Koj tsis tuaj yeem nkag siab thiab zais tsis tau tus kheej rau Tswv Ntuj. You Can’t Grasp or Hide From God

Koj tsis tuaj yeem nkag siab thiab zais tsis tau tus kheej rau Tswv Ntuj. You Can’t Grasp or Hide From God

Nyob hauv xyoo C no, peb muaj ib qho tshwj xeeb nyob hauv ntawv Kev Tsiv zaj 3, hais txog kev sib pom ntsej muag nyob hauv tsob pos uas cig cig. Yog ib kab lus tseem ceeb nyob hauv Ntawv Ntshiab. Peb tej keeb kwm tau hais txog zaj no ntau kawg thiab yog los ntawm zaj no. Kab lus no thiaj ua qhov pom kev nyob hauv txhua txoj kev. Li ntawd, kuv thiaj xav nyeem kab lus no rau koj. Kuv thov ua lub zog txhawb siab rau koj, thaum koj nthuav koj phau Ntawv Ntshiab. Koj yuav nrhiav kab lus no nyob hauv ntawv Kev Tsiv zaj 3. Mais Xes thiab tsob pos cig yog qhov hluav taws qhia peb ntau yam hais txog Tswv Ntuj. Hais txog txoj sia fab ntsuj plig, hais txog peb kev sib raug zoo nrog Tswv Ntuj. Qhov ntawd yog txhua yam uas muaj nyob rau hauv.

Mais Xes tab tom zov nws yawm txiv Zes Raus pab yaj, thiab nws tab tom nyob hauv teb chaws suab puam. Nws raug saib xyuas zoo li nws yog Hais Nkws Tos ib tug tus tub. Nws loj hlob nyob hauv Fas Las Oos uas yog tus vaj Hais Nkws Tos lub tsev.

Li ntawd, nws thiaj yog ib tug neeg txheej siab thiab muaj kev txawj ntse heev. Nws kuj paub tias nws li keeb kwm yog neeg Hes Nplaws. Muaj ib hnub nws pom ib tug Hais Nkws Tos tab tom muab nws ib tug kwv tij Hes Nplaws ntaus. Nws ntsia ib ncig tsis pom muaj leej twg, nws txawm muab tus Hais Nkws Tos tua thiab muab zais rau hauv cov suab puam. Tom qab nws paub tias muaj neeg paub txog cov xwm nws tua neeg, ces nws thiaj khiav mus txog Mas Dias teb.

Nov yog qhov xwm yeem ntawm Ntawv Ntshiab. Yuav luag txhua tus neeg nto npe nyob hauv Ntawv Ntshiab, lawv puav leej raug sim thiab soj ntsuam nyob teb chaws suab puam. Nov yog ib qho laij thawj uas peb nyeem nyob hauv lub Caij Plaub Caug. Ua ntej koj yuav nkag siab Tswv Ntuj tau zoo, koj yuav tsum tau txais kev ntxuav qee yam nyob hauv koj lub siab, hauv koj tus kheej thiab koj tus ntsuj plig. Kom qee yam ploj mus ua ntej koj yuav ntsib Tswv Ntuj. Tswv Ntuj puas nrog Mais Xes nyob mus tas ib sim neej ? Nyob kawg, tab sis Mais Xes npaj tsis txhij uas yuav ntsib Tswv Ntuj mus txog thaum nws mus them txim nyob teb chaws suab puam. Thaum txhua yam ploj tas, thiab nws npaj txhij yuav ntsib Tswv Ntuj. Nov yog yam uas tshwm sim.

Thaum Mais Xes nyob teb chaws suab puam, nws coj nws pab yaj thiab nws yog ib tug neeg yug yaj xwb. Nyob ntawd, Tswv Ntuj tus Tshiab yees tawm los rau Mais Xes pom nyob hauv ib co nplaim taws cig cig hauv ib tsob pos. Nws ntsia ntsoov tsob pos cig ntsa iab, tab sis tsis txawj kug li. Nplaim taws los qhov pom kev yog lub Cim ntawm Tswv Ntuj. Yes Xus hais tias : “Kuv yog ntiaj teb qhov pom kev.” Tswv Ntuj yog qhov pom kev ntawm tas txhua yam. Qhov uas Tswv Ntuj yees tawm tuaj nyob hauv cov nplaim taws, nws tsis yog qhov txawv. Yam uas ntxim siab nyob hauv zaj no : yog tsob pos cig cig, tab sis tsis kub hnyiab. Tsob pos tseem ntsuab xiab thiab nplaim taws cig hlob heev, tab sis tsob pos tsis txawj kug. Thaum Tswv Ntuj txav los ze, nws kuj ua kom zoo nkauj dua qub tuaj. Nws muaj ntau yam zais ntshis nyob hauv zaj no. Kuv kheev kheev hais li no. Thov peb tig rov mus saib nyob rau txheej thaud hauv cov Hes Laas thiab cov Los Mas. Thaum lawv tus Tswv Ntuj los niam nkauj kab yeeb tshwm sim nyob hauv ntiaj teb, nws zoo li kev piam sij, vim lawv sib tw nrog lub ntiaj teb. Qee yam yuav tsum zam kev rau lawv tus Tswv Ntuj tshwm sim. Tab sis tsis muaj yam ntawd nyob hauv Ntawv Ntshiab. Thaum Tswv Ntuj txav los ze, mas txhua yam nyob siab thiab zoo nkauj tuaj. Los mloog cov kws thoob tsib txheej tshiab yuav luag txhua tus cov lus hais. Koj yuav hnov lo lus tias : “Yog Tswv Ntuj tau txais lub meej mom, mas Tswv Ntuj yuav sib tw nrog kuv txoj kev twj lij. Ces kuv yuav ua neeg me, yog tias kuv hwm Tswv Ntuj.”

Tswv Ntuj lub hwj chim ci ntsa yog tus tib neeg uas tseem muaj txoj sia nyob. Koj yuav pom Tswv Ntuj lub hwj chim nyob hauv tsob pos uas tab tom cig. Mais Xes thiaj txiav txim siab tias : “Kuv yuav lug kev mus xyuas yam txawv txawv ntawd saib yog dab tsi, ua cas tsob pos ntawd yuav cig tsis txawj kug ?” Tab txawm tias Mais Xes raug rau txim nyob teb chaws suab puam. Tab txawm nws npaj siab los tau ntau xyoo, tsis kav peb tseem hnov Hais Nkws Tos tus tub lub suab. “Kuv yuav mus saib thiab soj ntsuam, kuv yuav tsum paub tias yog vim li cas tsob pos no thiaj tsis kub hnyiab.”

Ces Mais Xes thiaj mus saib tsob pos uas cig ntawd. Tswv Ntuj pom Mais Xes lug kev tuaj, Tswv Ntuj hu nws hauv tsob pos tuaj tias : “Mais Xes, Mais Xes.”

Mais Xes teb tias : “Kuv nyob ntawm no.” Tswv Ntuj hais tias : “Koj txhob txav los ze ntawm no, hle koj nkawm khau ntawm koj ko taw, vim thaj chaw uas koj tsuj no yog ib thaj chaw ntshiab.” Vim li cas Tswv Ntuj thiaj kom Mais Xes hle nws nkawm khau ? Yog tias nws rau khau, mas nws yuav mus qhov twg kuj tau. Vim nws tso siab tias tsis muaj dab tsi chob tsis muaj dab tsi khawb. Kev hle khau, yog qhia txog tias muaj kev ntshai ntxiv. Thaj chaw Mais Xes tsuj, yog thaj chaw ntshiab. Lo lus ntshiab nyob hauv Ntawv Ntshiab, yog hais txog thaj chaw uas yog tus kheej ntiag tug. Zoo ib yam li kev ntshiab huv hauv lub tuam tsev teev Ntuj. Ntshiab huv, ntshiab huv, Tswv Ntuj yog tus muaj hwm chim loj kawg. Cov Tshiab hais li ntawd nyob hauv ntawv His Xais.

Tswv Ntuj hais ntxiv tias : “Kuv yog koj cov yawg koob tus Tswv Ntuj, yog Has Nplas Has tus Tswv Ntuj, yog His Xas Has tus Tswv Ntuj thiab yog Yas Kos tus Tswv Ntuj.”

Maiv Xes yog haiv neeg Hes Nplaws uas raug ua qhev nyob Hais Nkws Tos teb, lawv yog cov neeg txheej qis uas raug quab yuam. Txawm li ntawd kuj xij, tus hais lus hauv tsob pos cig cig nws paub lawv. Nws paub lawv thiab paub lawv tej keeb kwm zoo. Tus Tswv Ntuj no nws tau nyob ze Has Nplas Has, His Xas Has thiab Yas Kos.

Nyob hauv Ntawv Ntshiab, Tswv Ntuj yog yam tsis tuaj yeem nkag siab tau. Tswv Ntuj hais ntxiv tias : “Kuv pom kuv haiv neeg txoj kev txom nyem nyob Hais Nkws Tos teb. Kuv hnov lawv lub suab quaj, vim luag quab yuam lawv. Kuv paub lawv tej kev txhawj xeeb tas huv tib si.” Nov yog qhov Tswv Ntuj tau nyob ze lawv. Tswv Ntuj paub lawv li keeb kwm. Tswv Ntuj paub txog lawv tej kev txhawj xeeb zim txwv no.

Mais Xes hais rau Tswv Ntuj tias : “Yog lawv hais rau kuv tias : ‘nws lub npe hu li cas ?’ Kuv yuav hais li cas rau lawv ?” Tswv Ntuj hais rau Mais Xes tias : “Kuv yog tus kuv yuav yog.” Nov yog lo lus loj kawg nyob hauv ntawv Cog Lus Qub. Thaum muaj neeg nug lo lus no, Tswv Ntuj yuav teb tias : “Kuv yog tus kuv yuav yog.” Tab sis kuv xav dua lwm yam, Tswv Ntuj tab tom hais tias : “Tsum ! Txhob nug tej lo lus ruam ruam lawm.” Tswv Ntuj yog tus tsim puas tsav yam uas peb tsis tuaj yeem nkag siab tau. Tswv Ntuj tsis yog ib yam dab tsi nyob hauv ntiaj teb no. Yog tias kuv nug koj tias : “Koj lub npe hu li cas ?” Koj yuav teb qee yam rau kuv uas txawv lwm tus neeg. Koj yuav qhia koj lub keeb tsis thooj li lwm tus.

Tos Mas As Khais Nas hais tias : “Tswv Ntuj tsis tau nyob hauv ib yam twg li.”

Yam muaj nyob hauv yam muaj txoj sia, nws yog hais txog cov hnub qub, yawm saub, pob zeb thiab kuv. Tas txhua yam no puav leej yog yam muaj txoj sia, thiab Tswv Ntuj tsis tau nyob hauv ib yam ntawd lod ? Tos Mas hais tias : “Tswv Ntuj tsis nyob.”

Vim li cas ne ? Vim lo lus no tias : “Koj lub npe hu li cas, koj yog yam muaj txoj sia hom twg ?” Tswv Ntuj tsis yog ib yam twg nyob hauv ntiaj teb no, vim Tswv Ntuj yog tus tsim lub ntiaj teb. Vim li cas thiaj tsis tuaj yeem tuav tau Tswv Ntuj ? Vim Tswv Ntuj tsis yog ib yam dab tsi nyob hauv ntiaj teb no. Vim li cas Tswv Ntuj thiaj tsis tuaj yeem khiav nkaum tau ? Vim Tswv Ntuj nyob hauv txhua yam uas nws tsim. Thov peb nco ntsoov lo lus no tias : “Kuv yog tus kuv yuav yog.” Koj puas pom tias vim li cas Mais Xes thiaj soj ntsuam teb chaws suab puam ua ntej nws yuav mus nyob ? Vim peb cov txhaum. Kuv tab tom txib Tswv Ntuj, los kuv khiav nkaum Tswv Ntuj. Ob yam no koj tuaj yeem ua tau ib yam. Thaum koj nkag mus rau fab ntsuj plig, mas koj yeej npaj txhij koj lub siab rau qhov ntawd lawm. Tswv Ntuj xa Mais Xes mus ua nws cov hauj lwm, kom tau daws tso nws haiv neeg. Mais Xes xav siv lub sij hawm ntev nyob hauv teb chaws suab puam, kom tau nkag siab txog tus Tswv Ntuj uas nws tab tom ntsib.

Kwv tij Hmoob sawv daws ! Hnub no peb tham txog qhov peb tsis tuaj yeem nkag siab thiab peb zais tsis tau Tswv Ntuj los xaus li no xwb. Thov Huab Tais Yes Xus Pleev lub txiaj ntsim nrog nej nyob, ua nej siab kaj lug !

Lwm zaus peb mam sib ntsib dua, nej sawv daws nyob zoo !