Kwv tij Hmoob, nyob hauv ntu 2 mas peb Zoo Tswv Zov Yaj tau qhia nej thov Ntuj thaum yus nyuam qhuav sawv hauv txaj los lawm. Ntu no peb yuav rov los qhia nej thov Ntuj thaum yuav mus pw, raws li XH. Ntsuab Pov Yaj qhia tseg cia.
Ua ntej mas yog ua Ntoo Cuam Lub Cim. Tag ces mam hais cov lus ua Ua Tswv Ntuj tsaug li no:
“Huab Tais, kuv ua koj tsaug txog ntawm koj txoj kev nyiam, koj tau tsom kwm, pov hwm kuv thiab kuv tsev neeg ib hnub dhau los lawm. Kuv tau txais koj tej txiaj ntsim ntau kawg lawm. kuv thov ua koj tsaug.”
Ua Tswv Ntuj tsaug tas ces mas thov Tswv Ntuj txuag yus tias:
“Kuv tus Huab Tais Tswv Ntuj, lub sij hawm no kuv yuav mus pw tsaug zog mas kuv thov muab kuv txoj hauj lwm uas kuv tau ua ib hnub dhau los lawd thiab kuv tus ntsuj plig cob rau koj ua tus tsom kwm thiab pov hwm ib hmos rov txog kaj ntug tag kis.
Thov koj rhuav tshem cov yeeb ncuab, dab phem kev haub kev ntxias, dab ntub npau suav phem huv tib si, kom yaj thiab ploj mus kom tas.
Thov koj pub rau peb tau pw tsaug zog zoo hmo no mus txog kag ntug.”
Tas ces ho mam hais zaj ‘Peb txiv nyob saum Ntuj’ thiab zaj ‘Koj nyob kaj lug Mab Liab’. Thaum xaus ces mam ua Ntoo Cuam Lub Cim.
Kwv tij, nej yuav ua Tswv Ntuj tsaug tsis tseg thiab thov Ntuj txhua hmo mog!
Vam txog: Phau ntawv pab thov Ntuj (HANCA 1996)
