Vaj Qhia Les Os 14 hais lus rau cov ntseeg tuaj mloog nws nthuav lub Moo Zoo hauv hnub ntawd tias Tswv Ntuj tuav cov neeg pheej xeeb rau Tswv Ntuj txhais tes, thiab Tswv Ntuj hu sawv daws kom los taug txoj kev xyiv fab hauv kev ntseeg, txhob tso yus tog rau hauv cov teeb meem.
Vaj Qhia pib hais rau sawv daws tias nws ua sawv daws tsaug rau qhov tias nws ntsia pom sawv daws muab kev nyiam pub rau nws thaum nws thov kom sawv daws pab thov Ntuj rau nws mas sawv daws zoo siab thov.
Hais txog cov lus qhia, mas Vaj Qhia ras tias nyob hauv txhua txoj kev Huab Tais Yes Xus hu peb, tsis hais hauv kev ua neej nyob los hauv kev ntseeg, tej zaus peb pom tias zoo li tsis txaus. Txwm li cas los xij, yog peb saib hauv Zam Ntawv Moo Zoo, zaj 14 qib 13-29 yuav pom tias tsis tsim nyog peb yuav vam txog peb lub zog xwb, peb yuav tau vam txog Huab Tais kev khuv leej thiab; yam li pom tseeb tias Leej Ntuj Plig Ntshiab coj peb thiab qhia txhua yam rau peb.
Yog li mas tab txawm peb nyob nruab nrab kev ntxhov siab (Anxiety) thiab kev nyuaj siab (distress) mas peb tso siab tias Huab Tais yuav pub kom peb lub siab nyob nyab xeeb (comfort) thiab thaj yeeb (peace).
Ua ntej hnub Huab Tais Yes Xus yuav tuag, cov thwj tim ntxhov siab tas zog, lawv puas yuav rhais ruam mus taus ntxiv thiab lawv yuav ua tim khawv txog Tswv Ntuj lub Ceeb Tsheej tau li cas. Thaum lawv poob rau lub caij nyoog ua xyem xyav, Huab Tais Yes Xus tshaj txog Leej Ntuj Plig lub paj tshab rau lawv tias ‘tus twg nyiam kuv, nws yuav coj rawv kuv cov lus qhia, ces kuv Txiv yuav nyiam nws. Kuv Txiv wb yuav los ua tsev nyob hauv nws’.
Huab Tais Yes Xus pab lawv kom txhob poob ua kev ntxhov siab thiab kev txhawj xeeb (worry) qhev, ces nws hais rau lawv tias “Nej txhob ntxhov siab, txhob ntshai.”
Tib yam li ntawd, yog peb nyob nruaj hauv Huab Tais Yes Xus kev nyiam, Huab Tais Yes Xus yuav tsa tsev nyob hauv peb, peb yuav rais ua Tswv Ntuj lub Tuam Tsev, kev nyiam no yuav ci tuaj rau peb, txua peb lub tswv yim thiab peb tej kev xaiv, thiab kis mus thoob txhua tsav yam nyob hauv peb.
Tswv Ntuj nyob hauv peb li no mas yog lub paj tshab tuaj ntawm Leej Ntuj Plig tuaj; yam li Leej Ntuj Plig tuav peb tes kom peb hnov tias muaj Tswv Ntuj nyob tiag thiab Tswv Ntuj nyob ze peb.
Yog tej zaj zoo nkauj rau peb lub neej, yog peb ua tib zoo xav txog tias Tswv Ntuj hu peb li cas, Tswv Ntuj pub txoj hauj lwm zoo li cas rau peb, Tswv Ntuj tshoj peb kom tsob hwb lub Koom Txoos li cas, ces peb hais tau tias tab txawm kuv yog ib tug neeg tsis muaj zog, tsis kav Huab Tais tsis txaj muag tsa tsev nyob hauv kuv. Huab Tais nyob hauv kuv, ua lub teeb pom kev rau kuv, siv kuv ua ib lub twj coj Huab Tais kev nyiam mus pub rau lwm tus, pub rau lub qab ntuj.
Yog li mas hnub tim 25 tas los no, Vaj Qhia Les Os 14 thiaj ntuas cov ntseeg sawv daws kom ua neej xyiv fab nyob hauv txoj kev ntseeg, kev ntshiab, thiab coj Tswv Ntuj kev nyiam mus kom txog txhua qhov chaw.
