ZAJ NYEEM HNUB TIM 7 LUB 10 HLI 2025
HNUB NCO TXOG LEEJ NIAM SAW MAB LIAB
COV LUS NYOB HAUV LUS KAS NTAWV MOO ZOO (LK 10: 38-42)
Kwv tij sawv daws, nyob rau hauv Huab Tais Yes Xus tiam neeg ntawd, lawv saib cov poj niam qis qis kawg, tsis hais hauv vaj hauv tsev, hauv tej zej zog, hauv tej kab ke teev hawm, tab sis, Huab Tais Yes Xus yog thawj tug Xib Hwb uas nws pub cai rau cov poj niam los ua nws tsoom thwj tim, thiab kom nrog nws tshaj lub Moo Zoo. Qhov no Huab Tais Yes Xus xav qhia tias nyob ntawm Tswv Ntuj xub ntiag tsis cais haiv, tsis cais neeg, tsis cais poj niam thiab txiv neej, vim Tswv Ntuj saib peb sawv daws, muaj nqis ib yam nkaus. Qhov no yog lub Moo Zoo uas Huab Tais tuaj tshaj rau peb sawv daws. Huab Tais tso cai rau Mas Tas tos txais Huab Tais Yes Xus tuaj hauv nws tsev, uas qhov tseeb tiag yeej tsis raug cai raws li tej kev cai nyob rau tiam neeg ntawd, vim lawv tsis tso cai rau poj niam tos txais tej tug qhua tseem ceeb, tab sis, Huab Tais Yes Xus tsis xav li ntawd. Kev ua Yes Xus thwj tim yog yuav tsum mloog Yes Xus lus, uas yog tus yam ntxwv zoo li Mab Liab uas thaum nws mloog Yes Xus lus, hos Mas Tas tseem ntxhov siab txog ntau yam, uas rau nws plam qhov hauj lwm tseem ceeb, nws tsis tau hnov Yes Xus cov lus qhia.
Kwv tij sawv daws, li ntawd yog peb xav ua Yes Xus ib co thwj tim zoo, mas peb yuav tsum nquag mloog Yes Xus cov lus qhia.
Nyob zoo sawv daws.
