HNUB TIM 23 LUB 11 HLIS; HNUB NCO TXOG LEEJ NTSHIAB VAJ QHIA NKES MEES, THIAB LEEJ NTSHIAB KOS LOOS NPAS
COV LUS NYOB HAUV LUS KAS NTAWV MOO ZOO (LK 20: 27-40)
Kwv tij Hmoob sawv daws, Hmoob hais tias thaum tib neeg tuag lawm, tus plig yuav mus cuag poj cuag yawm nyob hauv yeeb ceeb. Nyob hauv mas cov tuag kuj tseem ua neej xws li thaum muaj sia nyob yaj ceeb; lawv muaj kev tshaib kev nqhis, muaj txiv neej poj niam. Yog li mas Hmoob thiaj tseem hlawv yaj khaum yeeb khaum, hlawv nyiaj ntawv xa mus rau tus tuag, los tej zaus cov tuag rov los ua phem rau cov tom qab kom tua nyuj dag rau tus tuag ntawd thiab.
Tab sis nyob hauv txoj kev cai tshiab los yog kev cai teev hawm Yes Xus, mas tsis muaj li ntawd ntxiv, vim tias Huab Tais Yes Xus yeej hais meej meej thiab tseeb tshaj tias thaum tib neeg hla dhau lub ntiaj teb no mus lawm, lawv yuav zoo li cov Tshiab, tsis muaj txiv neej los poj niam ntxiv.
Kwv tij, cov Tshiab yog tsav Tswv Ntuj tsim los xws li tib neeg tab sis lawv yog ‘Leej Plig’ mas lawv tsis muaj qhov yuav tshaib los yog ntshaw sib yuav ua txij nkawm.
Yog li mas thaum Hmoob tig los ua Ntuj kev cai ntseeg txog Yes Xus lawm, Hmoob yuav tau hloov dua lub tswv yim tshiab mus raws li Huab Tais Yes Xus cov lus qhia. Cov Hmoob ntseeg Ntuj mas lawv yuav tsis lawv ntawv nyiaj ntawv kub, yaj khaum yeeb khaum, ua nyuj dab npua tai ntxiv. Tej ntawd tsis haum rau Huab Tais Yes Xus cov lus qhia.
Yam cov neeg ntseeg yuav tau ua rau cov tuag lawm, mas yog thov Huab Tais Tswv Ntuj khuv leej lawv tus plig tseem nyob hauv teb chaws them txim. Yog li mas thaum muaj ib tug ntseeg txog Yes Xus tas sim neej, cov neeg ntseeg thiaj sib sau mus teev Ntuj kom tau thov tsoom Leej Ntshiab pab thov Ntuj rau tus tuag, thov Huab Tais Yes Xus lub hwj chim tuaj pov hwm tus tuag ntawd tus ntsuj tus plig.
Niaj lis piam thaum mus ua lub Txoos Txi Ntuj, peb kuj yuav thov tus Leej Choj ua ib thaj txi Ntuj rau tus tuag, peb hais tias thov Miv Xas.
Kwv tij Hmoob sawv daws, tseem muaj peb cov Hmoob ntseeg Ntuj coob leej tsis tau paub txog tej no, los yog lawv tseem tso tsis tau lub tswv yim raws li cov Hmoob ib txwm ntseeg thiab ua los.
Hnub no peb thiaj xav kom peb tsoom Hmoob sawv daws tig los yuav siab tshiab, hloov lub tswv yim tshiab raws li lub Moo Zoo tiag tiag, mas peb thiaj tsis yuam kev xws li cov Xas Dus Kais hnub no uas lawv tsis ntseeg tias muaj kev sawv rov los, ces lawv tuaj sim Huab Tais Yes Xus.
