ZAJ NYEEM HNUB TIM 13 LUB 6 HLI 2026
HNUB NCO TXOG MAB LIAB LUB PLAWV NTSHIAB
COV LUS NYOB HAUV LUS KAS NTAWV MOO ZOO (LK 2: 41-51)
Kwv tij Hmoob, tom qab lub Koom Txoos hwm Huab Tais Yes Xus lub plawv ntshiab tas, lub Koom Txoos kuj txhib peb kom nco txog niam Mab Liab lub plawv ntshiab thiab. Nyob hauv hnub no lub Koom Txoos nqua hu peb kom yoog raws niam Mab Liab tus piv txwv qhib siab mloog Tswv Ntuj lus. Txawm tias niam Mab Liab tsis to taub txog cov xwm Tswv Ntuj pub kom tshwm tuaj raug rau nws, tsis kav niam Mab Liab tseem ua lub neej nyob ruaj nreb hauv nws txoj kev ntseeg, thiab nws zoo siab ua xis Tswv Ntuj siab. Niam Mab Liab muaj lub siab muag mos nyoos, nws tsis ua neeg muab hlob, mas nws thiaj qhib siab mloog Tswv Ntuj lus hais tuaj rau nws nruab siab.
Hnub no thiaj yog zoo hnub rau peb thov Huab Tais Yes Xus pub nws lub tsiaj ntsim rau peb, kom peb muaj ib lub siab zoo li niam Mab Liab, mas peb thiaj yuav mloog Tswv Ntuj cov lus hais rau peb tau, peb thiaj yuav muaj lub siab npuv npo txoj kev nyiam nrhiav Huab Tais Yes Xus tus ploj ntawm peb lub neej mus.
Tus Huab Tais Yes Xus ploj ntawd yog leej twg?
Yog qhov zoo, yog qhov sov siab uas ploj hauv peb cuab yim neej mus lawm, yog cov neeg vam txog peb, yog cov neeg peb tsis nco qab txog lawv.
Thov kom hnub no peb ua xws li niam Mab Liab, nrhiav Huab Tais Yes Xus kom ntsib, nrhiav qhov zoo kom pom, rov nqa Huab Tais Yes Xus kev nyiam kev hlub los nyob rau hauv peb tsev neeg, rau cov vam txog peb.
Nyob zoo sawv daws.
