Tam sim no peb yuav los mloog tus piv txwv ob : hauv kev tshais ruam mus tom ntej, thiab ua raws yam uas Yes Xus hais nyob hauv Ntawv Cog Lus Qub. “Nej tau hnov lawm tias ; txhob zes luag poj luag sev.” Tab sis kuv hais rau nej tias :
“Tus uas saib luag tej poj niam vim nws xav deev, mas nws twb deev tus poj niam ntawd hauv nruab siab lawm. Yog koj sab qhov muag xis coj koj ua txhaum, mas yuav muab dawj pov tseg. Zoo dua cia koj lub cev poob mus hauv dab phem teb. Yog koj phab tes xis coj koj ua txhaum, mas yuav muab txiav pov tseg. Zoo dua cia koj lub cev poob mus hauv dab phem teb.” Tswv Ntuj tau hais nyob hauv Ntawv Cog Lus Qub tias : “Txhob zes luag poj luag sev”. Ces Yes Xus thiaj pib nyob hauv Ntawv Cog Lus Qub uas yog 10 lo lus qhia. Tab sis nws kuj tseem tsis tau txaus siab thiab nws xav kom peb ua dab tsi ntxiv ? Yog peb xav chaws mus hauv Tswv Ntuj lub Ceeb Tsheej thiab hais txog kev zes luag poj luag sev, mas Yes Xus hais tias : “Tswv Ntuj tau tsim tas txhua tsav puas yam zoo kawg. Tswv Ntuj xav kom nkawm niam txiv sib raug zoo hauv kev nyiam kev hlub uas tshwj xeeb, zoo txhij zoo txhua thiab tsis muaj qhov pauj. kom ruaj nreb hauv kev sib yuav. Li ntawd, Ntawv Ntshiab Torah thiaj hu kev sib deev uas tsis yog kev sib yuav tias : yog kev zes luag poj luag sev. Thiab Tswv Ntuj xav kom nws haiv neeg ua lub neej txawv cov neeg tsis ntseeg.
Kev ncaj ncees hauv lub neej ua txij nkawm, tsis yog yam uas Tswv Ntuj cia li xav tawm los, tab sis nws yog txoj cai tsim nyog hauv kev hlub. Kev ntxeev siab tsis tau pab kom koj loj hlob uas neeg zoo, tab sis ua rau koj poob qab thiab poob tsim hauv kev ua neeg. Li ntawd, lo lus qhia uas peb pom nyob hauv Ntawv Cog Lus Qub thiaj yog qhov muaj nqis heev.
Kwv tij Hmoob sawv daws ! Hnub no peb tham txog Mas Tais zaj 5 qib 17 txog 37 los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug. Peb mam sib ntsib dua, nej sawv daws nyob zoo !
