Kwv tij Hmoob, thaum nej yog ib tug neeg coj txoj kev cai tshiab, yog ib tug teev hawm Tswv Ntuj, yog ib tug neeg ntseeg Yes Xus lawm; mas nej ua dab tsi los xij, nej yuav nco ntsoov ua Tswv Ntuj tsaug thiab thov Tswv Ntuj tsom kwm pov hwm nej: xws li thaum nej sawv, thaum nej yuav noj mov, thaum nej yuav tawm rooj mus ib thaj tsam twg, thaum nej yuav ua ib txoj hauj lwm, thaum nej muaj mob, thaum luag kom nej thov Ntuj rau lwm tus, thaum nej yuav pw, los yog thaum nej ua npau suav phem.
Nyob hauv KEV NTSEEG THIAB TXUJ HMOOB no, peb Zoo Tswv Zov Yaj thiaj yuav muab cov zaj qhia thov Ntuj li hais los nthuav qhia rau nej tau kawm tau xyaum.
Nyob hauv ntu 2 no, peb Zoo Tswv Zov Yaj thiaj yuav pib muab zaj ‘thov Ntuj thaum sawv ntxov’ los tso rau nej tau kawm. Tus sau zaj no yog XH. Ntsuab Pov Yaj.
Thaum sawv los, mas peb yuav xub ua ‘Ntoo Cuam Lub Cim’, tag ces mam hais cov lus ua ‘Tswv Ntuj tsaug’ li no:
“Kuv tus Huab Tais, kuv tus Tswv Ntuj muaj hwj huam, kuv ua koj tsaug vim koj tau tsom kwm thiab pov hwm kuv thiab kuv tsev neeg, peb sawv daws tau pw tsaug zog zoo thiab so los siav ib hmos kaj ntug. Kuv thov ua koj tsaug.”
Thaum hais li ntawd tas, mas hais cov lus thov Huab Tais Ntuj pov hwm sawv daws tias:
“Ua li mas lub sij hawm no, kuv yuav sawv mus ua dej num. kuv thov muab kuv tsev neeg, 120 leej tus ntsuj plig rov los rau koj ua tus tsom kwm thiab pov hwm ib hnub rov txog tsaus ntuj.
Thov koj cev koj txhais tes muaj hwj chim los rhuav tshem kuv tej kev nyuaj siab ntxhov plawv, kev iab kev khwv, kev plaub kev ntug, kev haub kev ntxias, hmab dawm tes hlua dawm taw, ib puas tsav yam xwv txheej tsis zoo kom txav mus deb ntawm peb sawv daws lub neej. Thov koj muab rhuav tshem kom yaj ntshis thiab ploj ntais mus kom tas, kom peb txhua leej ntsej tsis hnov muag tsis pom.
Thov koj txuag peb txhua tus kom tsuas ntsib kev dawb kev huv, kev noj qab pw sov mus thawm hnub. Kuv ua koj tsaug.”
Thov Ntuj pov hwm sawv daws tas, mas hais zaj ‘Peb Txiv’ li no:
“Peb Txiv nyob saum ntuj, koj lub npe ntshiab nto moo lug.
Koj lub ceeb tsheej los txog,
kom muaj raws li koj nyiam nyob ntiaj teb no li nyob saum ntuj.
Thov koj pub mov txaus peb noj hnub no.
Koj zam rau peb zoo li peb zam rau luag,
Koj txhob tso peb raug kev ntxias,
koj npo peb dim ntawm kev phem.
Ua li”
Thiab hais zaj ‘Koj nyob kaj lug Mab Liab’ li no:
“Koj nyob kaj lug Mab Liab, tus tau txiaj ntsim puv siab.
Huab Tais nrog koj nyob.
Koj tau koob tau hmoov tshaj ib zeej tsoom poj niam tib si,
thiab Yes Xus lub txiv uas koj lub cev txi tau koob tau hmoov.
Leej Ntshiab Mab Liab, Tswv Ntuj Leej Niam,
koj thov Ntuj hlub peb cov neeg txhaum
nyem no mus txog thaum peb lub caij dua.
Ua li.”
Hais 2 zaj thov Ntuj no tas ces ua Ntoo Cuam Lub Cim.
Kwv tij, nej yuav kub siab kawm mog. Nyob zoo sawv daws.
Vam txog: Phau ntawv pab thov Ntuj (HANCA 1996)
