Hnub tim 15 lub 8 hli ncaj rau hnub hwm Tswv Ntuj npo niam Mab Liab lub cev nrog nws tus plig mus lawm saum ntuj, ces Vaj Qhia Les Os 14 thiaj ua tswv cuab txoj lub Txoos Txi Ntuj. Nyob hauv lub tsev teev Ntuj muaj daim duab niam Mab Liab mus lawm saum ntuj, Vaj Qhia thiaj muab los ua chaw ntuas sawv daws tias peb pom daim duab no peb xav li cas, vim tias nyob hauv peb lub neej niaj xyoo dhau mus peb tsuas muaj qhov laus zuj zus tuaj, hnub nyoog yim ntau lub zog yim ntaug, tawv nqaij los yim txoom, plaub hau los dawb tas taub hau.
Vaj Qhia hais li no “Niam Mab Liab txais koob meej tas nrho nws lub cev thiab nws tus plig qhia peb tias peb qhov zoo nkauj tseeb tiag tsis yog qhov peb muab peb tej kev txoom npog cia kom tsis txhob pom, tab sis peb qhov zoo nkauj tseeb tiag yog qhib kom pom txoj kev nyiam tsis muaj caij kawg qhov caws pliav nyob hauv peb cev nqaij txoom cev nqaij txaij zias.”
Vaj Qhia hais ntxiv tias nyob hauv lub ntuj sawv daws saib tias kev zoo nkauj yog qhov yus tu lub cev kom ntxim zoo saib zoo nyiam, mas qhov ntawd ua rau peb nkim zog dag rau tej yam tsis tseem ceeb thiab tsis nyob ruaj mus li.
Nyob hauv peb lub neej, peb pom tej tus neeg ntsej muag txoom ua kwj tob vim lawv hnub nyoog nchav los yog lawv muaj kev ntxhov siab txom nyem ntau, tsis kav cov neeg pom, lawv ntsia ces lawv lub siab nyob tus, lawv ntsia lawv lub siab hlub khuv leej nws, lawv ntsia lawv lub siab nyob kaj lug. Muaj tej tus ntxim ntsia ntxim saib, tab sis lawv lub siab txhav qhi thiab txias zias cuag lag zeb.
Peb yuav tsum xyaum ntsia kom pom txog qhov zoo nkauj tseeb tiag no. Tsuas kawg txoj kev nyiam xwb thiaj li yog npauj nyiag npauj kub zoo nkauj tshaj plaws rau tib neeg. Txoj kev nyiam hloov tau peb, txoj kev nyiam thiab peb txoj sia kom sawv siab, txoj kev nyiam nqa peb mus rau qhov chaw siab, txoj kev nyiam ua rau peb sib tuaj, txoj kev nyiam pub kev twj lij rau peb, txoj kev nyiam npo peb mus nyob ze Tswv Ntuj.
Peb tsis tas yuav tawm mus nrhiav rau lwm qhov chaw deb thiaj tau ntsib txoj kev nyiam no. Tab txawm yus niam yus txiv ua hauj lwm khwv khwv ib hnub tsis kav yog yus ntsia mus hauv nkawd qhov muag, yus yuav pom tias nkawd muaj kev zoo siab thaum rov los pom me nyuam nyob tom vaj tom tsev. Yus ntsia yus pog yus yawg laus laus muaj muaj mob, tsis kav lawv muaj zog nchav thaum tau nrog me xeeb ntxwv nyob. Txoj kev nyiam no peb pom nyob hauv cov tub ntxhais hluas mob sia rau nrhiav qhov zoo. Peb pom txoj kev nyiam no nyob hauv cov txiv neej poj niam muaj lub siab ntseeg thiab muab siab rau ua txoj hauj lwm nqus lub ntuj kom txav los ze lub ntiaj teb thiab rub lub ntiaj teb kom txav los ze lub ntuj.
Thaum ua Thaj Txi Ntuj tas, Vaj Qhia coj sawv daws hais zaj tus Tshiab xa xov, Vaj Qhia hais tias Huab Tais Yes Xus tus tuag thiab sawv rov los yog tus yuav coj peb mus kom txog txoj sia nyob mus li. Hos qhov Tswv Ntuj npo niam Mab Liab mus saum ntuj pab kom peb pom txog yam tab tom nyob tos peb. Yam ntawd yog txoj sia puv npo peb pom nyob hauv niam Mab Liab. Thaum lub ntiaj teb kawg los txog, tus Cawm Seej txoj kev nyiam yuav los hloov peb lub cev, ces peb yuav muaj txoj sia mus ib txhiab ib txhis.
