ZAJ NYEEM HNUB TIM 24 LUB 12 HLIS: HNUB PEB LUB LIS PIAM 4 CAIJ TOS HUAB TAIS
COV LUS NYOB HAUV NTAWV XAS MUAS, PHAU OB (2XM 7: 1-5, 8-12, 16)
LUB MOO ZOO RAWS LI LUS KAS (LK 1: 67-79)
Kwv tij Hmoob sawv daws, hmo no mas tas lub Koom Txoos yuav ua lub Txoos Txi Ntuj tos Yes Xus yug los. Yog li mas yav pom kev no thiaj yog ib lub sij hawm peb sawv daws npaj lub siab lub ntsws kom txhij.
Nyob hauv tus Yaj Saub Xas Muas phau ntawv piav txog thaum tus vaj Das Vis xav txhim lub Tuam Tsev rau lub Xab Cog Lus tab sis Huab Tais Tswv Ntuj tsis kheev vim tias ib txwm los mas Huab Tais Tswv ntuj nrog nraim Das Vis. Huab Tais Tswv Ntuj saib Das Vis yog lub Tuam Tsev lawm.
Huab Tais Tswv Ntuj cog lus tias yuav cia ib tug hauv Das Vis tsev neeg sawv los zaum Das Vis lub theej kiab ua vaj mus li; yog tus vaj Pleev.
Kwv tij, Lus Kas piav tias Leej Ntuj Plig Ntshiab nyob puv hauv Ntxas Kas Lias, ces nws tsa suab hais cov lus cav txog Tswv Ntuj tias “His Xas Lais tus Huab Tais Tswv Ntuj nto koob meej, vim nws tuaj xyuas thiab tuaj npo nws haiv neeg. Nws tsa ib txog kev cawm muaj zog rau peb nyob hauv nws tus tub txib Das Vis tsev neeg. Nws ua raws li nws kom cov yaj saub ntshiab txheej thaud xub qhia.”
Kwv tij, lub Koom Txoos qhia peb tias thaum peb txais lub Cim Ntxuav thiab Cig Txhab Zog lawm, mas peb muaj Leej Ntuj Plig nrog nraim peb, ces txhais tau tias niaj hnub no peb muaj Leej Ntuj Plig Ntshiab nyob puv hauv peb xws li Ntxas Kas Lias lawm, mas peb kuj yuav tsa suab hlo cav txog Huab Tais Tswv Ntuj nrov nrov xws li Ntxas Kas Lias, tshwj xeeb mas yog lub caij peb ua kev zoo siab tos Yes Xus yug los no. Peb txhob kaw qhov ncauj tsis kam hais lo lus cav txog Tswv Ntuj, los yog hais ntsiag ntsiag hauv siab xwb.
Nej xav saib, thaum peb ua phem mas ua cas peb tsis txaj muag, thaum peb npau taws mas ua cas peb nyem tsa suab hlo nte nrov nrov ua tas zej zog hnov tas. Tab sis ua cas thaum peb cav txog Tswv Ntuj peb ho tsis muaj cuab kav ua zoo li ntawd mas.
Peb txhob ntshai, txhob txaj muag hais lus zoo, hu nrov nrov txog peb tus Huab Tais Tswv Ntuj. Tab sis muaj ib qho peb yuav ceev faj thiab; yog feeb kom meej tias peb tab tom cav txog Tswv Ntuj, yuav ua kom zoo saib thiab zoo ntsia xwb mas thiaj yog peb hwm Tswv Ntuj, tsis yog tias dhia daj dhia luag cuag li ib tug neeg vwm kom luag pom ces luag thuam peb tus Tswv Ntuj. Vim tias tus neeg muaj Leej Ntuj Plig Ntshiab nyob puv hauv nws, mas nws nyiam Ntuj, zoo siab, kaj lug, siab ntev, xyiv fab, siab zoo, tso siab rau Ntuj, hlub lwm tus, thiab txawj kav nws lub cev.”
Hnub no, peb thiaj yuav npaj lub siab lub ntsws kom txhij tos Huab Tais Yes Xus tuaj nyob hauv peb xws li lub dab nyuj muaj cov quav nyab ntxhib tab sis muag mos, sov so txais tus me nyuam Yes Xus pw hauv.
