Hmoob txoj kev ua neeg thoj nam hauv cov xyoo 1970, mas yog los ntawm kev khiav tsov rog nyob hauv cov xyoo 1960. Thawj pab Hmoob thoj nam mus txog As Mes Lis Kas teb, mas yog ib lub teb chaws tshiab thiab txawv heev. Kev ua lub neej nyob kuj tsis xws li Los Tsuas teb thiab Thaib teb, ces lawv ua lub neej nyuab kawg.
Thaum cov Hmoob thoj nam mus txog coob coob, mas tseem hwv As Mes Lis Kas muab Hmoob faib ri mus nyob ntau lub xeev thoob teb chaws As Mes Lis Kas, vim tsis xav cia lub nra txais neeg thoj nam poob rau ib lub xeev xwb. Tab txawm ua li ntawd, tsis kav Hmoob kuj tsa lub Koom Haum Hmoob 18 xeem ua qhov chaw ruaj khov ntawm Hmoob nyob As Mes Lis Kas teb.
Cov Hmoob thoj nam feem coob yog nyob hauv 2 lub xeev, xws li lub xeev California thiab lub xeev Minnesota. Tam sim no lub nroog ntxaib nyob Minnesota thiaj nto npe tias yog ib lub nroog Hmoob, vim muaj Hmoob nyob coob kawg. Muaj 15,000 tus Hmoob tau mus nyob hauv lub xeev North Carolina. Nyob ntawd, ib txhia ua hauj lwm hauv tseem hwv cov tsev tsim toob xib thiab ib txhia yug qaib. Hmoob lub neej nyob As Mes Lis Kas hloov thiab txawv lub neej nyob Los Tsuas teb lawm ntau, vim txhua yam hauj lwm yog ua mus raws cov teb chaws vam meej txheej tshiab.
Xyoo 1980, Hmoob yog cov neeg thoj nam uas pluag thiab txom nyem tshaj, vim cov tau kawm txuj yog 60 feem pua xwb. Ces feem ntau sawv daws tsis tau hauj lwm ua thiab nyob rau tseem hwv yug. Lub neej nyob As Mes Lis Kas, mas nyuab heev rau cov neeg nquag, tab sis yooj yim heev rau cov neeg tub nkeeg. Cov hluas txheej tshiab hloov lawv tus kheej mus yoog cov neeg As Mes Lis Kas, tab sis cov laus tseem nco thiab xav ntsoov lawv lub teb chaws Los Tsuas.
Muaj qee leej uas lawv tsis tau txais ntaub ntawv ua neeg Mes Kas, vim lawv tsis paub ntaub ntawv. Cov Hmoob feem coob nyob hauv Minnesota, yog cog ntseev xeem. Txawm tias Hmoob mus ua lub neej tshiab muaj ntau yam nyuab rau Hmoob yuav tsum hloov thiab yoog, tsis kav qhov kawg Hmoob kuj muaj ib tug tau nrog luag ua nom thiab.
Mim Muas yog thawj tug Hmoob thiab yog thawj tug neeg As Xias toob fab naj tau ua nom sawv pej xeem cev nyob hauv tseem hwv lub rooj kav xwm. Maiv Neeb Muas yog thawj tug kws txuj Hmoob nto npe uas sau phau ntawv Bamboo Among the Oaks. Cov thawj coj Hmoob thiaj hais tias ; peb Hmoob zoo siab thiab txaus siab uas peb caum cuag peb tus npau suav lawm. Yav tag los peb tej niam tej txiv tsis muaj kev txawj ntse, peb tsis tau nrog luag ua nom ua tswv. Vim tej laus ua lub neej nyob pem toj roob hauv pes thiab khiav tsov khiav rog. Ua rau peb Hmoob muaj cov tuag tshaib tuag nqhis thiab raug tua tuag ntau caum txhiab leej. Nyem no peb tau tuaj txog lub teb chaws loj dav thiab vam meej xws li As Mes Lis Kas teb. 28 xyoo xwb peb twb vam meej tshaj cov laus lub neej 200 xyoo dhau los nyob Suav teb thiab nyob hauv cov teb chaws As Xias toob fab naj lawm ntau heev.
