ZAJ NYEEM HNUB TIM 3 LUB 7 HLI 2026
HNUB UA HMOOV LEEJ NTSHIAB TOS MAS
COV LUS NYOB HAUV ZAM NTAWV MOO ZOO (Z 20: 24-29)
Kwv tij Hmoob, hnub no lub Koom Txoos ua hmoov cav txog tus Hauv Paus Xa Lus Tos Mas. Nyob hauv Ntawv Moo Zoo piav tias Tos Mas hnov cov phooj ywg thwj tim hais tias Huab Tais Yes Xus sawv rov los lawm tiag, mas nws tsis ntseeg. Tos Mas hais tias “Yog kuv tsis pom lub qhov txhab ntsia hlau nyob hauv nws ob txhais tes, yog kuv tsis muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes rau ntawm nws phab tav, mas kuv tsis ntseeg.” Yim hnub tom qab Huab Tais Yes Xus rov tawm tuaj, nws hais rau Tos Mas kom los saib cov qhov ntsia hlau thiab kov cov qhov txhab. Huab Tais Yes Xus tseem hais ntxiv tias “Koj txhob ua neeg tsis ntseeg ntxiv, koj ntseeg mog.”
Kwv tij, tos ua ntej ntawd Tos Mas tsis ntseeg, vim nws tsis nrog cov thwj tim nyob ua ke, ces nws thiaj tsis tau nrog lawv saj txoj kev kaj siab lug uas Huab Tais Yes Xus coj tuaj rau lawv. Zoo ib yam li peb, yog peb txav deb ntawm pawg ntseeg, yog peb tso tseg tsis teev Ntuj ntxiv, mas peb lub siab ntseeg yeej yuav tsuag zuj zus mus thiab. Li ntawd, tsim nyog peb tsum nyob koom npoj nrog cov neeg ntseeg, nrog cov neeg ntseeg sib txoos ua ke teev Ntuj kom peb lub siab ntseeg ciaj sia mus li.
Nyob rau lub ntuj nyem no sawv daws hais tias peb tsum ntseeg yam peb pom kiag ntawm qhov muag los yog peb sim tau tias muaj tseeb tiag xwb. Yog li thiaj muaj ntau zaus peb ua xyem xyav txog Tswv Ntuj tias puas muaj tiag, peb ua xyem xyav tias yog muaj Tswv Ntuj, mas ua cas peb ntsia tsis pom Tswv Ntuj. Txawm peb ua xyem xyav tsis xav ntseeg pes tsawg, los Tswv Ntuj yeej tsis tso peb pov tseg, nws yuav los hloov peb kev xyem xyav ua kev ntseeg ruaj nreb ib yam li thaum Huab Tais Yes Xus hais rau Tos Mas tas, ces nws ntseeg thiab lees tias “Kuv tus Huab Tais, kuv tus Tswv Ntuj.”
Huab Tais Yes Xus hais li cas ntxiv? Nws hais tias “Cov uas tsis tau pom tab sis lawv ntseeg, mas lawv txoj hmoov zoo.” Niaj hnub no peb tsis pom Huab Tais Yes Xus, tab sis peb yeej hnov ntsoov tias Huab Tais Yes Xus nyob nrog peb vim peb tau hnov Huab Tais Yes Xus cov lus, peb pom lub Cim Yug, thiab peb muaj txoj kev sis nyiam sis hlub. Peb ntseeg tias cov ntawd yog Huab Tais Yes Xus tiag, mas peb tau txoj hmoov zoo.
Nyob zoo sawv daws.
