“Ntsia saib ! Kuv rov ua dua ib yam tshiab. Yam ntawd twb hlav kaus lawm, nej tsis paub lod ?” (His Xais 43 : 19)
Kev raug ntiab mus nyob txim nyob Npas Npis Los thiab kev rhuav lub tuam tsev teev Ntuj nyob Yes Lus Xas Les, tau ua kev mob siab rau cov His Xas Lais thiab ua kom muaj lus nug tias : “Tswv Ntuj puas tseem nrog peb nyob, los Tswv Ntuj tso peb pov tseg lawm ?” Lub hom phiaj ntawm qhov no nyob hauv ntawv His Xais, yog xav ua kom neeg nkag siab tias Tswv Ntuj tab tom ua dab tsi, tso siab rau Tswv Ntuj thiab tuaj yeem rov qab mus qub zej qub zog tau. Qhov kev paub los ntawm kev raug ntiab no yog nyob hauv Tswv Ntuj tus tsim thiab tus cawm seej raug nthuav tawm.
“Ntsia saib ! Kuv rov ua dua ib yam tshiab. Yam ntawd twb hlav kaus lawm, nej tsis paub lod ?”
His Xais ceeb toom rau lawv txog kev nyiam kev hlub ncaj ncees ntawm Tswv Ntuj uas muaj nyob hauv Tswv Ntuj haiv neeg. Kev ncaj ncees ntawm Tswv Ntuj tseem ruaj khov, tab yog lub caij raug ntiab mus nyob txim. Tsis kav cov lus uas nrog Has Nplas Has cog, saib zoo li ua tsis tiav thiab cov lus cog nyob hauv kev cog lus zoo li nws kub ntxhov kawg. Tab sis cov His Xas Lais tseem yog haiv neeg uas muaj cai yuav nkag mus txog kev nyob ntawm Tswv Ntuj hauv neeg lub keeb.
Phau ntawv His Xais yog phau ntawv uas cov yaj saub hais txog kev nyob, yog thawj lo lus nug ntawm cov neeg txheej thaud xwb. Thiab kuj yog lo lus nug ua ntu zus los tias : “Leej twg yog tus teeb kev hauv keeb kwm thiab muab lub ntsiab rau ?”
Lo lus nug no kuj muaj nyob hauv ntiag tug tias : “Leej twg yog tus teeb txoj hmoo hauv kuv lub neej?” Yam uas kuv paub thiab txhua yam uas kuv pom nws muaj lub ntsiab li cas ?
“Ntsia saib ! Kuv rov ua dua ib yam tshiab. Yam ntawd twb hlav kaus lawm, nej tsis paub lod ?”
Tswv Ntuj ua hauj lwm nyob hauv txhua txhia tus, thiab nws ua yam tshiab tas mus li. Yog peb ntsia tsis pom los yog tsis nkag siab lub ntsiab ntawm yam ntawd, mas yog tej yam ntawd tab tom nra los yog peb tsis npaj kom paub txog qhov Tswv Ntuj tab tom ua. Thaum peb tsis quav ntsej txog txhua yam teeb meem nyob ib ncig peb, thiab tej zaum peb tsis nco qab xav txog yam tshiab hauv peb lub neej, peb tsis paub txog tias Tswv Ntuj muaj nyob tiag, tab sis Tswv Ntuj tsis tau tso peb tseg thiab nws txhim kho peb lub neej tshiab tas mus li. Kuv yog yam tshiab, yam tshiab uas Tswv Ntuj tsim. Txhob tig rov mus saib yav tag los, los yog nrhiav yam zoo zoo uas peb tau muaj dua los. Los yog quaj rau peb tej kev puas tsuaj, peb yuav tsum ntseeg tias Tswv Ntuj yog tus coj kev thiab coj yam tshiab tshiab tuaj rau peb tas mus li.
“Ntsia saib ! Kuv rov ua dua ib yam tshiab. Yam ntawd twb hlav kaus lawm, nej tsis paub lod ?”
Kuv thiab tus uas nrog peb mus kev ua ke, tsis hais cov neeg zej zog hauv peb, peb tsev neeg, peb cov phooj ywg thiab cov nrog peb ua hauj lwm ua ke. Thov kom peb muab siab rau ua hauj lwm ua ke, sib tuav xam txog txhua yam, thiab kev ntseeg txhob ploj tias : txhua yam tuaj yeem pauv ntxeev mus rau qhov zoo tau.
Xyoo 2025, yog xyoo tshwj xeeb. Yog xyoo uas Vaj Qhia Fas Ntshis Kus thov kom peb ua “Tus nrhiav qhov tseeb ntawm kev cia siab”. Hauv lub caij muaj tsov rog thiab kev ncaj ncees piam sij uas tshwm sim nyob hauv lub ntiaj teb niaj hnub no. Peb tag kev cia siab tau, tab sis Tswv Ntuj ua kom peb rov thim xav txog kev ncaj ncees ntawm kev ua neeg ntseeg thiab cia siab tiag. Tshwj xeeb tshaj yog lub sij hawm tam sim no uas peb tab tom ua lub neej nyob. “Kuv thov caw sawv daws ua qhov yooj yooj yim li no :
Ua ntej yuav pw, thov rov nco txog tas txhua yam uas peb tau ntsib tau pom. Nrhiav lub Cim ntawm kev cia siab hnub ntawd. Lub suab luag uas peb xav tsis txog, kev khuv leej nyob hauv tsev kawm ntawv los sis hauv peb tej chaw ua hauj lwm. Nrhiav kev pab, tab txawm tias me me xwb kuj xij. Kev cia siab yog me nyuam yaus kev ncaj ncees raws li Charles Péuy sau tseg. Peb yuav tsum rov los ua me nyuam yaus dua thiab rua muag hauv lub ntiaj teb no. Kom tau ntsib tau paub nws thiab qhuas txog nws. Peb yuav los xyaum tus kheej kom paub txog kev cia siab. Peb yuav poob siab tias lub ntiaj teb no muaj ntau ntau yam zoo thiab zoo npaum li cas ?”
Li ntawd, peb los npaj kom txhij uas yuav ua lub neej nyob hauv lub Caij Hla no nrog kev zoo siab, nrog kev ntseeg thiab kev cia siab. Ib yam li Yes Xus sawv hauv qhov tuag rov los. Tsim nyog peb yuav rov swb peb tus kheej, tom qab kev hla teb chaws suab puam ntawm peb dhau mus lawm. Cia Yes Xus ua tus coj peb lub neej ntiag tug mus kev ua ke.
Kwv tij Hmoob sawv daws ! Hnub no peb tham txog lo lus Tswv Ntuj hais nyob hauv ntawv His Xais tias : “Ntsia saib ! Kuv rov ua dua ib yam tshiab. Yam ntawd twb hlav kaus lawm, nej tsis paub lod ?” Peb tham los xaus li no xwb.
Thov Huab Tais Yes Xus Pleev lub txiaj ntsim nrog nej nyob, ua nej siab kaj lug.
Peb mam sib ntsib dua, nej sawv daws nyob zoo !
