ZAJ NYEEM HNUB TIM 6 LUB 8 HLI 2025
HNUB YES XUS LUB HWJ CHIM TAWM TUAJ
COV LUS NYOB HAUV LUS KAS NTAWV MOO ZOO (LK 9: 28-36)
Cov kwv tij, hnub no lub Koom Txoos caw peb los ua hmoov cav txog Huab Tais Yes Xus lub hwj chim tawm tuaj rau 3 tug thwj tim pom. Lub ntsiab hauv lub Moo Zoo hnub no, yog ntuas peb sawv daws kom ‘mloog’ Huab Tais Yes Xus raws li cov thwj tim hnuv lub suab nrov hauv twv huab tuaj tias “Tus no yog kuv Leej Tub uas kuv nyiam, nej mloog nws mog.”
Tos Huab Tais Yes Xus cia nws lub hwj chim tawm tuaj rau Pob Zeb, Yas Kos, thiab Zam pom; vim tias ua ntej no li 6 hnub, Huab Tais Yes Xus qhia cov thwj tim tias nws yuav raug tsim txom, mas sawv daws ntxhov siab. Huab Tais Yes Xus xav kom lawv tso siab mas nws thiaj pub lub hwj chim Tswv Ntuj rau lawv pom. Tab sis tsis yog tas cov thwj tim yuav pom, Huab Tais Yes Xus tsuas xaiv Pob Zeb, Yas Kos, thiab Zam lawv 3 leeg xwb.
Pob Zeb yuav yog tus ntaus thawj coj cov thwj tim, Yas Kos yuav yog thawj tug tuag ua tim khawv, Zam yuav yog tus ua pov thawj txog txhua yam Huab Tais Yes Xus tau hais tseg.
Peb tug thwj tim pom Mais Xes thiab Es Lias tawm los nrog Huab Tais Yes Xus tham. Ua cas thiaj yog Mais Xes thiab Es Lias?
Nyob hauv cov His Xas Lais los yog cov Yus Das, lawv saib Mais Xes thiab Es Lias yog ob tug Yaj Saub tseem ceeb; Mais Xes yog tus txais Txoj Cai ntawm Huab Tais Tswv Ntuj los qhia rau cov His Xas Lais coj, Es Lias yog tus ntuas cov His Xas Lais kom nyob rawv hauv Tswv Ntuj txoj kev.
Cov Yus Das hais tias tus twg mloog Mais Xes, tus ntawd yog mloog Tswv Ntuj; tus twg tsis ua raws li Mais Xes cov lus qhia, tus ntawd yog hla Tswv Ntuj lus. Li ntawd, cov Yus Das thiaj saib Mais Xes Txoj Cai yog ib yam yuav tsis txhob hla.
Cov Yus Das pom tias Es Lias yog tus Yaj Saub pheej xeeb rau Tswv Ntuj, yog tus txais Tswv Ntuj lub hwj chim los rhuav cov Yaj Saub cuav teev Npas As. Es Lias thiaj yog tus Yaj Saub coj cov Yus Das rov los npuab Tswv Ntuj.
Mais Xes thiab Es Lias tawm los nrog Huab Tais Yes Xus tham, thiaj yog ib lub cim qhia rau peb tug thwj tim paub tias tab txawm cov Yus Das yuav saib Mais Xes thiab Es Lias loj npaum cas, tsis kav nkawd kawg yog ob tug tub txib tsob hwb Tswv Ntuj Lo Lus xwb. Tus loj tshaj mas yog Huab Tais Yes Xus.
Huab Tais Yes Xus yog Tswv Ntuj Lo Lus, cov thwj tim tsum mloog Huab Tais Yes Xus, ces Huab Tais Tswv Ntuj lub suab hais kom lawv 3 leeg mloog Huab Tais Yes Xus.
Cov thwj tim niaj hnub nrog Huab Tais Yes Xus nyob thiab mloog Huab Tais Yes Xus cov lus qhia. Lawv tseem yuav mloog dab tsi ntxiv?
Qhov Huab Tais Tswv Ntuj xav kom cov thwj tim mloog, mas yog qhov tias lawv tsis txhob ntxhov siab txog Huab Tais Yes Xus txoj kev yuav raug txom nyem, lawv yuav tau yoog raws Huab Tais Yes Xus; yam li lawv yuav nrauj lawv tus kheej thiab yeem ris lawv tus ntoo cuam raws Huab Tais Yes Xus qab.
Niaj hnub no Huab Tais Tswv Ntuj kuj hais li ntawd rau peb, tsis yog kom peb mloog Huab Tais Yes Xus cov lus qhia nyob hauv lub Moo Zoo, los yog mloog Tswv Ntuj Lo Lus nyob hauv phau Ntawv Ntshiab xwb; Huab Tais Tswv Ntuj tseem kom peb nrauj peb thiab zoo siab ris peb tus ntoo cuam thiab.
Nyob zoo sawv daws.
