ZAJ NYEEM HNUB TIM 15 LUB 2 HLIS 2025
HNUB XYA, LUB LIS PIAM 5 CAIJ NYOB NRUAB XYOO
HP 3: 9-24; MK 8: 1-10
Kwv tij Hmoob sawv daws, nyob hauv cov Ntawv Moo Zoo hais txog Huab Tais Yes Xus ua kom mov ntsu tuaj 2 zaug. Ib zaug yog Huab Tais Yes Xus ua kom 5 lub ncuav mov ntsu tuaj yug cov Yus Das tuaj mloog nws lus. Ib zaug yog zaum no uas yog Huab Tais Yes Xus ua kom 7 lub ncuav mov ntsu tuaj yug cov pej kum neeg tuaj nrog nws nyob.
Ob zaj no puav leej qhia tias Huab Tais Yes Xus yog cov mov pub txoj sia; tus twg mloog thiab tuaj khaub zig Huab Tais Yes Xus mas tus ntawd yuav tsis tshaib ntxiv thiab tus ntawd yuav tau txais txoj sia tshiab.
Nyob hauv zaj Huab Tais Yes Xus ua mov ntsu tuaj hnub no, muaj ib yam peb yuav pom yog Huab Tais Yes Xus hais rau cov thwj tim tias “Kuv hlub cov neeg no, yog kuv cia lawv yoo tshaib rov mus tsev mas lawv yuav tsaus muag tom tog kev.”
Yog Huab Tais Yes Xus xav qhia nws cov thwj tim kom lawv muaj lub siab hlub lwm tus, tsis hais tus ntawd yuav yog tus txheeb ze los yog tus nrug deb, yuav yog lawv cov Yus Das los pej kug neeg.
Huab Tais Yes Xus kuj xav qhia rau peb cov tau hnov lub Moo Zoo hnub no, kom peb hlub cov neeg nyob ncig peb thiab.
Huab Tais Yes Xus nug cov thwj tim saib lawv muaj pes tsawg lub ncuav mov. Lawv teb tias muaj 7 lub, ces Huab Tais Yes Xus ua Ntuj tsaug thiab muab ntais rau cov thwj tim nqa mus pub rau sawv daws. Tseem muaj ob peb tug ntses lawv nqa los rau Huab Tais Yes Xus foom hmoov zoo thiab.
Qhov no kuj zoo qhia peb tias Huab Tais Yes Xus xav kom peb xub muab yam peb muaj pub rau tus neeg tsis muaj, lwm tus pom peb ua li ntawd mas nws kuj yuav ua xws li peb thiab.
Kwv tij, yog kuv rho yam kuv muaj, koj rho yam koj muaj los sib ntxiv, mas txog qhov kawg koj thiab kuv yuav muaj zoo tib yam thiab ntau txaus rau wb thiab tseem tshuav pub rau lwm tus thiab.
Hnub no peb yuav ua xws li cov lus hauv lub Moo Zoo no mog.
