Qeej Hmoob thiab neeg tus ntsuj plig
Txhua haiv neeg nyob hauv ntiaj teb no, puav leej nrhiav kev tham txuas lus nrog fab ntsuj plig. Tej haiv neeg siv cov ntawv sau ntawm nplooj tshuaj yej los yog tej yav xyoob. Tab sis Hmoob muaj kev txuas lus nrog fab ntsuj plig, uas yog siv qeej los tshuab. Qeej yog ib hom twj paj nruag uas siv ntau yav xyoob los ua. Lwm haiv neeg mas hom twj paj nruag luag siv los txuas lus nrog fab ntsuj plig, mas yog cov suab paj
nruag muaj theem muaj qib uas zoo mloog thiaj txuas tau nrog fab ntsuj plig. Qeej yog ib hom twj paj nruag uas tsis siv lwm yam twj paj nruag los xyaw los sis xyaw suab hu nkauj. Muaj qee lub sij hawm muaj suab qeej suab nruas ua ke, tsuas yog siv nyob hauv lub ntees pam tuag, kom tau siv qeej los tshuab txuas lus nrog ntsuj plig.
Lub peev xwm thiab kev tshuab qeej Hmoob muaj ntau lub suab, suab siab suab qis raws li Hmoob tshuab. Yog peb ua zoo mloog mas peb yuav tshawb fawb pom txog lub chib keeb ntawm qeej Hmoob uas siv txuas lus nrog fab ntsuj plig nyob hauv Hmoob cov kab ke pam tuag. Tas txhua yam muaj lub keeb chiv los ntawm Hmoob.
Ntev los lawm, muaj ib tug neeg tshaj lij hu ua Xeem Xais (Sinsay). Nws muaj peev xwm thiab muaj hmoo heev, nws yog ib tug kws ntaus rog nto npe mus thoob ntiaj teb.
Yog nws ntaus rog yeej lub teb chaws twg, mas nws yuav tau tus ntxhais zoo nkauj tshaj hauv lub teb chaws ntawd los ua poj niam. Nws tau yuav 7 tus poj niam. Feem ntau nws tsis nrog nws cov poj niam nyob, vim nws yuav tsum mus ntaus rog dua lwm qhov chaw tshiab. Muaj ib hnub tus vaj kav teb chaws txiav txim siab ua ib lub ntees lom zem loj thiab nws caw sawv daws tuaj koom, ces Xeem Xais thiab nws 7 tus poj niam kuj mus koom. Tab sis lawv nrhiav tsis pom lawv tus txiv Xeem Xais, lawv thiaj seev suab hu nkauj thiab hais kwv txhiaj.
Kev hais kwv txhiaj yog ib txog kev nrhiav tus txiv, ces lawv thiaj nrhiav tau Xeem Xais. Lawv chim siab, vim Xeem Xais rov yuav dua ib tug poj niam. Muaj ib tug thawj thiaj kom Xeem Xais 7 tus poj niam nrhiav 7 yam toob xib los ua pov thawj rau lawv seb leej twg yog Xeem Xais poj niam. Cov poj niam thiaj tawm mus nrhiav thiab lawv nqa tau 7 yav raj xyoob rov los. Lawv muab 7 yav raj xyoob sib dhos ua ke ua qeej rau lawv tshuab, ces tus thawj mloog thiab tshaj tias 7 tus poj niam ntawd puav leej yog Xeem Xais poj niam. Vim li ntawd rab qeej thiaj nrov ua 7 lub suab poj niam, tab sis qhov tiag mas yog 6 lub suab xwb.
Raws li cov txiv qeej paub, mas txij puag thaum ntxov los lub suab qeej muaj zog dua suab hais lus. Cov txawj qeej mas yog cov txiv qeej, vim thaum lawv tshuab qeej lawv paub txog txhua yam nyob saum huab saum cua thiab tej yam txawj yaj. Cov txiv qeej lawv muaj peev xwm sib txawv thiab tsis yog txhua tus yuav tshuab tau qeej zoo ib yam. Yog tus xav txawj qeej tiag, mas nws yuav muab siab rau xyaum raws li cov txiv qeej uas yog cov kws laus.
Zim txwv no Los Tsuas teb thiab Thaib teb cov me nyuam tub 8 xyoo txog 10 xyoo pib nyiam tshuab qeej thiab lawv xyaum xuas ntiv tes pos ntiv qeej. Lawv xyaum ntawm cov laus uas txhawj tshuab los yog cov txiv qeej. Feem ntau lawv kawm nyob hauv lawv lub zos thiab tus xib hwb qhia qeej yog cov neeg txheeb ze.
Cov me nyuam yaus uas xyaum tshuab qeej, mas lawv yuav xub xyaum ntiv thiab tshuab ib lo zuj zus. Xyaum hais cov zaj qeej kom tau thiab nco ntiv qeej kom meej nyob hauv lus hmoob.
Tus xyaum qeej yuav nco cov suab qeej thiab ntiv qeej, lawv yuav tsis tsim tej zaj tshiab. Raws kev cai mas txhua txhua yim neeg yuav tsum muaj me tub txawj tshuab qeej thiab paub kab ke pam tuag.
Ntau xyoo dhau los no, muaj coob leej txiv neej nyob txhua lub zos tau kawm kom lawv paub txog kab ke pam tuag.
Cov lus nyob hauv suab qeej, yog cov suab qeej nyob hauv tej kab ke pam tuag. Qeej yog ib hom twj paj nruag uas siv txuas lus nrog fab ntsuj plig, thiab tsis muab coj los tshuab ua lwm yam yog tsis yog kab lis kev cai.
