ZAJ NYEEM HNUB TIM 3 LUB 7 HLI 2024
HNUB UA HMOOV LEEJ NTSHIAB TOS MAS
COV LUS NYOB HAUV ZAM NTAWV MOO ZOO (Z 20: 24-29)
Cov kwv tij, nyob hauv Huab Tais Yes Xus cov Hauv Paus Xa Lus mas muaj tag nrho 12 leej. Ib tug ntxeev siab rau Yes Xus, nws muab Yes Xus muag, tom qab nws tu siab ces nws mus dai tuag lawm. Ib tug tsis lees paub Yes Xus thaum lawv tab tom txiav txim rau Yes Xus nyob hauv Kais Fas tsev, nws tu siab ces nws hloov siab rov los nyiam Yes Xus tshaj qhov qub. Ib tug nws muaj lub siab kub lug tab sis nws tsis ntseeg tias Yes Xus sawv rov los, nws yog Tos Mas.
Tos Mas yuav ntseeg yam nws ob lub qhov muag pom, nws ob txhais tes chwv xwb, luag tej hais mas nws tsis ntseeg, yog li thaum cov phooj ywg thwj tim hais rau nws txog qhov Huab Tais Yes Xus sawv rov los, nws thiaj tsis ntseeg.
Tab sis 8 hnub tom qab, Huab Tais Yes Xus rov tawm tuaj rau Tos Mas thiab nws cov phoj ywg pom, ces Tos Mas thiaj ntseeg tias Huab Tais Yes Xus sawv rov los lawm tiag.
Tab sis Huab Tais Yes Xus hais rau Tos Mas tias “Tos Mas, cov uas tsis tau pom kuv, tab sis lawv ntseeg, mas lawv txoj hmoov zoo.”
Kwv tij Hmoob, txoj kev kawm txhawb nrhiav qhov tseeb hauv lub ntiaj teb no, qhia peb tias tej yam qhov muag pom, pob ntseg hnov, qhov ntswg hnia tau tus ntxhiab, cev nqaij tau chwv tau nphav, mas thiaj yog yam txaus ntseeg, yog yam muaj tseeb. Yog li peb neeg ntiaj teb feem ntau thiaj tsis tso kev ntseeg txog Yes Xus pov tseg.
Los yog ntawm peb ntiag tug, muaj qee zaus peb twb ua xyem xyav txog peb txoj kev ntseeg thiab los kuj muaj.
Yog li mas cov kwv tij, peb yuav nquag thov Tswv Ntuj pab peb kom peb txoj kev ntseeg txog Yes Xus txhob tsuag, kom peb ntseeg ruaj tias muaj Tswv Ntuj tiag, kom peb ntseeg khov tias Huab Tais Yes Xus tau sawv rov los lawm tiag raws li cov thwj tim tau ua tim khawv thiab zeem tseeb tseg.
Peb ntseeg, mas peb thiaj yuav tau txoj hmoov zoo. Nyob zoo sawv daws.
