Tim 18 lub 5 hlis tas los no, lub Koom Txoos Kav Tos Liv ua lub Txoos Txi Ntuj tsa Vaj Qhia tshiab nyob hauv Leej Ntshiab Pob Zeb lub tshav puam nyob Vas Tis Kas. Hnub ntawd, muaj tsoom pej xeem tuaj koom li ob puas txhiab leej, dhau ntawd tseem muaj cov neeg sawv cev ntawm ntau txoj kev teev hawm; yam li Yus Das, Mawv Xim Lim, His Ntus, Phus Thas, Xis, Ntxos Los As Tes, thiab Zais Nis.
Vaj Qhia Les Os 14 pib hais nws cov lus tias tom qab Vaj Qhia Fas Ntshis Kus tuag tas, peb zoo li tus yaj tsis muaj tswv, tab sis yog peb xav txog Vaj Qhia cov lus thov Tswv Ntuj foom koob hmoov nyob hauv Hnub Chiv Hla raws li peb txoj kev ntseeg, kev tso siab, thiab kev xyiv fab; peb pom tias Huab Tais Tswv Ntuj tsis muaj hnub yuav tso nws haiv neeg pov tseg. Vaj Qhia Les Os kuj ua tsaug sawv daws cov lus thov Ntuj rau kev xaiv tsa Vaj Qhia zaum no kom Leej Ntuj Plig Ntshiab tshoj tsoom Tswv Qhia Liab kom zoo li sawv daws lub plawv koom tib lub suab dhia.
Vaj Qhia Les Os 14 lees tias nws yog ib tug tsis tsim nyog sawv daws yuav saib rau nqi dab tsi thiab ziag no nws ntshai thiab tshee, nws tuaj cuag sawv daws yam li ib tug kwv tij ntshaw ua tus tsob hwb sawv daws txoj kev ntseeg thiab kev xyiv fab, nws ntshaw nrog sawv daws taug Tswv Ntuj kev nyiam txoj kev mus ua ke vim tias Tswv Ntuj xav cia peb sawv daws koom ua ib tug nyob hauv tib lub cuab.
Yes Xus lub Moo Zoo hauv hnub ua lub Txoos Txi Ntuj tsa Vaj Qhia tshiab zaum no yog cov lus hauv Zam Ntawv Moo Zoo zaj 21 qib 15-19 yog Huab Tais Yes Xus txib Pob Zeb kom ua tus coj cov neeg ntseeg, mas Vaj Qhia Les Os pom tias yog Huab Tais Yes Xus tab tom muaj txoj kab xwm kom Pob Zeb ua tus puav neeg thiab coj lub Moo Zoo qhov vam khom mus cuag txhua tus neeg, kom sawv daws tau nyob hauv Tswv Ntuj xub pwg. Pob Zeb tau saj Tswv Ntuj kev nyiam tsis muaj nrim thiab chaw xyeej, mas nws thiaj leg tau txoj kab xwm no. Huab Tais Yes Xus nug Pob Zeb 3 lwm saib Pob Zeb puas nyiam Huab Tais Yes Xus, qhov no yog Huab Tais Yes Xus thiab Pob Zeb txoj kev nyiam kom hlob tuaj txog qhov tias Pob Zeb kav muab tas nws txoj sia rau cov ntseeg xws li tus tswv zov yaj muab tas nws txoj sia pub rau cov yaj.
“Pob Zeb muab tas nws txoj sia los txi rau kev nyiam, mas nws cov hauj lwm thiaj ci ntsa, yog li mas lub Koom Txoos nyob Los Mas thiaj yog tus ntaus thawj nyob hauv txoj kev sis nyiam thiab lub Koom Txoos nyob Los Mas lub tseem hwj chim yog Leej Pleev kev sis nyiam. Lub tseem hwj chim no tsis yog quab yuam, tsis yog ntxias dag, los siv zog; tab sis lub tseem hwj chim no yog kev nyiam ib yam li Huab Tais Yes Xus tau nyiam.”
Vaj Qhia tso siab tias lub Koom Txoos uas yog lub cim thooj siab koom ntsws yuav ras ua poov xab kom kev haum xeeb su mus puv lub ntiaj teb. Vaj Qhia Les Os 14 hais li no nyob rau lub caij no mas qab ntuj muaj kev sib cov nyom thiab ntuag qhov txhia chaw vim kev ntxub ntxaug (hatred), xwv txheej (violence), kev ib siab (prejudice), kev ntshai (fear), qhov tiag ntawm kev lag luag (economic reality) uas nqus ntiaj teb peev txheej (the Earth’s resources) thiab cais cov neeg pluag txom nyem rau puas tim ntug (marginalises). Li ntawd, peb xav ua poov xwb me me nyob hauv kev thooj siab koom ntsws, kev koom ua tib pab kwv tij nyob hauv qab ntuj no.
Vaj Qhia xav kom qab ntuj neeg ntsia Leej Pleev, tshais ruam los kom ze Leej Pleev, los txais Leej Pleev lo lus pub kev kaj thiab nplij neeg. Mloog Leej Pleev cev nws kev nyiam thiab caw peb koom nrog nws ua ib cuab; nyob hauv Leej Pleev, peb yog ib tsev neeg. Vaj Qhia hais tias qhov no yog txoj kev peb taug ua ke mus, tsis yog nyob hauv lub Koom Txoos Kav Tos Liv xwb, tseem yog peb cov kwv cov muam nyob hauv lwm cov Koom Txoos, cov phooj ywg coj lwm txoj kev teev hawm, cov tab tom nrhiav Tswv Ntuj, thiab cov poj niam txiv neej uas muaj ib lub siab zoo xav tsim lub ntuj tshiab muaj kev thaj yeeb vas tas txhua qhov.
Yog lub Koom Txoos taug raws txoj kev li hais, mas lub Koom Txoos yuav tsis kaw tus kheej cia thiab yuav tsis xav tias lub Koom Txoos nyob siab dua lub qab ntuj. Tswv Ntuj hu peb los tseb Tswv Ntuj kev nyiam rau txhua leej neeg, kom kev koom siab tsheej xeeb tab sis tsis rhuav neeg kev sib txawv, tsis rhuav qhov muaj nqe hauv sawv daws ntiag tug, tsis rhuav txhua tus neeg txuj txoog hauv lawv pab pawg los lawv kev teev hawm. Yog li mas Vaj Qhia Les Os thiaj xa nws cov lus rau sawv daws tias “Cov kwv tij thiab cov muam sawv daws, lub zim txwv no yog lub caij nyoog sib nyiam! Lub Moo Zoo lub plawv yog Tswv Ntuj kev nyiam rub peb los ua ib pab kwv tij nkauj muam.”
