Ceeb Tsheej lawm; lub Koom Txoos hu tus ntawd ua ‘Leej Ntshiab’.
Kwv tij Hmoob sawv daws, hnub no lub Koom Txoos cev Huab Tais Yes Xus cov lus qhia txog cov tau txoj hmoov zoo rau peb coj mus ua raws mas peb thiaj nyob tau ruaj hauv txoj kev mus cuag Tswv Ntuj lub Ceeb Tsheej, los yog txoj kev coj peb mus ua ib tug Leej Ntshiab. Huab Tais Yes Xus qhia tias peb yuav tau txoj hmoov zoo yog peb muaj lub siab pluag, peb muaj lub siab zoo, peb ua neeg quaj ntsuag, peb tshaib thiab nqhis txoj kev ncaj, peb hlub luag tej, peb muaj lub siab huv, peb nyiam tsim kev thaj yeeb, peb muaj lub siab ruaj nreb rau txoj kev ncaj, thiab tshwj xeeb yog peb yeem ua tim khawv txog Huab Tais Yes Xus.
Kwv tij, thaum peb tseem muaj txoj sia nyob, mas peb kav tsij ua raws Huab Tais Yes Xus cov lus hauv hnub no mog. Tuag tas peb thiaj yuav tau mus nrog Huab Tais Yes Xus nyob ua ke pem peb Leej Txiv Tswv Ntuj lub Ceeb Tsheej ci ntsa iab, peb thiaj yuav tau mus nrog tsoom Leej Ntshiab sib koom Ntuj lub txiaj ntsim. Nyob zoo sawv daws.
